Read Mousgoum Niyi n’edi 20 Bible Online

Niyi n’edi 20 - Mousgoum bible

Niyi n’edi 20

¹Nɵa Alaw a muɗa seŋ hanɗa paŋ, a muɗa:

²Ta m’Epiɗ-ɗai Alaw na wiiku, na mu yimukusi edi war Egipte par, midini afti na ku nasi ka warni aŋ bege.

³Ku yima pini alawai na zamai ɗa kai, sai pa ta.

⁴Aga ku zizina wala aŋ alaw kai, wala n’a kata gaini wala n’amai war fuŋ n’Alaw kai, n’azumai midiɗi yai kai, zaw n’arni yem, n’azumai pini afti ɗa kaalai.

⁵Aga ku hurga azumai wuzani alawai hanɗa kai, ku za ɵeŋni kaalai. Buri ɓa, Ta Epiɗ-ɗai Alaw na wiiku, m’Alaw zi sile, na mu zilba tuwur na wiiɗi tamai n’e bili gaw sa war tiɗi, war tiɗi aliɗi lai haa sini vuna n’ag'aŋ hu zaw n’ag'aŋ puɗu lai.

⁶Amma nagai n’e diriŋa, n’e zi pini seŋ zi gadaiŋa lai, mu za pɗem siɗi haa sini vuna n’ag'aŋ dubu.

⁷Ku yika yikini Epiɗ-ɗai Alaw na wiiku muku aŋ bulaŋ kai, buri asiya ɗi paŋ n’a yika yikini mini aŋ blaŋ ɗa, EPIƊ-ƊAI aga a tikini gir midini.

⁸Ku hina muduku a wula gaini mefeŋ na wiini Sabbat kai, ku yimaŋ aŋ mefeŋ na sɗik.

⁹Ku za sda war mefeŋ na ɵaara, sdaku paŋ a za war mefeŋ hanɗa.

¹⁰Amma mefeŋ n’ag'aŋ muguzak ɗa a Sabbat na wiini EPIƊ-ƊAI Alaw na wiiku, ku za sda ktai warni kai, tuku kaalai, ahiku na wus kaalai, na muni kaalai, begeku kaalai, bagaiku kaalai, faraiku gaini ɗif zi zak n’a na midini aftiku kaalai,

¹¹buri war mefeŋ na ɵaara ɗa, EPIƊ-ƊAI a za hlai n’amai gaiɗi yai, yem-ra n’abai gaini wazagai na warni paŋ lai, amma war mefeŋ n’ag'aŋ muguzak sini amla. Buri hanɗa, EPIƊ-ƊAI a ɓaka Sabbat ɗa, a zaŋ edi aŋ mefeŋ na sɗik ta lai

¹²Apuku gaiɗu amuku ku kûliɗi amai, kapai mefeŋku a za mogo midini afti n’Epiɗ-ɗai Alaw na wiiku aga a suŋku ɗa.

¹³Ku fuɗa ɗif kai.

¹⁴Ku za maɵara kai.

¹⁵Ku hala wala kai.

¹⁶Ku muɗa zaida z'eles midini maiku kai.

¹⁷Ku za suna sini dalam na wiini maiku kai, siɗi munini kai, sini begeni kai, siɗi bagaini kai, sini ɵeni kai, sini ablehöni kai, wazagaini maiku paŋ, ku za suna sini kai.

¹⁸Aliɗi Izrayel paŋ e ɵini wulani faŋ zi ɓarai gaini wulani fana, e tili wilɗi gaiɗi huwuŋ na te na ɗuguda agiyiŋ ɗa lai; ɗai e tili hanɗa, e tiki piɗi e ziriyi, e ɗiyisi edi gaigai par,

¹⁹e miɗini wiini Musus: Ku miɗiyisi ku tuku, tiyi aga mi ɵini, Alaw a miɗiyisi kir kai, ɵa kai ɗa aga mi mri ca.

²⁰Musus a miɗiɗi: Ki hûni kai, buri Alaw a halasi ɗa aŋ titimiki, kapai hunai na pini te sumna warki, ki zi tuwur kir kai.

²¹Aliɗi Izrayel e ɗiyisi edi gaigai par, amma Musus a torasi gobi sini ɗugul z'agiyiŋ na tekeɗim n’Alaw aŋ warni woni.

²²EPIƊ-ƊAI a miɗini wiini Musus: Aga ku miɗiɗi wiiɗi aliɗi Izrayel maini nɵa: Tiki dama ki siɗi edi gaglai ɓa, mu miɗikisi ɗa amai war hlai n’amai pra.

²³Aga ki rgi alaw na zi arzaŋ kai, zaw zi or ɵima kai, kapai ki sini kol kai.

²⁴Aga ki rgiŋa Gûwiŋ zi yi ɓaka z'afti, n’aga ki zi ɓaka zi yi na wiiki midini gaini ɓaka zi bonu; adumaiki, haakaiki gaini ɵaakaiki lai aga ki ziŋa ɓaka gaini midini gûwiŋ hanɗa. Hlai paŋ na mu siŋka sa li warni ɗa, aga mu halaɗi siki mu ɓikiki.

²⁵Amma na ɓa, ki rgiŋa gûwiŋ zi ɓaka z'ali-fuŋ ɗa, ki rgiŋ gaini ali-fuŋ zi kirhi kai, na ɓa ki kirhiŋ li ɗa, a na pɗem buriya kir kai.

²⁶Aga ki rgiŋa Gûwiŋ zi ɓaka na e niyi amai sini gaini ɓok ɗa kai, kapai ɗai e tili gaɓalani pai zi ɓaka ɗa kai.