Read Mousgoum Niyi n’edi 12 Bible Online

Niyi n’edi 12 - Mousgoum bible

Niyi n’edi 12

¹EPIƊ-ƊAI a miɗini wiini Musus gaini Aaron ha war Egipte maini nɵa:

²Tile hanɗa aga a bunda buriki a tile n’avut n’arbani marni, api zi tiki na wiini buza na hehe.

³Hili ki miɗiɗi wiiɗi aliɗi Izrayel paŋ ɓa: Mefeŋ n’ag'aŋ doogo na wiini tile hanɗa, ɗif paŋ aga a fuɗa ahini adime zaw ahi hek miɗi pakatai paŋ, mini fuŋ paŋ lai.

⁴Na ɓa ɗai na war pakatai e ɗa viya buri e limi adime ta kai ɗa, e diŋgi gaiɗi nagai na ɵimani gobi tar, sini pɵiɗi ɗa e piyi wala n’a kiɗa simiɗi ta.

⁵Wala n’aga ki fiɗiŋ ɗa, a wala na tirki sini kai, a na wus, na buzani ktai, a ahini adime zaw ahi hek.

⁶Aga ki biyi gaini haa sini mefeŋ n’ag'aŋ doogo pi puɗu na wiini tile hanɗa. Koskoi na futi te nawa sek ɗa, vokɗi aliɗi Izrayel paŋ e fiɗi wala n’e viriŋ ɗa.

⁷Ki yimi felni ɗa, ki girdiŋ sini luwuŋ na sulu na ɵimani porte gaini n’amai midini lai mini dalam paŋ n’aga ki simi simi hanɗa woni.

⁸Duvuk ni ɗa e limi neŋ ɗa, e viŋgiŋ sini afu, e limiŋ gaini peŋ na is arni kai gaini sugoi na ɗewek lai.

⁹Ki limiŋ hirnaŋ kai, ki diviŋ kaalai, amma sai gaini viŋgi sini afu, humokni lai, ɓaɓarani lai, wazagai na warni paŋ lai.

¹⁰Ki hini wala a fana amai piki kai, n’a hina li piki ɗa, gorof par ki yiŋ edi.

¹¹Aga ki simi sek ɗa, wuzaki gaini rgi amai ɓak ɓak, harabak aziki ca ca, amaraŋa tiki ɗaw ɗaw lai. Ki simiŋ kokolai tar tar. Hanɗa te fet na wiini Paska na wiini EPIƊ-ƊAI.

¹²Aga mu vuga war Egipte paŋ war duvuk hanɗa, aga mu fiɗiɗi ali n’e wii avut midini afti n’Egipte ɗa paŋ edi, siɗi ɗai par haa sini farai. Aga mu ziɗi sariya wiiɗi alawai na zamai na war Egipte paŋ. EPIƊ-ƊAI mu Ta.

¹³Fel ɗa aga a za aŋ wala zi siŋki war dalam paŋ na ki ɗa warni, won hlai na mu tala fel li, mu vuga amai ɗaw. Nɵa, hlai n’aga mu tûûriti Egipte edi ɗa, gir hanɗa aga a za siki tiki kai.

¹⁴Mefeŋ hanɗa miɗiki aga a wula gaini kai, aga ki ziti fet n’amai buriya, a gadai n’aga a bunda kai, pinzibaki aga a za hanɗa kûreɗ-kûreɗ.

¹⁵EPIƊ-ƊAI a muɗa: Aga ki limi peŋ na gaini is arni kai haa mefeŋ muguzak, Mefeŋ n’avut tar, ki pûkû is n’a na aha war dalamki edi. Ɗif paŋ n’a luma li peŋ na gaini is arni, sini mefeŋ n’avut par haa sini n’ag'aŋ muguzak ta ɗa, aga a nava birgi n’edi arbaɗi aliɗi Izrayel par.

¹⁶War mefeŋ n’avut gaini n’ag'aŋ muguzak, aga ki zi diŋgi n’abai, mefeŋ ni ɗa, ɗif a za sda warni kai, sai a simi na ki diŋ miki tar.

¹⁷Aga ki ziti fet na wiini peŋ na gaini Is arni kai, buri a mefeŋ na mu miliɗisi ɗaiki edi midini afti n’Egipte par warni, aga ki hini miɗiki a wula gaini mefeŋ hanɗa kai, a gadai n’aga a bunda kai. Pinzibaki aga a za hanɗa kûreɗ-kûreɗ.

