Read Mousgoum Niyi n’edi 11 Bible Online

Niyi n’edi 11 - Mousgoum bible

Niyi n’edi 11

¹EPIƊ-ƊAI a miɗini Musus: Aga mu kasi gir zamai ktai midini Faraw gaiɗi ɗai n’Egipte, a gir n’asakal tar. Asakal hanɗa par aga a hiniki aŋ hili woni na par, aga a hiniki aŋ hili gaini hangalki kai, a birgiki ma gaini birgi gamai.

²Ku miɗiɗi wiiɗi aliɗi Izrayel ɓa: Ɗif paŋ a zilba wazagai zi arzaŋ zaw zi or tini maini n’aŋ ɵimani, muni paŋ te zilba tiɗi maiɗi na ɵimani lai.

³EPIƊ-ƊAI a hiniɗi aliɗi Izrayel aŋ nivi yum arɗi ɗai n’Egipte. Musus a bunda a ɗif n’abai na ɗai paŋ e sini hormo midini afti n’Egipte, siɗi ŋarakaini Faraw par haa siɗi ɗai na zamai paŋ lai.

⁴Musus a miɗini wiini Faraw: EPIƊ-ƊAI a na muɗa maini nɵa: War duvuk n’arba aga mu paya warɗi Egipte.

⁵Ahi n’a wa avut midini afti n’Egipte paŋ aga a mra. Sini ahi n’avut na wiini Faraw n’aga a sumna midiɗi paramaini zi pai par, haa sini ahi n’avut na wiiɗi bagai na te sara algama, gaini ahi n’avut paŋ na wiini farai ɗa.

⁶Midini afti n’Egipte paŋ tuwi n’abai aga a za, a tuwi n’a za ka duk kai, aga a za pra kaalai.

⁷Amma ahaɗi aliɗi Izrayel ɗa, hirge tekeɗeɗi aga zuguda ɗif kai, farai kaalai, kapai a yima miɗiki ɓa Ta EPIƊ-ƊAI mu za siɗi ɗai n’Egipte kiiɗi, siɗi aliɗi Izrayel ɗa kiiɗi lai.

⁸Musus a muɗa: War mefeŋni ɗa, ŋarakaiku na e ɗi na ɗa, aga e hilisi e hûrgi azumai wuza, aŋ miɗiŋa ɓa: Yima suku edi midini aftiyi par kaai, tuku gaiɗi ɗai na puku ɗa. Nɵa aga mu yima sa edi tar lai. Musus a fakasi ahani Faraw par gaini hiy n’abai.

⁹EPIƊ-ƊAI a miɗini wiini Musus: Faraw a dara a yima seŋki na ɗa ɓa kapai mu za wazagai zi siŋki n’abakai na kiini kiini midini afti n’Egipte.

¹⁰Musus gaini Aaron e zi wazagai zi siŋki n’abakai viya wuzani arni Faraw, amma EPIƊ-ƊAI a diŋriti agulni Faraw, a hiniɗi aliɗi Izrayel aŋ hili edi midini aftini par kai.