Read Mousgoum Niyi n’edi 13 Bible Online

Niyi n’edi 13 - Mousgoum bible

Niyi n’edi 13

¹EPIƊ-ƊAI a miɗini wiini Musus:

²Ahi n’a wa avut war Izrayel paŋ, a na wiini ɗif, na wiini farai, ahi n’a wa avut paŋ a wiya.

³Musus a miɗiɗi wiiɗi ɗai maini nɵa: Hini miɗiki a kɵa gaini mefeŋ na ki niyisi edi war Egipte par, gaini afti na ki ɗisi ka midini aŋ bege ɗa. Buri EPIƊ-ƊAI a milikisi edi warni par gaini spak n’abai gara. Nɵa won hlai n’aga ki ziti fet hanɗa, peŋ na gaini is arni ɗa, ki limiŋ kai.

⁴Aga ki niyi edi war Egipte par girna, war sarti na wiini hiɗini seyem,

⁵Won hlai n’EPIƊ-ƊAI a kiki li midini aftiɗi Kananiyakai, Hittitekai, Amoritekai Hivitekai gaiɗi Yebuzitekai lai, afti n’a ha wala mini wiiɗi tiyakaiki buri a siŋki, na gaini emelni ami a ka warni ɗa aga, ki zi de hanɗa warni tili ni ɗa.

⁶Mefeŋ muguzak, ki limi peŋ na gaini si arni kai, mefeŋ n’ag'aŋ muguzak ɗa, ki ziti fet na burini EPIƊ-ƊAI.

⁷Mefeŋ na muguzak hanɗa paŋ, aga ki limi ɗa a peŋ na gaini is arni kai, wala zi simi na gaini is arni gaini is ɗa lai, a guna midini aftiki kai.

⁸Yuvai na wiiɗi fet hanɗa aga ki miɗiɗi wiiɗi aliki ɓa: Tiyi mi zi hanɗa buri ɓa EPIƊ-ƊAI a za yim siyi won hlai n’a miliyisi edi war Egipte par.

⁹Hanɗa aga a za buriku aŋ wala zi siŋki sini graŋku, aŋ wala n’a ɵuku muduku midini arku, kapai gadai na wiini EPIƊ-ƊAI a sumna war muku, buri ɓa EPIƊ-ƊAI a milikisi edi war Egipte par gaini spak n’abai gara.

¹⁰Buza buza paŋ ɗa, aga ki ziti fet hanɗa war mefeɓɗi n’aŋ gaini ɗiyi zaw ɗa.

¹¹Won hlai n’EPIƊ-ƊAI a kiki li midini afti na Kanaan, maini n’a ha wala mini wiiɗi tiyakaiki gaiki tiki lai ɓa aga a siŋki li lai ɗa,

¹²aga ki sini ahi n’a wa avut paŋ, na wiini ɗif, na wiini farai, wiini EPIƊ-ƊAI. Ahi na wus n’a wa avut paŋ a wiini EPIƊ-ƊAI.

¹³Na ɓa a ahini ablehö aga ki bindiŋ gaini ahini adime zaw ahini hek. Na ɓa ɵa kai ɗa, ki hiɗi wulani a mra edi. Aliki n’avut na maɵagai aga ki bindiɗi gaini farai.

¹⁴Na ɓa dawai sek, aliki e zilbiki li ɓa: Wala hanɗa e ziŋ ɵa tiɓ buri maɗi ɗa, aga ki wiyiɗi seŋ ɓa: EPIƊ-ƊAI a miliyisi edi war Egipte par, midini afti na mi ɗisi ka midini aŋ bege ɗa par gaini spak n’abai gara.

¹⁵Won hlai na Faraw a za hriŋ, a ɗiliyi a dara a siyi futi aŋ hiki kai, nɵa EPIƊ-ƊAI a fiɗiɗi ali na maɵagai n’e wii avut midini afti n’Egipte paŋ edi, sini aliɗi ɗai par haa sini alini farai ɗa ta, buri nɵa mu za ɓaka wiini EPIƊ-ƊAI gaini alini farai na maɵagai n’a wa avut ɗa buri hanɗa, amma ahi na wus n’avut na wiini ɗif paŋ a bundaŋ gaini farai.

¹⁶Hanɗa aga a za aŋ wala zi siŋki sini graŋku, aŋ wala n’a ɵuku muduku midini arku lai. Buri EPIƊ-ƊAI a miliyisi edi war Egipte par gaini spak n’abai gara.

¹⁷Won hlai na Faraw a hiniɗi aliɗi Izrayel aŋ hili li, Alaw a hiniɗi aŋ tikiti futi na midini aftiɗi Filistrekai ɗaw kai, paŋ ktai na te futi na te hala cir tar. Buri Alaw a hiina warni ɓa, won hlai ɗai e nivi li gaini hatam ɗa, aga e wiyisi aha war Egipte.

¹⁸Nɵa Alaw a vuga gaiɗi iɗisi edi war basga na kaɗataŋ.

¹⁹Musus a mula keɵkeni Yosef tini, buri Yosef a miɗiɗi wiiɗi tawalakaini ɓa: Alaw aga a zina piki, hiŋa wala miki ɓa: War mefeŋ ni ɗa aga ki mili keɵkeŋa woni na par tiki yaw lai.

²⁰Aliɗi Izrayel e fikisi war Sukot par, e hilisi e pi war Etam, edi mini basga na kaɗataŋ.

²¹EPIƊ-ƊAI a ɵa wuzaɗi, girvudi gaini ɗugul buri a siŋkitiɗi futi, war duvuk gaini ɗugul z'afu aŋ za gaglai wuzaɗi lai. Nɵa aliɗi Izrayel e kiɗi e hili girvudi lai, duvuk lai.

²²War girvudi ɗugul a hiniɗi kai, duvuk ɗugul z'afu a hiniɗi kaalai.