Read Mousgoum Niyi n’edi 14 Bible Online

Niyi n’edi 14 - Mousgoum bible

Niyi n’edi 14

¹EPIƊ-ƊAI a miɗini wiini Musus maini nɵa:

²Miɗiɗi wiiɗi aliɗi Izrayel buri e wiyisi e pi kaŋɗi wuzaɗi Pi-Hahirot, arbaɗi Migdol gaini yem-ra n’abai ɗa, hanɗa a hlai n’aga e pi kaŋki woni, wuzani Baal-Sefon gobi gaini yem-ra n’abai.

³Nɵa, Faraw aga a hiina miɗiki ɓa: Ki wili edi skeŋ, ki ɗa edi yaw aŋ giliŋi, basga kaɗataŋ a bunda buriki maini daŋgai nɵa.

⁴Aga mu diŋriti agulni Faraw ɗa, aga a tikaɗi futi piki. Aga mu siŋkiti abaiŋa edi sini Faraw gaiɗi askaraini paŋ, nɵa ɗai n’Egipte aga e siɗi ɓa EPIƊ-ƊAI muta. Aliɗi Izrayel e zi maini nɵa lai.

⁵E hilisi e miɗini wiini pai ɓa: Aliɗi Izrayel e hili ɗaw. Faraw gaiɗi ŋarakaini hiiniɗi a bunda e miɗi: Aliɗi Izrayel ɗa e ɗi bagakaimu, mu hunuɗumu aŋ hili tiɓ ɗa, mu zumu ɵa ɗa a maɗa.

⁶Faraw a zizina saretni zi gaw, a miliɗi ɗaini pini.

⁷A mula saretai zi gaw na gaini futini miya ɵaara, gaini saretai na zamai na wiiɗi Egipte ɗa lai, saret paŋ ɗai zi hatam warni hu hu.

⁸Won hlai n’aliɗi Izrayel e niyiɗi aha war Egipte par, e ɗa e yimi tiɗi amai ɓa e nivi pili n’edi, EPIƊ-ƊAI a diŋriti agulni Faraw a tika futi piɗi.

⁹Ɗai n’Egipte gaini plasaiɗi paŋ, gaiɗi ɗai na duɓani, gaini saretaiɗi zi gaw, gaiɗi ɗai zi hatam paŋ lai, e tiki futi piɗi, e niviɗi gobi gaiɗi Pi-Hirot wuzaɗi Baal-Sefon, ɵimani yem-ra n’abai.

¹⁰Won hlai na aliɗi Izrayel e tili ɓa ɗai n’Egipte e tikisi li futi piɗi, Faraw ɗe a na gobi gaiɗi lai ɗa, hunai n’abai a yimiɗi, e tiki piɗi e ɗûûli gdaŋ sini EPIƊ-ƊAI.

¹¹E miɗi wiini Musus: Tuku ku kiyisi aŋ mri edi war basga ɗa buri maɗa, aha war Egipte ɗa waŋ zi pi ɗai aŋ kai ɗi? Tuku ku miliyisi edi war Egipte par buri maɗa?

¹²Hlai na mu ɗumusi kaa aha war Egipte ɗa, mu muɗuku ɓa, ku hiniyi aŋ zi sda wiiɗi ɗai n’Egipte wiyi kai ɗi! Sda na mi ziŋ wiiɗi ɗai n’Egipte ɗa a suwa mri n’edi warni basga hanɗa kai ɗi?

¹³Musus a miɗiɗi: Ki hûni kai, pi arki, girna aga ki tili wala n’EPIƊ-ƊAI a zaŋ buriki aŋ kûrɗiki edi. Ɗai n’Egipte na ki ɗa tiliɗi girna hanɗa, dawai zamai aga ki tiliɗi kir kai haa kureɗ,

¹⁴buri EPIƊ-ƊAI gaini midini dama aga a hitima war balamki, tiki ki simni wiiki gaini hangalki.

¹⁵EPIƊ-ƊAI a miɗini wiini Musus: Ku yikaŋa ɓa mu zina puku buri maɗa? Miɗiɗi wiiɗi aliɗi Izrayel buri e tikiti futiɗi e hili!

¹⁶Amma tuku, tikiti amaraŋaiku, yimiti edi midini yem-ra n’abai ɗa, ɓasa futi wiiɗi aliɗi Izrayel kapai e vigi arbani yem midini afti na hûleŋ.

