Read Mousgoum Niyi n’edi 23 Bible Online

Niyi n’edi 23 - Mousgoum bible

Niyi n’edi 23

¹Aga ki miɗi seŋ na ezini aŋ karki kai ɗa kai, aga ki ɵipiki gaini ɗif na meefeŋ aŋ za zaida z'eles kai,

²aga ki tiɓi pini vokɗi ɗai na viya aŋ zi meefeŋ kai, na ɓa ki ɗa wuzaɗi sariya ɗa, ki tiɓi pini miɗi na wiiɗi ɗai na viya n’e ɗa war jre kai ɗa kai.

³Aga ki zini pini ɗif na murga war sariya kai.

⁴Na ɓa ki nivi gari zaw ablehö na wiini gawki gaini wili skeŋ ɗa, ki ɵimiŋnisi aha.

⁵Na ɓa ku tiliti ablehoini gawki te fana azumai gaini zak duɓaɗi sa, ku vuga edi ɗaw kai, ku zina pini aŋ yimitini amai.

⁶Aga ki tûûriti jre na wiini ɗif na murga wuzaɗi sariya kai.

⁷Ki wii siki war seŋ z'eles kai, ki fiɗi ɗif na tini war seŋ kai ɗa gaini ɗif na jre ɗa kai, buri ɗif na meefeŋ ɗa aga mu ŋaŋ aŋ jre kai.

⁸Ki yimi katu tini ɗif par kai, buri katu ɗa a hulva arɗi ɗai, koo ɗai n’e siɗi ezini seŋ, a tûûriti sariya na wiiɗi ɗai na jrekai lai.

⁹Ki zni gir wiini ɗif zi zak ɗa kai, tiki gaini miɗiki dama ki siɗi simnini ɗif zi zak ɗa ya, buri tiki lai ki ɗisi ka aŋ ɗai zi zak war Egipte.

¹⁰Aga ki bili seyem war vuwaiki haa buza ɵaara ki hiɗiŋ lai.

¹¹Amma buza n’ag'aŋ muguzak ɗa, ki hini vuwaiki edi kadai kapai afti sini a tika, kapai tawalakaiki na murgakai e nivi wala n’e kiɗi aŋ simiŋ warni par, wazagai na buza a luma n’a hina pini lai. Aga ki zi gaini vuwai zi luwuŋ zi vin, gaini vuwai zi luwuŋ Olive nɵa lai.

¹²Aga ki zi sdaki n’a na paŋ haa mefeŋ ɵaara, amma mefeŋ n’ag'aŋ muguzak ɗa, ki zi sda ktai warni kai, kapai ɵaakaiki gaini ablehökaiki sini amla, bagakaiku gaiɗi ɗai zi zak ɗa siɗi a tika ta lai.

¹³Aga ki zi pini seŋ na mi miɗiŋki paŋ, aga ki siiwi tini alawai zamai kai, ɗif a ɵina yikini war mini kaalai.

¹⁴War buza dam aga ki zi fet n’abakai hu aŋ kûliŋa warni.

¹⁵Fet n’avut n’aga ki ziti te fet na wiini peŋ na is arni kai. War mefeŋ na muguzak na wiini tile Abib ɗa, aga ki limi peŋ na gaini is arni kai maini na mu miɗiki nɵa, buri ɓa tiki ki niyisi edi war Egipte par war tile ni ɗa. Nɵa aga ki hilisi wuza gaini tiki piki kadai ca kai.

¹⁶Asakal par ki ziti fet na wiini hiɗini seyem, te fet na wiini merfeŋni seyem na wiini sdaki paŋ, gaini na wiini wazagai na ki bliŋ war vuwaiki paŋ, gaini fet na wiini hiɗi na te za war vidini buza, won hlai na ki vidi li gaini hiɗini seyemki paŋ ɗa.

¹⁷War buza dam ɗa, ɗaiki na maɵagai aga e hilisi wuza Ta n’Epin-gezani wazagai, n’EPIƊ-ƊAI azi hu.