¹⁸Sini mefeŋ n’ag'aŋ doogo pi puɗu na wiini tile n’avut par, haa sini mefeŋ caaɓa pi ktai ta, koskoi koskoi paŋ, ki limi ɗa a peŋ gaini is arni kai.

¹⁹War mefeŋ na muguzak hanɗa, e nivi is aha war dalamni ɗif kai. Ɗif n’a luma peŋ na gaini is arni li, koo ɓa a morkoi, koo ɓa ɗif na Izrayel aga a nava birgi n’edi arbaɗi aliɗi Izrayel par.

²⁰Aga ki simi wala na gaini is arni kai. Hlai na ki simni warni paŋ, aga ki limi ɗa a peŋ na gaini is arni kai ɗa.

²¹Musus a tipiɗi n’abakai n’arbaɗi aliɗi Izrayel a miɗiɗi: Hili, ɗif paŋ a paya ahini adime gaini ahi hek buriɗi pakataini, a fuɗaŋ miɗi fet na wiini Paska ɗa.

²²Aga ki piyisi tini luwuŋ Izop, ki jiybiŋ arni fel na wiini wala na e fiɗiŋ n’aŋ warni dumba ɗa, ki girdiŋ sini luwuŋ na sulu na ɵimani porte gaini na amai par midini lai. Won hlai n’a za li ta ɗa, ɗif a tikasi ezini anene kai haa hlai a sɗasi edi.

²³Buri EPIƊ-ƊAI aga a vuga midini afti n’Egipte aŋ ziɗi gir wiiɗi ɗai. Nɵa won hlai n’a na vuga, na ɓa a tala li fel mini hlaiki aga a hinasi ni n’a ɓulka hlai a niya aha war dalamki kai.

²⁴Tiki gaiɗi aliki aga ki zi hanɗa haa kureɗ, a gadai buriki.

²⁵Won hlai na ki cû li aha midini afti n’EPIƊ-ƊAI a ɵina ha ɓa aga a siŋki ɗa, aga ki ziti fet hanɗa.

²⁶Na ɓa aliki e zilbiki li ɓa, fet hanɗa te siŋka midini a maɗi ɗa?

²⁷Aga ki wiyiɗi seŋ: A ɓaka na mi ziŋ wiini EPIƊ-ƊAI buriɗi fet na wiini Paska. Won hlai na tiyakaimu e ɗisi ka aha war Egipte ɗa, EPIƊ-ƊAI a fiɗiɗi ɗai n’Egipte ɗa edi, amma a vuga amai midini dalammu ɗaw, a kurɗasi pinzibaiɗi edi. Nɵa aliɗi Izrayel e pi kurnaiɗi azumai, e hûrgi azumai.

²⁸Asakal par aliɗi Izrayel e hili e zi maini n’EPIƊ-ƊAI a miɗiŋni wiini Musus gaini Aaron ɗa nɵa.

²⁹War duvuk n’arba, EPIƊ-ƊAI a fiɗiɗi ali n’e wii avut paŋ na midini afti n’Egipte edi, sini ahi n’a wa avut na wiini Faraw, n’aga a sumna midiɗi paramaini zi pai na wiini epini par, ha sini ahi n’avut na wiini ɗif n’aŋ war daŋgai ɗa ta, gaini ali n’a vut na wiini farai ɗa paŋ lai.

³⁰War duvuk ni ɗa, Faraw gaiɗi ŋarakaini paŋ, gaiɗi ɗai n’Egipte paŋ e fiki amai gaini tuwi n’abai. Miɗi magalai ktai na mri a za woɗi kai ɗa t'aŋ kai.

³¹Nɵa Faraw a ɵina pini Musus gaini Aaron war duvuk ni dama aŋ yikiɗisi, a miɗiɗi: Yimi siki edi, fiki midini aftiŋa par, tiki gaiɗi ɗai na Izrayel paŋ, hili zi ɵeŋni EPIƊ-ƊAI maini na ki miɗiŋ ɗa nɵa.

³²Hili gaini ɵaakaiki, gaini adumaiki gaini haakaiki lai maini na ki miɗiŋ ɗa nɵa, hili wiiki. Ki hilisi, ki siiwi Alaw buri a ɓakaŋa ta, ki hili wiiki.

