Read Mousgoum Nahamiyas 9 Bible Online

Nahamiyas 9 - Mousgoum bible

Nahamiyas 9

¹War mefeŋ n’ag'aŋ caaɓa pi puɗu na wiini tile hanɗa, aliɗi Izrayel paŋ e wi sapa zi tuwi siɗi, e bûbli siɗi arni alogodo, e diŋgi burini tikini sai.

²Izrayel zi wi paŋ e yimi siɗi edi siɗi morkokai par, e himi midini tuwur na wiiɗi gaini meefeŋ na wiiɗi tamaiɗi paŋ lai.

³E ɗiyi amai war balamɗi sa sa, e ŋiɗi maktuɓ na wiini ɗû na wiini Epiɗ-ɗai Alaw na wiiɗi haa ler hu; asakal par e himi tuwurɗi edi, e hûrgi azmai wuzani Epiɗ-ɗai Alaw na wiiɗi haa ler hu lai.

⁴Yosva, Bani, Kadmiyel, Savaniya, Bunni, Serebiya, Bani gaini Kenani na levitekai e ɗiyi amai midini hlai na wiiɗi, e ɗûûli gaini wulaɗi amai sini Epiɗ-ɗai Alaw na wiiɗi.

⁵Asakal par, Yosva, Kadmiyel, Bani, Hasabniya, Serebiya, Hodiya, Sebaniya gaini Petahiya lai na levitekai e miɗiɗi: Fiki amai! si kol sini Epiɗ-ɗai Alaw na wiiki haa hlai n’a vada kai, n’a vada kai. EPIƊ-ƊAI a zuva ɓa ɗai e kûli yikuku n’abai n’a suwa ɓiki gaini kol paŋ lai.

⁶EPIƊ-ƊAI ku tuku, ku tuku ktai pal na ku za hlai n’amai ku tuku; hlai n’a na haa amai gaini wazagai na warni paŋ, yai gaini wazagai na warɗi paŋ; yem gaini wazagai n’arni paŋ ku sini suŋfa warni ku tuku, wazagai zi spak n’arbani hlai n’amai a hurga azumai wuzaku.

⁷Ku vara Abram ku tuku, ku yimaŋsi edi war Ur midini afti na Babilon par ku tuku; ku sini yiki ɓa Abraham, ku tuku.

⁸Ku talaŋ a na arku ɗikat, ku za bonu gaini, ku zini ha ɓa aga ku sini afti na wiiɗi Kananiyakai, na wiiɗi Hititekai, na wiiɗi Amoritekai, na wiiɗi Perizitekai, na wiiɗi Yebuzitekai gaini na wiiɗi Girgazitekai aŋ siŋɗi wiiɗi pinzibani, ku va seŋku amai ta, buri tuku ku jre.

⁹Tuku ku tala girɗi tamaiyi aha war Egipte, ku ɵina tuwiɗi agoɗom wulani yem-ra na mekele.

¹⁰Tuku ku za wazagai zi siŋki, gaini zi hiila lai sini Farawon pai n’Egipte, siɗi ɗai zi sda n’ahani paŋ, siɗi ɗai na midini aftini paŋ lai, buri tuku ku sɗa ya ɓa war kûlini-si na wiiɗi, e siɗiɗi gir wiiɗi tamaiyi, nɵa ku hina yikuku a wa maini na mi tiliŋ girna na nɵa.

¹¹Ku ɓasa yem-ra n’abai wuzaɗi, e vigi midini hlai na hûleŋ, nagai n’e tikisi futi piɗi, ku biɗi agoɗom war yem-ra n’abai maini ahi-fuŋ n’e biliŋ arni yem na hulum nɵa.

¹²Girvudi tuku ku ɵa wuzaɗi gaini ɗugul war duvuk ku ɵa wuzaɗi gaini afu lai war futi n’e hili warɗi.

¹³Ku niyasi azumai midiɗi huwuŋ Sinai, amai war hlai n’amai par, ku miɗiɗisi, ku ɗiyiɗi gadai na war futini, gadai zi ɗû na jre, gaini gadai zi ɗû na pɗamai lai.

¹⁴Ku siŋkiɗi midini Sabbatku na sɗik, ku siɗi gadai zi ɗû zamai zamai na war ɗû na wiiku par gaini Musus ɵeŋ na wiiku.

¹⁵War wiyamai, ku siɗi simi n’amai par, war saiɗi ku siɗi yem sini huwuŋ par, ku miɗiɗi buri e hilisi e tiki afti, na ku yima tuku amai ku ha wala muku buri ku siŋɗi ɗa.

¹⁶Amma nagai gaiɗi tamaiyi e niyi war kûlini-si, e zi hiriŋ, e ɵini pini gadai zi ɗû na ku siŋɗi kai.

¹⁷E diri e ɵini kai, e hini midiɗi a kɵa gaini wazagai zi hiila na ku zaŋ buriɗi kai. E zi hiriŋ war fikiɗi n’amai, e rgi warɗi, buri e wiyi war begeɗi war Egipte. Amma tuku k’Alaw na ku haaza tuwurɗi nagai n’e tûwi suku edi, k’Alaw na pɗem, zi hiinini haw, na ku za hiy gop kai, pɗemku abai gara, ku hiniɗi edi kai.

¹⁸Koo won hlai n’e yûri ahi ɵeŋ zi kawai, n’e miɗi lai ɓa: Alaw na wiyi n’a kûrɗiyisi edi war Egipte par an na, Won hlai n’e zi maini nɵa ɗa, e zi meefeŋ suku abai gara.

