Read Mousgoum Niyi n’edi 15 Bible Online

Niyi n’edi 15 - Mousgoum bible

Niyi n’edi 15

¹Nɵa Musus gaiɗi aliɗi Izrayel e zi yama zi kol sini EPIƊ-ƊAI maini nɵa: Mu dara mu za yama zi kol burini EPIƊ-ƊAI, buri a siŋkiti abaini edi, a ɓa plasai gaiɗi ɗai na duɓani paŋ agoɗom war yem-ra n’abai,

²EPIƊ-ƊAI a gdaŋ na wiya, mu zina war yama ɗa a Ni, a Ni n’a kurɗaŋa, a Alaw na wiya, aga mu sini kol, a Alaw na wiini apa, aga mu muɗa edi midiɗi abaini.

³EPIƊ-ƊAI a ɗif n’a sɗa hatam, EPIƊ-ƊAI ɗa a yikini ɵa.

⁴Saretai zi gaw gaiɗi askaraini Faraw paŋ a pûkûɗi agoɗom warni yem-ra n’abai, askarai n’abakai na tiɗi a pa edi kai na wiiɗi Egipte e bi agoɗom warni yem-ra n’abai na mekele.

⁵E biɗihi li azumai war hulumni yem-ra maini ahi-fuŋ nɵa, yem-ra n’abai a biɗi.

⁶EPIƊ-ƊAI, tuku na wus ɗa te siŋka spakku ɗa edi, tuku na wus ɗa te kirpiɗi gawku.

⁷Pini abaiɗi paiku ɗa, ku rɗa amai midiɗi gawku, ku hinasi gdaŋni hiy na wiiku li midiɗi ɗa, a yiɗi edi maini evek nɵa.

⁸Pini gdaŋni smer na merfeŋku par ɗa, yem a tapa amai midini marni, yem zi ki a rga amai maini ɵaga nɵa, hulumni yem-ra n’edi arba ɗa a ɓoko gdaŋ.

⁹Gawyi e hiini warɗi ɓa: Aga mi tiki futi piɗi, mi yimiɗi, mi ɓûrwi wazagaiɗi arbaɗi, haa a sûwiyi gaini suwai, aga mi rɗi kaɵkaryi edi, mi wiyiɗisi piyi lai.

¹⁰Amma tuku EPIƊ-ƊAI, ku hinasi smer a vuvuwa, yem-ra n’abai a biɗi, e siri azumai sek maini tatna nɵa, war hulumni yem-ra n’abai.

¹¹EPIƊ-ƊAI arbaɗi alawai paŋ ɗa, n’a kata gaiku ɗa asiya N'a na sɗik, n’a ŋala gaiku ɵa ta ɗa asiya ɗa? Na ɗai e hûniŋ burini sdani n’abakai, n’a za wazagai n’a bunda ɗif hiyak lai ɗa asiya ɗa?

¹²Won hlai na ku siŋka spakku edi ɗa, afti a riɓiɗi gawyi n’e tikisi futi piyi kafa.

¹³Pini jre ɗikat na wiiku ku ɵa wuzaɗi ɗai na ku kûrɗiɗisi edi ɗa. Pini spakku ɗa ku kiɗi war hlai zi simni na sɗik na wiiku.

¹⁴Ɗai n’e ɵini labar hanɗa e ziriyi, ŋiba na wiini pûki a yimiɗi Filistrekai.

¹⁵Paakai na Edom hunai te rikiɗi li, na abakai zi spak na war Muwab hunai n’abai a yimiɗi lai, ɗai na Kanaan ɗa paŋ gdaŋɗi a vada edi marwai.

¹⁶Hunai a yimiɗi gdaŋ gara, wuzani spakku na ku zaŋ ɗa, miɗi a ɓurtuma, e bindi maini ali-fuŋ nɵa. Haa ɗaiku paŋ e vigi, EPIƊ-ƊAI, haa e vigi paŋ, ɗaiku na tuku ku wûriɗisi ɗa.

¹⁷Tiyana ɗa EPIƊ-ƊAI, tuku ku kiɗi amai midiɗi huwuŋ na wiiku, ku siɗi hlai zi simni woni, midiɗi huwuŋ na te bulum na wiiku, ku siɗi hlai zi simni woni EPIƊ-ƊAI, EPIƊ-ƊAI a hlai na sɗik na tuku dama te zizinaŋ.

¹⁸EPIƊ-ƊAI ɗa a pai ɵa haa kureɗ.

¹⁹Buri ɓa plasai na wiini Faraw, saretaini gaiɗi ɗai na midini paŋ a niya agoɗom warni yem-ra n’abai, EPIƊ-ƊAI a wayasi yem midiɗi. Amma aliɗi Izrayel e vigi azi a ziba arni yem kai.

²⁰Nɵa Miryam muni na mini Alaw, na tawalni Aaron te tika gaŋga, falakai na Izrayel e tipi gaiɗi e ɵiɓi gaŋga lai, e didimi lai.

²¹Miryam te waya midini gonoŋ wuzaɗi marɗi maini nɵa zi yama zi kol burini EPIƊ-ƊAI a siŋka spakni n’abai ɗa edi, a poko plasai gaiɗi nagai na midini paŋ agoɗom war yem-ra n’abai.

²²Musus a ɵa wuzaɗi aliɗi Izrayel sini yem-ra n’abai na mekele par edi war basga na kaɗataŋ na Sur sek. E hili haa mefeŋ hu edi war basga e nivi yem kai.

²³E sû war Mara ɗa, e nivi yem amma e kiɗi e ciŋ kai buri a na ɗewek. E yiki hlai hanɗa ɓa Mara buri hanɗa. Mara a dara a muɗa ɗewek.

²⁴Ɗai e tiki piɗi e ŋûriyi sini Musus e miɗi: Kapai mu cumu ɗa a maɗa?

²⁵Musus a siiwa EPIƊ-ƊAI, EPIƊ-ƊAI a siŋkini luwuŋ ktai, a haɗasi tini ktai agwi a blaŋ agoɗom, nɵa yem a bunda a ca nem. EPIƊ-ƊAI a siɗi gadai gaini de zamai zamai viya war hlai hanɗa. A titimiɗi war hlai ni lai.

²⁶A miɗiɗi: Na ɓa ki ɵini pini Epiɗ-ɗai Alaw na wiiki jre jre, na ɓa ki zi wazagai n’a tala arni pɗamai ɗa, na ɓa ki tiki hangalki sini gadai na wiini, na ɓa ki zi pini gadaini zi ɗiyi paŋ lai ɗa, aga mu hinasi veglek na mu hinaŋsi midiɗi Egipte ɗa miɗiki kai. Buri ɓa Ta m’EPIƊ-ƊAI na mu zûûliki.

²⁷E cû si war Elim, arakai a nafu woni doogo pi sulu, hurakai doogo doogo muguzak lai. E pi woni gobi ɵimani yem.