¹⁷Ta, aga mu diŋriti agulɗi ɗai n’Egipte aga e niyiɗi agoɗom piki. Aga mu siŋkiti abaiŋa edi sini Faraw, siɗi askaraini gaini saretaini zi gaw gaiɗi ɗai na midini paŋ lai, aga mu vidiɗi edi kafa.

¹⁸Nɵa won hlai na mu siŋkiti abaiŋa li sini Faraw, siɗi askaraini, sini saretaini zi gaw, gaiɗi ɗai na midini lai ɗai n’Egipte aga e siɗi ɓa, Ta m’EPIƊ-ƊAI.

¹⁹Sleŋ na wiini Alaw n’a naka edi ɵa wuzaɗi aliɗi Izrayel ɗa, a bundasi asakalɗi par, ɗugul z'afu a bundasi asakal par lai.

²⁰Dugul hanɗa a ɗiya arbani vokɗi aliɗi Izrayel gaiɗi ɗai n’Egipte. War duvuk, galni na siɗi ɗai n’Egipte par ɗa a gegeŋ, galni na siɗi aliɗi Izrayel sek ɗa a za gaglai, duvuk ɗa vok na sulu a kiɗa amlai sini marni kai.

²¹Musus a miɗiti tini edi midini yem-ra n’abai ɗa, EPIƊ-ƊAI a hinasi smer na gdaŋ na piɗi futi na dawai par a vuvuwa midini yem warɗi duvuk hanɗa, a waya yem asakalni, a ɓasaŋ, a hina afti a hula amai.

²²Aliɗi Izrayel e niyi agoɗom haa e hiwi amai, eziɗi a ziba kai, yem a rga amai maini ɵaga nɵa, na par lai, na par lai.

²³Ɗai n’Egipte e tiki futi piɗi, e niyi agoɗom piɗi gaini plasai na wiini Faraw ɗa paŋ, saretaini zi gaw gaiɗi ɗai na midini paŋ, e hili haa edi arbani yem ta.

²⁴Nɵa won hlai na hlai a ɓali aŋ sɗasi edi, EPIƊ-ƊAI a talasi vok na wiiɗi ɗai n’Egipte arni ɗugul gaini ɗugul z'afu par, a hinasi tûrli arbaɗi.

²⁵Ezini saretaiɗi a rɗaŋ edi bak bak, a bunda a sapa gaini. Nɵa ɗai n’Egipte e miɗi: Purumu edi buri ɓa EPIƊ-ƊAI a ɵasi pini gaiɗi Izrayel aŋ hitumumu.

²⁶EPIƊ-ƊAI a miɗini wiini Musus: Yimiti tuku edi midini yem pra, kapai yem a wayasi war balamni midiɗi ɗai n’Egipte, midini saretaiɗi gaiɗi ɗai na midini lai.

²⁷Musus a yimiti tini edi midini yem-ra n’abai ɗa. Gorof na hlai a sɗasi edi ɗa, yem a wayasi war balamni. Won hlai n’e tili yem a ŋasi gobi, ɗai n’Egipte e fiki aŋ luwi ɗa, EPIƊ-ƊAI a biɗi ɗai n’Egipte agoɗom arni yem.

²⁸Yem a wayasi a ɓa saretai zi gaw gaiɗi ɗai na midini, gaiɗi askarai na wiini Faraw na e niyi agoɗom piɗi aliɗi ɗa paŋ lai, ɗif ktai ma a pra edi piɗi kai.

²⁹Amma aliɗi Izrayel e niyi agoɗom haa e hiwi amai, eziɗi a ziba kai. Yem a rga amai maini ɵaga nɵa na par lai, na par lai.

³⁰War mefeŋ hanɗa EPIƊ-ƊAI a kûrɗiɗi aliɗi Izrayel edi tiɗi ɗai n’Egipte par. Aliɗi Izrayel e tili kopoŋɗi ɗai n’Egipte amai wulani yem waŋ waŋ.

³¹Aliɗi Izrayel e tili spak n’abai n’EPIƊ-ƊAI a zaŋ siɗi ɗai n’Egipte. Nɵa e siɗi spakni, e ɗiyi yimiɗi midini, e yimi miɗi na wiini Musus na ɵeŋni lai.