¹⁹Paŋ ktai pini yumku n’abai ku hiniɗi edi war basga kai, ɗugul a ɵa wuzaɗi war girvudi, afu war duvuk lai, kapai a za gaglai warɗi futi n’e ɗa hili warɗi.

²⁰Tuku ku siɗi sezeku na pɗem, kapai e zi ɓraw arbani pɗem gaini meefeŋ, ku siɗi mana aŋ simi, ku siɗi yem aŋ si lai.

²¹Buza puɗu, ku tika hangalku siɗi, zala ktai maa a sûwiɗi kai, sapaɗi a ŋirwa kai, eziɗi a hitila kaalai.

²²Ku siɗi paakai zamai gaiɗi ɗai war tiɗi, ku siɗi afti na ɵimani lai. E tiki afti na wiini Sihon pai na Hesbon gaini afti na wiini Og pai na Basan lai.

²³Ku sisiɗiɗi aliɗi viya, maini meeɵek n’arbani hlai n’amai nɵa, ku kiɗisi midini afti na ku miɗiɗi wiiɗi tamaiɗi buri e hili e tikiŋ aŋ wiiɗi.

²⁴Aliɗi e niyi a ha warni, e tiki afti ni lai. Ku hiniɗi aŋ rɗi amai midiɗi Kananiyakai war fuŋ hanɗa; ku siɗi paakaiɗi gaiɗi ɗai na midini afti ni lai war tiɗi, aŋ zi siɗi maini n’e diri nɵa.

²⁵Nagai e mili fuŋ n’abakai na gaini ɵaga sini; gaini afti z'alam, e mili dalam na gaini vi gaini wazagai na pinzibani kiini kiini, kalaŋai zi yem; vuwai na wiini luwuŋ zi vin, vuwai na wiini luwuŋ olive, gaini luwoŋai zamai zi wi ali zi simi viya lai. E simi e vi, e liki ca ca, e simni war muluk, pini pɗemku n’abai.

²⁶Amma paŋ ktai e ɵini muku kai, e fiki amai suku gaini fiki, e bili ɗû na wiiku edi duɓaɗi, e fiɗiɗi ɗai na mini Alaw n’e ɗa gidiɗi buri e wiyisi suku ɗa, e zi meefeŋ suku abai gara.

²⁷Nɵa ku hiniɗi war tiɗi gawɗi, e ziɗi gir. War mefeŋɗi zi gir e tûwi suku, amai war hlai n’amai par tuku ku ɵina tûwiiɗi, pini hiinini haw na warku ku siɗi gaŋgalaŋai n’e kûrɗisi edi war tiɗi gawɗi par.

²⁸Amma won hlai n’e nivi ɵeɗ agwi li, e wiyi kaa aŋ meefeŋ suku ɗaai; tuku ku hiniɗi war tiɗi gawɗi e ziɗi gir viya, e wiyi e tûwi suku pra, tuku war hlai n’amai par ku ɵina tuwiɗi; pini hiinini haw n’aŋ warku ku piliɗi edi azi viya.

²⁹Ku gidiɗi azi viya buri e wiyisi sini ɗû na wiiku, amma nagai e zi pini agulɗi na gdaŋ; e ɵini pini gadaiku zi ɗû kai, e zi tuwur sini gadaiku na ku siŋɗi na kadai tiɓ ɗif a vaŋ amai kapai a nava suŋfa gaini. E tiki ɵimani tek tek; e hiriŋi hiriŋ e diri e ɵini kai sam.

³⁰Ku libiɗi maini nɵa buza viya; ku gidiɗi gaini seze na wiiku, gaiɗi ɗaiku na mini Alaw, amma e diri e ɵini kai; ɵa ku siɗi tiɗi ɗai na midini afti zamai zamai;

³¹Pini hiinini haw n’aŋ warku, ku hiniɗi aŋ vidi edi gamai kai, ku hiniɗi edi kaalai buri tuku k’Alaw na pɗem zi yum.

³²Tiyana Alaw na wiyi, Alaw n’abai zi spak na dawaŋ kai, na ku giɗima bonuku na ku zaŋ gaiyi war jre; ku tala gir n’a na siyi, siɗi paakaiyi, siɗi n’abakaiyi n’e ɵi wuze, siɗi paakaiyi zi ɓaka, siɗi ɗaiyi na mini Alaw, siɗi tamaiyi, siɗi ɗaiku paŋ lai, sini mefeŋ na wiiɗi paakai n’Asiriya par haa girna aŋ wala n’agwi kai

³³Tuku war wazagai n’a ziyi paŋ ɗa, wiiku a jre, buri ku za siyi war jre, amma tiyi ɗa, mi zi ɗa a meefeŋ.

³⁴Paakaiyi lai, ɗai n’abakai n’e ɵi wuze lai, paakaiyi zi ɓaka lai, gaiɗi tamaiyi lai, e zi pini ɗû na wiiku kai, e tiki hangalɗi sini gadai zi ɗû kai, sini zaida na ku ziŋɗi azi viya kaalai.

³⁵Nagai war ŋiɗi zi pai, war der na viya na ku saŋ siɗi midini afti na bruk z' alam lai na ku kiɗi warni e zi sdaku kai, e hini sdaɗi na maafanai edi kaalai.

³⁶Tala haw le, girna mi ɗi bagakai midini afti na ku siŋɗi wiiɗi tamaiyi kapai e simi seyem na wiini afti gaini der na pɗamai paŋ lai, amma mi ɗi na mi ɗi bagakaiku koo.

³⁷Der na viya hanɗa a bunda aŋ wiiɗi paakai na ku miliɗi midiyi burini tuwuryi; e ŋi midiyi, tiyi gaini faraiyi maini n’e diri nɵa; tiyana mi ɗi war gir n’abai.