Read Mousgoum Niyi n’edi 24 Bible Online

Niyi n’edi 24 - Mousgoum bible

Niyi n’edi 24

¹EPIƊ-ƊAI a miɗini wiini Musus: Niyasi amai sa, tuku, Aaron, Nadab, Abihu gaiɗi ɗai n’abakai n’arbaɗi ɗai na Izrayel doogo doogo muguzak lai, aga ki hûrgisi azumai edi gaigai par.

²Ku torosi sa gobi ku tuku Musus kiiku ktai, na zamai ɗa e tûrisi sa gobi kai, ɗai na Izrayel na paŋ ɗa e niyisi amai gaiɗi kai.

³Musus a halasi a miɗiɗi wiiɗi ɗai midini seŋ paŋ n’EPIƊ-ƊAI a miɗiŋni, gaini gadai n’a siŋni paŋ lai. Ɗai paŋ hiiniɗi a tapa ktai e miɗi: Tiyi aga mi zi pini seŋ n’EPIƊ-ƊAI a muɗaŋ ɗa paŋ, gaini gadai n’a saŋ ɗa paŋ.

⁴Musus a ɗo seŋ paŋ n’EPIƊ-ƊAI a miɗiŋni, dawaini a faka amai gorof par a rga gûwiŋ zi yi ɓaka azumai eziɗi huwuŋ, a ɗiya ali-fuŋ amai doogo pi sulu, midini pɵiɗi pinzibaɗi Izrayel na doogo pi sulu.

⁵Asakal par a ɵina gawlakai zamai na Izrayel, aŋ zi ɓaka zi yi, e fiɗi garakai aŋ zi ɓaka zi ɵeɗ wiini EPIƊ-ƊAI gaini lai.

⁶Musus a ma galni fel ɗa warni dumba ta ta, galni n’a hina a yamaŋ sini gûwiŋ zi yi ɓaka.

⁷Asakal hanɗa a tika maktuɓ na wiini bonu, a ŋaŋ gaini wulani amai wuzaɗi ɗai. Aliɗi Izrayel e miɗi: Tiyi aga mi zi pini wala n’EPIƊ-ƊAI a muɗaŋ ɗa paŋ, aga mi ɵini pini lai.

⁸Musus a masi fel na warni dumba par, a yamaŋ siɗi ɗai a muɗa: Hanɗa a fel na wiini bonu n’EPIƊ-ƊAI a zaŋ gaiki pini gadai n’a siŋki hanɗa.

⁹Asakal par Musus a niya amai gaini Aaron, Nadab, Abihu gaiɗi ɗai n’abakai n’arbaɗi ɗai na Izrayel na doogo doogo muguzak ɗa lai.

¹⁰E tili Alaw na wiiɗi Izrayel, pini ezini n’azumai ɗa a tala maini wala n’a rga gaini ali-fuŋ na safir n’a ŋala nɵa, hilu maini hlai n’amai nɵa.

¹¹EPIƊ-ƊAI a za wala na meefeŋ siɗi n’abakai n’arbaɗi ɗai na wiiɗi Izrayel hanɗa kai, e tili Alaw gaini arɗi, asakal par e simi, e ci lai.

¹²EPIƊ-ƊAI a miɗini wiini Musus: Niyasi amai sa midiɗi huwuŋ, sumna ka na dam, kapai mu suku ali-fuŋ na babɗamai na mu ɗo seŋ zi gadai gaini gadai zi ɗû warni, kapai ku hitriŋɗi wiiɗi aliɗi Izrayel.

¹³Musus a faka gaini Yosva na ɵeŋni, e niyi amai midiɗi huwuŋ na wiini Alaw.

¹⁴A miɗiɗi ka wiiɗi n’abakai n’arbaɗi ɗai ɓa: Biyiyi ka woni na haa mi wiyisi siki. Aaron gaini Hur e hini ka gaiki, ɗif n’aŋ gaini seŋ mini ɗa, a nava gaiɗi.

¹⁵Musus a niya amai midiɗi huwuŋ, ɗugul z'agiyiŋ a dûgûti,

¹⁶Abai na wiini EPIƊ-ƊAI te sumna midiɗi huwuŋ Sinai haa mefeŋ ɵaara, ɗugul z'agiyiŋ a dûgûti huwuŋ haa mefeŋ ɵaara lai. War mefeŋ n’ag'aŋ muguzak ɗa EPIƊ-ƊAI a yikasi Musus arbani ɗugul z'agiyiŋ par.

¹⁷Abai na wiini EPIƊ-ƊAI te siŋka edi arɗi aliɗi Izrayel maini afu n’a na ya gdaŋ amai merfeŋɗi huwuŋ nɵa.

¹⁸Musus a niya amlai arni ɗugul z'agiyiŋ ɗa, a ha amai midiɗi huwuŋ, woni a za mefeŋ doogo doogo puɗu, yuvai doogo doogo puɗu lai.