Read Mousgoum Niyi n’edi 10 Bible Online

Niyi n’edi 10 - Mousgoum bible

Niyi n’edi 10

¹EPIƊ-ƊAI a miɗini wiini Musus: Hala sini Faraw, buri mu diŋriti agulni gaiɗi agulɗi ŋarakaini muta, kapai mu za wazagai zi siŋki n’abakai arbaɗi,

²kapai tuku lai ku siɗi labar hanɗa wiiɗi aliku, wiiɗi tiyakaiku, ku virniɗi wala na mu zaŋ siɗi ɗai n’Egipte gaini wazagai zi siŋki na mu zaŋ midini aftiɗi, kapai ki siɗi ɓa, Ta m’EPIƊ-ƊAI.

³Musus gaini Aaron e hili sini Faraw e miɗini: Epiɗ-ɗai Alaw na wiiɗi Hebrekai, aga ku hosa suku azumai wuza kai ɵa haa kaswa ta ɗa? Hiniɗi ɗaiŋa e hili aŋ zi ɵeŋŋa.

⁴Na ɓa ku dara aŋ hiniɗi kai, dawai tar aga mu hinasi ayuwi midini aftiku.

⁵Aga a daga midini afti haa ɗif a kiɗa aŋ tala afti ɗa kai, a luma wazagai n’a hina pini wutiŋ ɗa paŋ edi kafa, gaini luwoŋai n’a diya edi war basga ɗa lai.

⁶Aga a va dalamku, dalamɗi ŋarakaiku gaini dalamɗi ɗai n’Egipte ɗa paŋ lai. Wala hanɗa, tamaiku gaiɗi tiyakaiku e tiliŋ kaa duk kai, war wiiɗi par haa girna. Musus a fakasi sini Faraw par a niyasi.

⁷Ŋarakai na wiini Faraw e miɗini: Kapai ɗif hanɗa sini aŋ kasi gir mudumu ɵa haa kaswa ta ɗa? Hiniɗi ɗai hanɗa e hili aŋ zi ɵeŋni Epiɗ-ɗai Alaw na wiyi, ku sɗa ɓa Egipte te ɓa na bi nɵa, ku sɗa kai ɗi?

⁸E yikisi Musus gaini Aaron wuzani Faraw, Faraw a miɗiɗi: Hili aŋ zi ɵeŋ na wiini Epiɗ-ɗai Alaw na wiiki ɗa. Tiyana aga e hili e ɗi miɗi asiya ɗa?

⁹Musus a wiyini seŋ: Aga mi hili gaini hlaiyi paŋ: N'agogoi gaiɗi na walakai, maɵagai gaiɗi falakai, gaini adumaiyi gaini haakaiyi, gaini ɵaakaiyi paŋ lai, buri mi diri mi ziti fet n’amai aŋ sini kol wiini EPIƊ-ƊAI.

¹⁰Faraw a ziɗi yewere maini nɵa: Mu hiniki li ɓa ki hili, tiki gaiɗi falakaiki gaiɗi aliki paŋ ɗa, EPIƊ-ƊAI a za gaiki kir ka, tiki mal ki siɗi ɓa, hiiniki ɗa a meefeŋ.

¹¹Aga a za ɵa kai, ki hili tiki na maɵagai ɗa ta ha, hili zi ɵeŋ na wiini EPIƊ-ƊAI ɗa, buri ɓa a wala na ki ɗa piyiŋ ɗa. E birgiɗisi ahani Faraw par.

¹²EPIƊ-ƊAI a miɗini Musus: Mu miɗiti tuku midini afti n’Egipte aŋ yikasi ayuwi, kapai a niyasi amai midini, a luma sugoi paŋ n’a hina ka pini wutiŋ ɗa.

¹³Musus a yimiti amaraŋaini amai midini afti n’Egipte, EPIƊ-ƊAI a hinasi smer na piɗi futi na dawai par aŋ ka midiɗi Egipte, a yiva, a fana. Gorof par ɗa, smer hanɗa a kasi ayuwi.