¹⁸Peŋ na gaini is arni ɗa ki tipiŋ gaini ɓaka zi fel ɗa aŋ bonu kai, emel na war wazagai n’e fiɗiŋ mini fet ɗa a hina amai haa dawai par kai.

¹⁹Merfeŋni seyem na pɗamai n’a naiya avut paŋ ɗa, ki kiŋsi war dalam na wiini Epiɗ-ɗai Alaw na wiiki, aga ki di ahi hek na guɓu arni fiyaw na wiiɗi emini ɗa kai.

²⁰Amai midiɗi huwuŋ Sinai par, Alaw a miɗini wiini Musus pra: Aga mu ɵinaɗi ɵeŋ ktai wuzaki kapai a giɗimiki war futi, a kiki war hlai na mu zizinaŋ buriki.

²¹Ki ɵi dawaŋ gaini kai, ki ɵini mini, ki divini agulni kai buri ni a kiɗa a luba hi-n’amai midini gadai na wiiki kai, buri ɓa a za sda na ɗa war yikiŋa.

²²Na ɓa ki gidi pini, ki zi pini wala na mu miɗiki gaini paŋ lai ɗa, aga mu za aŋ gawɗi gawki, aga mu hitimiɗi nagai na e hitimiki lai.

²³Sleŋ na wiya aga a ɵa wuzaki a kiki piki midini aftiɗi Amoritekai, aftiɗi Hittitekai, Perizzitekai, aftiɗi ka naaniyakai, aftɗi Hivitekai gaiɗi Yebuzitekai lai, aga mu vidiɗi edi,

²⁴nɵa ɗa, ki hûrgi azumai wazani alawai na wiiɗi kai, ki zi ɵeŋni kaalai, aga ki zi maini na e ɗa e zi ahaɗi nɵa kai, amma alawaiɗi zi rgi ki hûŋ azumai, alini fuŋ z'alaw na wiiɗi ki hiɗiŋ edi lai.

²⁵Na ɓa ki zi ɵeŋni Epiɗ-ɗai Alaw na wiiki, aga a ɓaka wala zi simi na wiiki gaini yem zi ci na wiiki lai. Aga mu birga veglek edi siki par.

²⁶Midini aftiki ɗa, muni aga te ɵa warɗi edi kai, te za muɗaŋ kaalai, aga mu riya mefeŋki na warɗi yai ɗa amai lai.

²⁷Aga mu ɵina hunai n’abai wuzaki, ɗai na ki niyi li aha arbaɗi paŋ ɗa, hunai aga a yimiɗi. Gawki paŋ aga e rivi wuzaki.

²⁸Aga mu ɵinaɗi gonai wuzaki, kapai e birgiɗi Hivitekai, Kananiyakai, Hittitekai lai wuzani hlai na ki gi woni.

²⁹Aga mu birgiɗi edi wuzaki war buza ktai kai, kapai aftiɗi a hina edi kadai su haa wazagai na buza a sisiɗa warni kapai e ziki meefeŋ kai.

³⁰Aga mu birgiɗi edi wuzaki gaini hangal hangal, kapai won hlai na ki sisiɗi li viya, aftiɗi a sa siki aŋ bulum.

³¹Aftiki a tikasi pini sini yem-ra n’abai na mekele par haa sini yem-ra n’abai na wiiɗi Filistrekai ta. Sini basga na kaɗataŋ par haa sini ra na Öfrata ta. Won hlai na mu siɗi ɗai na midini afti hanɗa war tiki li, mu birgiɗi edi li lai,

³²ki zi bonu ktai gaiɗi kai, gaini alawaiɗi kaalai.

³³Ki hiniɗi e zi fuŋ midini aftiki kai, kapai e kiki aŋ zi tuwur sa kai, buri ɓa, aga ki zi ɵeŋni alawai na wiiɗi, a bunda buriki aŋ azaw.