Read Mousgoum Niyi n’edi 18 Bible Online

Niyi n’edi 18 - Mousgoum bible

Niyi n’edi 18

¹Yetro, pai zi ɓaka na war Madiyan na suwulni Musus a ɵina labar midini wala paŋ n’Alaw a zaŋ burini Musus gaiɗi Izrayel na ɗaini lai, pra maini maɵa ɗa, EPIƊ-ƊAI a miliɗisi edi war Egipte par.

²Yetro na suwulni Musus a halasi gaiɗi Sefora n’ahini na munini Musus na ni a ɵinitiniɗi ahani,

³gaiɗi aliɗi na sulu lai. Na ktai yikini ɓa: Gersom, a dara a muɗa: Zûgi, buri Musus a hiina warni ɓa: Mu za fuŋ na ɗa midini aftiɗi ɗai.

⁴Na ktai yikini Eliyezer, a dara a muɗa: Alaw na wiya a zinai, warni hiini na ɓa, Alaw na wiini apa a lawaŋa ɗuwal, a kurɗaŋa edi mini kaɵkar na wiini Faraw par lai.

⁵Yetro na suwulni Musus gaiɗi alini Musus gaiɗi munini Musus lai, e hilisi sini edi war basga na kaɗataŋ, amai midiɗi huwuŋ na wiini Alaw, won hlai n’a pa woni.

⁶A ɵina sini Musus aŋ miɗini maini nɵa: Muta Yetro na suwulku, mu halasi suku na gaiɗi muniku gaiɗi aliku na sulu lai.

⁷Musus a niyasi anene mini suwulni, a hurga azumai wuzani, asakal par a kɵa amai wulani, e zilbi jam na siɗi marɗi, asakal par e niyi amlai.

⁸Musus a virnini wala n’EPIƊ-ƊAI a zaŋ sini Faraw gaiɗi ɗai n’Egipte buriɗi Izrayel na ɗaini gaini gir n’e niviŋ war futi, na EPIƊ-ƊAI a kûrɗiɗisi edi mini par lai.

⁹Yetro a firiya gara burini pɗem n’EPIƊ-ƊAI a zaŋ siɗi Izrayel won hlai n’a kûrɗiɗisi edi tiɗi ɗai n’Egipte par.

¹⁰Yetro a muɗa: Tese sini EPIƊ-ƊAI n’a kûrɗikisi edi pini spak na wiini Faraw gaiɗi ɗai n’Egipte paŋ par, a kûrɗiɗisi aliɗi Izrayel edi pini spak na wiiɗi ɗai n’Egipte ɗa par.

¹¹Tiya n’a yima li mada ɓa, EPIƊ-ƊAI ɗa abai a suwa alawai na zamai ɗa paŋ, hanɗa a siŋka edi won hlai na ɗai n’Egipte e ɗika e zi gir aŋ karas wiiɗi ɗai na Izrayel.

¹²Yetro na suwulni Musus a za ɓaka zi yi gaini ɓaka zi tese wiini Alaw. Aaron gaiɗi n’abakai n’arbaɗi ɗai na Izrayel paŋ e hili e simi simi hanɗa wuzani Alaw gaini suwulni Musus.

¹³Dawaini ɗa, Musus a sumna azumai aŋ ziti sariya wiiɗi ɗai, ɗai e ɗiyi wuzani Musus gorof par haa koskoi.

¹⁴Nɵa suwulni Musus a tala sda n’a na zaŋ gaiɗi ɗai, a miɗini: Tuku kiiku ktai ku za gaiɗi ɗai paŋ ɵa maɵa maɵa ɗa? Kiiku ɵa dam, ku ziti sariya lai, ɗai amai gaini eziɗi ɵa ca gorof par haa koskoi ɗa maɵa maɵa ɗa?

¹⁵Musus a wiyini seŋ wiini suwulni: Ɗai e hilisi na ɗa buri e zilbi dirini Alaw.

¹⁶Hlai na ɓa seŋ a na arbani ɗif gaini maini, e hilisi sa, mu tala seŋ n’arbaɗi ɗa, mu siŋkiɗi gadai zi ɗiyi gaini gadai zi ɗû na wiini Alaw.

¹⁷Suwulni a miɗini: Sda na ku zaŋ maini hanɗa nɵa ɗa pɗem kai.

¹⁸Aga ku kaya suku kadai, tuku gaiɗi ɗai n’e ɗa gaiku paŋ, sda hanɗa a sda na guma gara buriku, kiiku ktai kiɗa aŋ zaŋ kiiku ktai a kiɗa a va amai gaiku kai.

¹⁹Tiyana ɗa, ɵina pɗem, mu suku yel ktai, a zuva ɓa Alaw a zina puku, tuku ɗa aga ku ɗiya wuzani Alaw eziɗi ɗai, seŋɗi paŋ aga ku kaŋ wuzani Alaw ku tuku,

²⁰ku hitiriɗi gadai zi ɗiyi gaini gadai zi ɗû lai, ku siŋkitiɗi futi n’aga e tikiti gaini wala n’aga e ziŋ ɗa lai.

²¹Asakal par ku vara arbaɗi ɗai par ɗai na e kiɗi, n’e hûni Alaw, n’e firiyi jre, n’e ɗiyi sini farai n’a sa war jre kai ɗa kai; ku miliɗi aŋ abakai midini vok na ɗai warni dubu, miya, doogo doogo ɵim, zaw doogo lai.

²²Ɗai hanɗa aga e ziti sariya arbaɗi ɗai kûreɗ-kûreɗ, amma seŋ n’abakai e kiŋsi wuzaku tuku, na agogoi ɗa nagai e vidiŋ lai. Nɵa guma na muduku aga a faya agwi buri nagai aga e libi guma hanɗa gaiku lai.

²³Na ɓa ku zaŋ li maini hanɗa ɵa ɗa, gadai n’Alaw aga a suŋku paŋ ɗa aga ku vaŋ amai gaini kayai kai, ɗai ɗe e wiyi aha sek war ɵeɗ lai.

²⁴Musus a yima seŋ na suwulni a miɗiŋni, a za wala n’a miɗiŋni paŋ lai.

²⁵Musus a vara ɗai n’e kiɗi arbaɗi aliɗi Izrayel, a miliɗi aŋ abakai na wuzaɗi ɗai, a miliɗi midini vok na ɗai warni dubu, miya, doogo doogo ɵim, zaw doogo.

²⁶E ziti sariya wiiɗi ɗai kûreɗ-kûreɗ, amma seŋ n’abakai e kiŋsi wuzani Musus, na agogoi nagai dama e vidiŋ lai.

²⁷Nɵa Musus a tikini pini suwulni a waya aha midini aftini.