Read Mousgoum Ester 1 Bible Online

Ester 1 - Mousgoum bible

Ester 1

¹Wala hanɗa a za war mefeŋ na wiini pai Serkises. Serkises ni ɗa a ŋa midiɗi Lawanai miya gaini caaɓa pi muguzak, sini afti na Indiya par haa sini afti na Etiyopiya ta.

²War sarti ni ɗa a sumna midini paramaini zi pai war kapital na Sûz,

³War buza n’ag'aŋ hu n’aŋ warɗi pai, a ziti fet n’amai buriɗi ŋarakaini gaiɗi ɗaini zi sda paŋ. Askarai n’abakai na wiiɗi Mede gaiɗi Persus, ɗai zi spak gaiɗi lawanai na midini provens par paŋ e tipisi miɗi fet hanɗa.

⁴Fet hanɗa te za mefeŋ miya gaini mitwis, pai a sinkiti abaiɗi paini gaini faraini edi war mefeŋ hanɗa.

⁵Asakalni mefeŋ hanɗa, pai a ziti fet n’amai buriɗi ɗai na war kapital na Sûz ɗe paŋ, ɗai zi farai gaiɗi na murgakai paŋ e nivi yiki miɗi fet hanɗa, fet te za mefeŋ muguzak aha war dalam na wiini pai dama.

⁶Sapa zi leŋ zamai muɗukwi, zamai mekele cih cih gaini rgi amai gaini sogom na muɗkwi na mekele lai sini adoŋo z'arzaŋ n’a na gaini diɓigi sini garai zi marbre, li n’e simni midini aŋ simi zi or gaini zi arzaŋ a nafu midini hlai n’e ɵirɓiŋ gaini ali-fuŋ n’a na gaŋ kai, na zamai bogurokai, na zamai muɗukokai, na zamai a luma pre pre, na zamai murɗalai lai.

⁷Ɗai e ci vin ɗa war kop zi or, na zizinini ɗa kiini kiini kiini, vin na pai a saŋ aŋ ci ɗa viyani a viya kai, maini na pai a firiyaŋ ɵa.

⁸Pai a sa miɗi wiiɗi ɗaini zi sda buri e hini ɗif paŋ a ca maini n’a dara nɵa, a ca wala n’a daraŋ lai.

⁹Vasti na munini pai ɗa te ziti fet n’amai buriɗi falakai lai, aha war dalam na wiini pai Serkises dama lai.

¹⁰War mefeŋ n’ag'aŋ muguzak ɗa, pai, vin n’a caŋ ɗa a vini firyini amai, a yikiɗi ɗaini na kɓarai na muguzak: Mehuman, Bizta, Harbona, Bigta, Abagta, Zetar gaini Karkas lai n’e ɗa war sdani, a miɗiɗi,

¹¹hili kitisi Vasti na munini pai n’amlai mini wuzani pai wonna gaini kadamul zi pai midiɗi gaini fiɗifaɗ, kapai mu siŋka zufɗi edi wiiɗi ɗai, wiiɗi ŋarakai lai, buri te wa zufi gara.

¹²Amma Vasti na munini pai n’amlai mini te dara te halasi pini miɗi na pai a miɗiŋɗi miɗi ɗai na kɓarai kai. Nɵa pai agulni te sawa, a za hiy ta,

¹³Pai a tipiɗi nagai n’e sini gadai ɗa, a zilbiɗi: Buri seŋ n’a za ahani pai paŋ ɗa ɗai n’e siɗi gadai zi ɗû gara gaiɗi nagai n’e siɗi gadaini afti ɗa e mili arɗi woni haw.

¹⁴E ɗifu ɗa e ɗi miɗi: Karsena, Setar, Admata, Meres, Marsena gaini Memuka ŋarakai na muguzak na wiiɗi Mede gaiɗi Persus, n’e kiɗi e hili aha sini pai, e ɗi ɗai n’e ɗa midini sda n’abakai na warɗi pai ɗa.

¹⁵Nɵa, pai a miɗiɗi: Tiyana pini gadai ɗa, Vasti na te ɵina pini miɗi na pai a miɗiŋɗi miɗi ɗai na kɓarai kai na ɗa, mu zutumu maɵa ɗa?

¹⁶Nɵa Memukan a tika seŋ wuzani pai gaiɗi ŋarakai a muɗa: Jaamus, wala na Vasti te zaŋ na ɗa, a yewere na wiini pai kiini kai, a yewere na wiiɗi ŋarakai gaiɗi ɗai na war provens na ku ŋiyi paŋ.

¹⁷Buri ɓa falakai, won hlai n’e ɵini seŋ hanɗa li ɗa, aga e yimiŋ, e ɵini miɗi maɵagaiɗi kir kai, aga e miɗi lai ɓa, pai Serkises a miɗiɗi wiiɗi Vasti buri te halaɗi sini maa te hala kai,

¹⁸girna par, falakaiɗi ŋarakai na Persus gaiɗi na Mede n’e ɵini labarni wala na Vasti te zaŋ na ɗa, aga e wiyi seŋ wiiɗi ŋarakai na wiini pai mai hanɗa ɵa lai. Miisi na maini nɵa ɗa a glasi ɗa a hiy.

¹⁹Jaamus, na ɓa, seŋ na mu muɗaŋ na ɗa, a tala arku pɗem ɗa, a pɗem ɓa ku ɗiya gadai zaw, n’aga niya war gadai na wiiɗi Persus gaiɗi Mede, na ɗif a kiɗa a bundaŋ kai, ɓa: Vasti ɗa, aga te halasi wuzaku kir kai, hormoɗi zi munini pai n’amlai mini ɗa, aga a sa siɗi maiɗi zamai, na te sûwiti.

²⁰Won hlai na gadai hanɗa a wa li edi midini aftini paŋ ɗa, falakai gaini hlaiɗi paŋ aga e si hormo wiiɗi maɵagaiɗi, koo ɓa a na murga, koo ɓa a zi farai. Gadai hanɗa a gadai n’abai.

²¹Seŋ hanɗa a tala arni pai gaiɗi ŋarakaini paŋ pɗem, nɵa pai a za pini miɗi na wiini Memukan ɗa.

²²Pai a ɵina letre edi midini provens na warɗi paini paŋ, siɗi provens paŋ a ɗo war ɗû na wiiɗi, war meme na wiiɗi lai ɓa: Wus paŋ ɗa, a pai midini dalamni, a muɗa ɗa a meme na wiiɗi tamaini lai.