³³Ɗai n’Egipte e gûzûɗi ɗai na Izrayel buri e hili edi midini aftɗi par witaw, e hiini ɓa e mri na ɗa a mri kafa.

³⁴Aliɗi Izrayel e mili avudi na gaini hiɗi n’e zi peŋ gaini n’a tika amai kai hai tiɗi, e miliŋ war wazagai n’e hiɗiŋ warni, e fiɗiŋ warni sapa, e libiŋ wulaɗi.

³⁵Aliɗi Izrayel e zi maini na Musus a miɗiŋɗi nɵa. E zilbi wazagai zi arzaŋ, zi or gaini sapakai lai tiɗi ɗai n’Egipte.

³⁶EPIƊ-ƊAI a hiniɗi aliɗi Izrayel aŋ nivi yum wuzani arɗi ɗai n’Egipte, e siɗi wazagai n’e zilbiŋ tiɗi paŋ. Gaini hanɗa e mili wazagai na wiiɗi ɗai n’Egipte ɗa.

³⁷Aliɗi Izrayel e fikiɗi war Ramses par a Sukot, ɗai n’e kiɗi e hitimi e zi gobi dubu miya ɵaara, falakai, aliyagoi gaiɗi ɗai na walakai ɗa, pɵaɗi arɗi kai.

³⁸Vok n’abai na wiiɗi ɗai na pinzibaɗi kiiɗi kiiɗi e hili gaiɗi, ɵaakaiɗi, adumaiɗi gaini haakaiɗi a fara n’abakai tiɓ tiɓ.

³⁹Avudi na gaini hiɗi n’e hilisi gaini aha war Egipte par e zi gamla na is arni kai gaini. Buri hlai n’e birgiɗisi aha war Egipte par avudiɗi a tika amai kai, pra e nivi hlai buri e zizini simi tiɗi burini morkoiɗi kai.

⁴⁰Aliɗi Izrayel e simni aha war Egipte buza miya puɗu gaini doogo doogo hu.

⁴¹War vidini buza na miya puɗu gaini doogo doogo hu ɗa, war mefeŋ ni ɗa, vok na wiiɗi ɗai na wiini EPIƊ-ƊAI a niyasi edi war Egipte par.

⁴²Duvuk n’EPIƊ-ƊAI a miliɗisi ɗaini edi war Egipte par, a fana karni blaŋ. Nɵa lai, aliɗi Izrayel paŋ, aga e fini karɗi war duvuk hanɗa kûreɗ-kûreɗ, buri te duvuk na wiini EPIƊ-ƊAI.

⁴³EPIƊ-ƊAI a miɗini pra wiini Musus gaini Aaron: Hanɗa a gadai na midiɗi fet na wiini Paska ɗa. Ɗif n’edi par a suma simi hanɗa kai.

⁴⁴Bege n’e wûriŋsi edi par a suma simi hanɗa sai na ɓa a ɵa gûrgle li.

⁴⁵Ɗif zi zak gaini ɗif n’a za sda burini vrak e simi simi hanɗa kai

⁴⁶Neŋ ɗa, e limiŋ ɗa amlai warɗi dilimi ktai ta, E kiŋsi anene kai, Keɵkeni wala n’e fiɗiŋ ɗa e hiɗiŋ kaalai.

⁴⁷Vok na wiiɗi aliɗi Izrayel paŋ ɗa a ziti fet hanɗa.

⁴⁸Na ɓa ɗif n’a zogosi edi par a na arbaki, na ɓa a dara a ziti fet na wiini Paska burini EPIƊ-ƊAI, sai maɵagai n’ahani paŋ e ɵi gûrgle kafa, asakal par a kiɗa a ziti fet gaiki maini ɗif na Izrayel nɵa. Ɗif n’a ɵa gûrgle kai ɗa futi burini aŋ suma kai.

⁴⁹Gadai hanɗa a na buriɗi aliɗi Izrayel, gaiɗi nagai n’edi par n’e hilisi e zi fuŋ gaiki lai.

⁵⁰Aliɗi Izrayel e zi maini nɵa, e zi kal kal maini n’EPIƊ-ƊAI a miɗiŋni wiini Musus gaini Aaron ɗa nɵa.

⁵¹War mefeŋ n’ag'aŋ doogo pi puɗu na wiini tile n’avut ɗa, EPIƊ-ƊAI a miliɗisi aliɗi Izrayel edi midini afti n’Egipte par pini vokɗi vokɗi.