Read Mousgoum Niyi n’edi 2 Bible Online

Niyi n’edi 2 - Mousgoum bible

Niyi n’edi 2

¹Ɗif ktai war pinzibani Levi a tikiti muni na war pinzibani dama,

²Muni hanɗa te tika fel te wa ahi na wus. Won hlai na te tala ɓa ahi hanɗa a zuva gara te ŋoyaŋ haa tile hu

³Asakal par te tala haa te kiɗa aŋ ŋoyaŋ kir kai, te zizina wala na te tikaŋ warni gaini atla, te ɵirɓa sini gaini gudron gaini a nalam lai, te tika arwagwi warni ta, te ŋoyaŋ arni maraɵ agoɗom wulani ra Nil.

⁴Tawalni arwagwi te ɗiya ɗi edi gaigai par zaw aŋ tala wala n’aga a za sini ɗa.

⁵Nɵa mefeŋ ktai, ahini Faraw te halasi agoɗom war ra na Nil aŋ ma siɗi. Won hlai ni falakai n’e zi sda wuzaɗi e tiki wulani ra ɗaw aŋ gûni, na te tala wala n’e ziziniŋ gaini atla ɗa arbani maraɵ ta, te ɵiniti ɵeŋɗi ktai aŋ tikiŋɗisi.

⁶Te mala mini amai, te nava arwagwi na wus warni waŋ, a na tuwa, a bunda arɗi haw te muɗa: Hanɗa ahi hebre sike!

⁷Tawalni arwagwi te zilbiti ahini pai: Ku dara ɓa mu piyitisi muni ktai arbaɗi falakai na Hebrekai par kapai te wuluku arwagwi hanɗa amai ɗi?

⁸Ahini pai te miɗiɗi: Hala. Ahiyagoi te hala te yikitisi emini arwagwi tar.

⁹Ahini pai te miɗiɗi wiiɗi muni: Tika arwagwi hanɗa, wulaŋa amai, aga mu vurguku. Emini arwagwi te tikaŋ te sini fiyaw mini.

¹⁰Won hlai na arwagwi a za abai li, emini te kiŋɗisi wiiɗi ahini pai na te bundaŋ aŋ ahiɗi, te sini yiki ɓa: Musus, war hiini na ɓa, mu yimaŋsi agoɗom arni yem par.

¹¹Won hlai na Musus a za abai li, a hala aŋ tiliɗi tawalakaini na Hebrekai, a tala gir n’e ɗa e ziŋɗi gaini arni, pra a tala ɗif n’Egipte ktai a n’a ɵiɓa ɗif na hebre na zigelni.

¹²Musus a ɵiɓa fulai sini tiɓ tiɓ, a tala ɗif kai, a yima ɗif na Egipte a fuɗaŋ, a paŋ azumai arni kai kai tiɓ lai.

¹³Dawaini a waisi pra. A niviɗisi ɗai n’Izrayel sulu e ɗa ɵiɓi marɗi. A miɗini wiini ni na meefeŋ a wiini ɗa ɓa: Tuku ku ɵiɓa maiku buri maɗa?

¹⁴Ɗif a miɗini: Na a tukuku midiyi aŋ pai lai, aŋ ɗif zi ɗûkliti sariya lai ɗa asiya ɗa? Ku dara ku fuɗaŋa maini na ku fuɗa ɗif n’Egipte ɵa ɗi? Won hlai na Musus a sɗa ɓa wala n’a jaɓ ɗa ɗai e ɗa miɗi gaini ɗa, hunai te yimaŋ, a muɗa: Pa a wa amai ya sike!

¹⁵Faraw a ɵina seŋ hanɗa, a paya futi aŋ fuɗa Musus. Nɵa Musus a pra edi, a hala a ŋoya midini afti na Madiyan, a sumna gobi ɵimaɗi kiliŋi.

¹⁶Pai zi ɓaka na Madiyan alini na falakai muguzak, e hilisi buri e bili yem zi ci amai war palakaw wiini adumaiɗi,

¹⁷Amma ɗai zi giɗimi e birgiɗi ɓulamai ɗa edi miɗi kiliŋi par, nɵa Musus a faka amai a za hiy piɗi, a sini yem wiini faraiɗi paŋ.

¹⁸E wiyisi aha sini Reuwel. Ni a zilbiɗi: Girna ki wiyisi gobi nɵa maɵa ɗa?

¹⁹Nagai e miɗini: Ɗif n’Egipte ktai a zina piyi, a kûtiyi tiɗi ɗai zi giɗimi par, pra a biliyisi yem amai wiyi tiyi, a sini mini farai ɗa lai.

²⁰Epiɗi a miɗiɗi: Ɗif ni ɗa aŋ wata ɗa? Tiki ki hiniŋsi woni buri maɗa? Yikiŋsi kapai a suma.

²¹Musus a hina gaini ɗif hanɗa, ni a sitini Sefora n’ahini aŋ munini ta lai.

²²Te wa ahi na wus, Musus a sini yiki ɓa: Gerson, a dara a muɗa, m’aŋ woni na aŋ zak, buri mu bunda aŋ ɗif zi zak midini afti na zamai.

²³Mefeŋ yaw asakal par, pai n’Egipte ɗa a mra. Aliɗi Izrayel siɗi aŋ ɵi marava, aŋ tuwi ɵa burini gir n’e ɗa e siɗiŋ ɗa. War begeɗi par, tuwiɗi a wa haa amai sini Alaw ta

²⁴Alaw a tala marava na wiiɗi, midini a kɵa gaini bonu n’a zaŋ gaini Abraham, gaini Isaak gaini Yakob lai ɗa.

²⁵Alaw a tiliɗi aliɗi Izrayel, a sɗa ɓa e ɗa war gir.