Read Mousgoum Nahamiyas 5 Bible Online

Nahamiyas 5 - Mousgoum bible

Nahamiyas 5

¹Mefeŋ ktai ɗai na maɵagai gaiɗi na falakai na Izrayel e tuwi buri sdakai na maafanai na tawalakaiɗi na Yudiyakai e ɗa ziŋ ɗa.

²Zamai e miɗi: Aliyi na maɵagai gaiɗi na falakai gaiyi tiyi lai, mi zi viya ta. Mi diri algama aŋ simi kapai mi simni karyi.

³Zamai e miɗi: Vuwaiyi, vuwaiyi zi luwuŋ zi vin, gaini dalamyi lai mi zigiŋ edi kapai mi nivi algama war mefeŋ zi wiyamai.

⁴Zamai pra e miɗi: Tiyi mi tifisi farai gaini tifi midini vuwaiyi, gaini vuwaiyi zi luwuŋ zi vin kapai mi virgi tar na wiini pai gaini.

⁵Paŋ ktai neŋ siyi maiɗi tawalakaiyi nɵa, aliyi e ɗa maiɗi aliɗi nagai nɵa lai; a dewele ɓa mi siɗi aliyi na maɵagai gaiɗi na falakai lai edi aŋ bege; aliyi na falakai zamai e ɗa war bege ya; mi tili gaini aryi, mi siɗi wala ktai na mi ziŋ ɗe kai. Vuwaiyi gaini vuwaiyi zi luwuŋ zi vin a bunda wiiɗi ɗai zamai.

⁶Hlai na mu ɵina seŋ na maini hanɗa nɵa, gaini marava hanɗa lai, mu hiy abai gara.

⁷Hiini ktai a cosi mada buri mu miɗiɗi wiiɗi ɗai n’abakai zi spak gaiɗi n’abakai n’e ɵi wuze; mu miɗiɗi maini nɵa: Ki tiki midiɗi marki n’a guma n’abai, asakal par mu yikiɗi war diŋgi n’abai.

⁸Mu miɗiɗi: Tumu gaini mudumu dama mu wuruɗumusi tawalakaimu na Yudiyakai, n’e sikiliɗi edi aŋ bege tiɗi ɗai zamai zamai gaini gir na kaɓa, kaɓa; amma, tiki tiyana ki sikiliɗi tawalakaiki edi arbaki tiki dama koo. E bi miɗi hiyak e siɗi wala n’e miɗiŋ ɗe kai.

⁹Mu miɗiɗi pra: wala na ki ziŋ hanɗa a futini kai, kadai tiɓ ki piyi war hunai na pini Alaw na wiimu kapai ki tiki siyer arbaɗi pinzibaɗi ɗai na gawmu kai nɵa kai ɗi?

¹⁰Tiyana ɗa, ta lai, tiki tawalakaya lai, gaiki tiki ɗaiŋa zi sda lai; tumu mu tufuɗumu farai gaini algama ya, a pɗem ɓa mu hunuɗumu tumuŋ hanɗa mak.

¹¹Girna tar wiyiɗi vuwaiɗi gaini vuwaiɗi zi luwuŋ zi vin, zi luwuŋ olive, gaini dalamɗi lai, gaini farai, algama, vin na hehe gaini emel na ki tifiŋɗi paŋ, ki zilbi yem pini kai.

¹²E miɗi: tiyi aga mi hiniŋɗi, aga mi zilbi wala ktai tiki kir kai, aga mi zi maini na ku muɗaŋ ɗa nɵa. Mu yikiɗisi paakai zi ɓaka ɗai e hi wala miɗi wuzaɗi ɓa aga e zi maini na e miɗiŋ ɗa nɵa.

¹³Asakal par mu gulda ɵubu na wiini sapaŋa edi, mu guvraŋ, mu muɗa: Alaw aga a guvra asiya asiya ɗi paŋ n’a ɗiya midini seŋni kai edi war dalamni par, sini wazagaini par lai maini nɵa, a hina blaŋ wala ktai tini kai. Ɗai paŋ e miɗi: Nkam a za maini nɵa, e si kol sini EPIƊ-ƊAI, e zi pini wala n’e miɗi midini lai.

¹⁴Haa sin mefeŋ na pai a tikaŋa aŋ Lawan midini afti na Yuda par, sini buza na caaɓa na Artaserkises aŋ warɗi pai, haa girna, buza pi sulu, ta kaai; tawalakaya kaai mi simi wala zi Lawan kai.

¹⁵Wuza ta par, Lawanai e kirpiɗi ɗai, e mili wazagai zi simi gaini si lai tiɗi par; pra e ziɗi dewele aŋ virgi arzaŋ sikel doogo-doogo-puɗu; ɗai na wiiɗi Lawanai zi sda lai e ŋi midiɗi; amma ta ɗa mu za maini hanɗa ɵa kai buri mu huna Alaw.

¹⁶Pra mu sa sa edi mini sdaɗi ɵagai hanɗa ta, mu wura vuwai buutu kai, mara n’e ɗi gaya war sda won na e wûri hlai ɵa kaalai.

¹⁷Paŋ ktai, Yudiyakai gaiɗi n’abakai n’e ɵi wuze n’e simi sa par e ɗa paŋ ɗai miya gaini doogo-doogo-ɵim; nagai n’e hilisi edi par midini afti na ɵemaii gobi maa pɵaɗi arɗi kai.

¹⁸Yuvai paŋ e fiɗi gari ktai, adumai na gaini futini ɵaara, gaini wazagai zi baada lai. Mefeŋ a za li paŋ e kiŋasi vin zi ci viya, gaini hanɗa paŋ ɗa mu zilba wala zi Lawan kai, buri gumani sda paŋ ɗa a nafu midiɗi ɗai hanɗa.

¹⁹Alaw, hina muduku a kɵa gaini na pɗamai na mu zaŋ buriɗi ɗai hanɗa, za yumku sa.