¹⁴Ayuwi hanɗa a ɗufla amai midini afti Egipte, a sumna war hlai paŋ lai. Ayuwi na viya maini hanɗa ɵa ɗa, haa ɗipar ɗif a talaŋ ka duk kai, aga a za kir kaalai.

¹⁵A daga midini afti paŋ haa hlai paŋ a tala murɗek arku a tala afti kai. A luma sugoi na midini afti paŋ gaini alini luwoŋai n’a hina pini wutiŋ ɗa. Midini afti n’Egipte paŋ, wala zi gûɗi ktai ma a hina kai, sugoi kaalai, ɵimani luwuŋ kaalai.

¹⁶Faraw a ɵina pini Musus gaini Aaron witaw aŋ yikiɗisi a muɗa: Mu za tuwur sini Epiɗ-ɗai Alaw na wiiki, siki tiki lai.

¹⁷Tiyana pra, ki zi barka ki siŋa ni burini meefeŋŋa, ki siiwi Epiɗ-ɗai Alaw na wiiki kapai a tika gir hanɗa edi mada par ɗaw.

¹⁸Musus a niyasi ahani Faraw par, a siiwa EPIƊ-ƊAI.

¹⁹EPIƊ-ƊAI a bunda smer ɗa aŋ smer na gdaŋ na piɗi futi na koskoi par a ayuwi ɗa paŋ a kaŋ agoɗom war ra na mekele. Ayuwi ktai kaw a hina ka midini afti n’Egipte ɗa kai.

²⁰Amma EPIƊ-ƊAI a diŋriti agulni Faraw ɗa, a kiɗa a hiniɗi aliɗi Izrayel aŋ hili kai.

²¹EPIƊ-ƊAI a miɗini wiini Musus: Yimiti tuku amai, kapai gegeŋ a za midini afti n’Egipte ɗa paŋ. Hanɗa a gegeŋ na tikiɗim na ɗif a kiɗa a tika tini sini.

²²Musus a yimiti tini amai, nɵa gegeŋ na tekeɗim a za midini afti n’Egipte haa mefeŋ hu.

²³War mefeŋ na hu hanɗa, ɗai n’Egipte ɗa, ɗif a sɗa maini kai, ɗif a niya anene kaalai. Amma hlai n’aliɗi Izrayel e ɗa warni ɗa, hlai paŋ gaglai.

²⁴Faraw a yika Musus a miɗini: Hili zi ɵeŋni EPIƊ-ƊAI ɗa, falakaiki gaiɗi aliki e hili wiiɗi gaiki lai; amma adumaiki, haakaiki gaini ɵaakaiki lai, a hina ka woni na.

²⁵Musus a wiyini seŋ: A sɗa aŋ kai, aga ku siyi wazagai na mi zi ɓaka gaini, gaini na mi zi ɓaka zi yi wiini Epiɗ-ɗai Alaw gaini lai ku tuku mal.

²⁶Faraiyi paŋ aga a hala gaiyi, ktai ma aga a hina ka kai, buri arbani par ɗa aga mi yimi mi zi ɓaka gaini wiini Epiɗ-ɗai Alaw na wiyi. Tiyi ma n’aga mi yimiŋ buri mi zi ɓaka wiini EPIƊ-ƊAI gaini wuzani hlai na mi cû woni, mi sɗiŋ kai.

²⁷Amma EPIƊ-ƊAI a diŋriti agulni faraw pra, a hiniɗi aliɗi Izrayel aŋ hili kai.

²⁸Faraw a miɗini wiini Musus: Faka hala, mu tuluku wuzani ara kir kai, yuvai na mu suɗuku li ahaya na ɗa, a mriku.

²⁹Musus a wiyini seŋ: Aga mu wayasi suku kir kai, maini na ku muɗaŋ na ɗa ɵa.