Read Mousgoum Nahamiyas 8 Bible Online

Nahamiyas 8 - Mousgoum bible

Nahamiyas 8

¹Ɗai paŋ e tipi war hiini ktai, e diŋgi edi war baŋa na wuzani mini magala na wiini yem, e miɗini wiini Esdras ɗif n’a sɗa ɗû, n’a sɗa gadai gara, buri a kiɗisi maktuɓ zi ɗû n’EPIƊ-ƊAI a siŋɗi wiiɗi Izrayel war tini Musus.

²Nɵa Esdras na pai zi ɓaka a kasi maktuɓ zi ɗûwuzaɗi ɗai n’e diŋgi ɗa; maɵagai, falakai gaiɗi aliyagoi n’e zi ya dai dai aŋ ɵini wala n’a na muɗa, e ɗûfi war diŋgi hanɗa, hanɗa a za war mefeŋ n’avut na wiini tile n’ag'aŋ muguzak.

³E di war baŋa na wiini mini magala na wiini hlai zi yem, Esdras a ŋa maktuɓ hanɗa wuzaɗi maɵagai, falakai aliyagoi na dai dai ɗe lai. A tika pini gorof par na hlai rum rum haa girvudi n’arba ta; ɗai paŋ e zigi ɵimani aŋ ɵini ɗû n’a na ŋa edi.

⁴Esdras, ɗif n’a sɗa ɗû gara aɗiya amai midini balak zi luwuŋ n’e pin buri sda hanɗa lai, Matiya, Sema, Anaia, Uriya, Hilkiya gaini Masaia lai e ɗiyi war graŋni na wus; Pedaya, Misaiel, Malkiya, Hasum, Hasbadana, Zekariya, Mesulam lai war graŋni na muni.

⁵Esdras a mala maktuɓ edi wuzani arɗi ɗai paŋ buri ni a nafu amai par midiɗi ɗai paŋ; Won hlai n’a malaŋ edi ɗai paŋ eɗiyi amai.

⁶Esdras a yima tini amai, a sa kol sini EPIƊ-ƊAI, Alaw n’abai, Ɗai paŋ e yimi tiɗi amai e wiyi seŋ e miɗi: Amen, Amen. Asakal e gûɓi azumai, e hûrgi azumai wuzani EPIƊ-ƊAI, e pi arɗi azumai midini afti.

⁷Asakal par e ɗiyi amai nɵa, Yosva, Bani, Serebiya Yamin, Akkuɓ, Sabtai, Hodiya, Maseya, Kelita, Azariya, Yozabad, Hanan, Pelaia na levitekai e zi gaglai midini ɗûwiiɗi ɗai. Ɗai e hini amai midini eziɗi sa sa.

⁸E ŋi maktuɓ na wiini ɗû na wiini Alaw edi gaglai gaini hangal hangal; e zi gaglai midini lai kapai ɗif paŋ a ɵina ɗû n’a na ŋa edi.

⁹Won hlai n’e ɵini seŋ na warni maktuɓ na wiini ɗû hanɗa, ɗai paŋ e tûwi. Nɵa Nahamiyas na Lawan ɗa, Esdras na pai zi ɓaka, na sɗa ɗû gara lai gaiɗi levitekai n’e zi gaglai wiiɗi ɗai e miɗiɗi: mefeŋ hanɗa a wiini Epiɗ-ɗai Alaw na wiiki, ki simni war kwimi kai, ki tûwi kaalai.

¹⁰Esdras a miɗiɗi: Hili aha, ki simi simi na pɗamai, ki si wala zi ci na pɗamai, ki siɗi simi wiiɗi nagai n’e di wala kai buri mefeŋ hanɗa a wiini EPIƊ-ƊAI na wiimu. Ki simni war kwimi kai buri firiyi na war EPIƊ-ƊAI hanɗa a gadai na wiiki.

¹¹Levitkai e wiyiɗi hangalɗi ɗai azumai, e miɗi: Ki wiyi hangalki siki, ki tûwi kai buri mefeŋ hanɗa a wiini EPIƊ-ƊAI, ki simni war kwimi kai.

¹²Nɵa ɗai paŋ e wiyi aha aŋ simi, aŋ ci, e siɗi simi wiiɗi nagai n’e di kai ɗe lai; e siŋki firyiɗi n’abai ɗa edi, buri e ɵini seŋ n’e hitriŋɗisi.

¹³War mefeŋ n’ag'aŋ sulu, tamai fuŋ paŋ na war Izrayel, paakai zi ɓaka gaiɗi Levitkai, e tipisi sini Esdras ɗif na sɗa ɗû gara kapai e fifiki ezini seŋ n’aŋ war maktuɓ zi ɗû.

¹⁴E niviŋ gaini ɗû war gadai n’EPIƊ-ƊAI a siŋni war tini Musus ɓa: Aliɗi Izrayel aga e simni war dugo war mefeŋ na wiiɗi fet na war tile n’ag'aŋ muguzak.

¹⁵Aga e si labar hanɗa edi war fuŋ n’abakai paŋ, war Yeruzalem lai maini nɵa: Hili amai midiɗi huwuŋ, piyisi ɵimani luwuŋ Olive zi pi gaini ɵimani luwuŋ olive na basga; ɵimani luwuŋ mirte, ɵimani hura gaini luwuŋ zi gûɗi kapai ki zi dugo gaini maini n’a ɗo nɵa.

¹⁶Nɵa aliɗi Izrayel e hili e piyisi ɵimani luwoŋai n’e zizini dugokai gaini. Zamai e pi dugoɗi amai midini dalamɗi, zamai aha war pakataiɗi dama, na zamai aha war pakataini tempel war baŋa n’a na mini magala na wiini yem, war baŋa na mini magalani Efrayim lai.

¹⁷Sini mefeŋ na wiini Yosva n’ahini Nun par haa sini mefeŋ ni, ɗai n’e diŋgisi edi paŋ, nagai n’e wiyisi edi war bege par e zizini dugo n’e simni woni, haa sini mefeŋ hanɗa ta aliɗi e ziti fet hanɗa duk kai. Wala hanɗa a siɗi firiyi n’abai gara.

¹⁸Mefeŋ paŋ e ŋi maktuɓ na wiini ɗû na wiini Alaw; sini mefeŋ n’avut par haa sini n’asakal ta. Fet te za mefeŋ muguzak, war mefeŋ n’ag'aŋ mitwis mi vidi gaini diŋgi n’abai maini na gadai a ɗiyaŋ nɵa.