Read Mousgoum Niyi n’edi 25 Bible Online

Niyi n’edi 25 - Mousgoum bible

Niyi n’edi 25

¹EPIƊ-ƊAI a miɗini wiini Musus:

²Ku miɗiɗi wiiɗi aliɗi Izrayel buri e tipi wazagai buriya, aga ki yimi wazagai hanɗa tiɗi nagai n’e siŋ gaiɗi agulɗi paŋ par.

³Wazagai n’aga ki yimiŋ tiɗi par a hanɗa: Or, arzaŋ, kiiya,

⁴purpur na mekeleni cih cih, na mekele keŋ, na mekeleni fel fel, sapa zi leŋ na gaini futini gaini sapa z'ayirni haakai;

⁵amurni adumai na gaini ɗihi mekele, amurni hilif dofen, luwuŋ Akasiya,

⁶emel na war lampa, gaini sugoi zi lûgûzi n’e miliŋ arni emel na e miŋ midiɗi ɗai zi sda, gaini n’e ɗûgûdiŋ,

⁷Alini fuŋ Onikse gaini ali-fuŋ zamai zamai na pɗamai n’e diɓikiŋ sini efod gaini ɵubu na sini didikni pai zi ɓaka.

⁸Aliɗi Izrayel aga e zizini Hlai na sɗik buriya, Ta aga mu sumna arbaɗi lai.

⁹Aga mu suŋkuku plaŋ na wiini Hlai zi simni gaini wazagai na warni paŋ, aga ku zaŋ kal kal na mu suŋkuku nɵa.

¹⁰Aga e zizini Zunduk gaini luwuŋ Akasiya, mogoni kil sulu gaini gal, brukni kil ɗaw gaini gal, mogoni n’amai sek kil ɗaw gaini gal lai.

¹¹Aga e yimi or na gaini futini sini, warni n’amlai lai duɓani n’anene par lai, aga ku tika dalas amai mini ɗawwa gaini or.

¹²Aga e zizini girliŋ zi or puɗu, e piŋ edi war koŋ na puɗu ɗa, sulu war gal ktai, na sulu war gal ktai lai.

¹³E bili luwuŋ Akasiya na mogokai sulu, e yimi or sini kai kai lai.

¹⁴Luwuŋai hanɗa aga e wiŋ warni girliŋ na koŋni Zunduk kapai e libiŋ gaini.

¹⁵Luwuŋai hanɗa a hina warni girliŋ gaini wi ɵa ca, e sûtiŋ edi kai.

¹⁶Alini fuŋ na babɗamai na wiini bonu n’aga mu suŋku ɗa, ku mulaŋ warni.

¹⁷Aga a zizina wala na e dûgi mini gaini, gaini or na gaini futini, mogoni kil sulu gaini gal, brukni kil ɗaw gaini gal lai.

¹⁸Aga ki zizini Kerubimkai sulu gaini or zi gɵi, e ɗiyiɗi edi koŋni wala n’e dûgû mini Zunduk gaini ɗa, ktai na par zaw lai, ktai na par zaw lai.

¹⁹Kerubimkai na sulu hanɗa, n’e ɗa edi mini koŋni wala na mini Zunduk ɗa, e ɗi wala ktai.

²⁰Nagai aga e ɗiyi arɗi siɗi marɗi sek, arɗi gaini pi azumai midini wala n’e dûgiŋ mini Zunduk ɗa, e wii graŋɗi edi mini marni, kapai e giɗimi wala n’e dûgiŋ mini Zunduk ɗa,

²¹Ku mula li maktuɓ na wiini bonu n’aga mu suŋku war Zunduk ca ɗa, ku wala n’e dûgiŋ mini ɗa duk.

²²Aga mu nava gaiku war hlai hanɗa, aga mu muɗasi gaiku amai par midini wala n’e dûgiŋ mini Zunduk ɗa, arbani Kerubimkai na sulu n’e ɗa midini Zunduk zi bonu ɗa, kapai mu suku gadaiŋa na mu dara mu siŋɗi wiiɗi aliɗi Izrayel ɗa paŋ.

²³Asakal par, aga e ziziniti tabel gaini luwuŋ Akasiya, mogoɗi kil sulu, brukɗi kil ɗaw, mogoɗi n’amai sek kil ɗaw gaini gal.

²⁴E yimi or na gaini futini siɗi, e tiki dalas miɗi ɗawwa gaini or.

²⁵E zi kadre siɗi ɗawwa, na brukni santi-metre mitwis, e zi dalas sini kadre ɗa ɗawwa gaini or.

²⁶E zizini girliŋ puɗu gaini or, e piŋ war koŋɗi tabel na puɗu gobi gaini azi puɗu ɗa.

²⁷Girliŋ hanɗa aga a pa gobi sini kadre n’e tûkiŋ siɗi tabel ɗa, aga e wii luwoŋai na mogokai warni kapai e libiti tabel ɗa.

²⁸Aga e bili luwuŋ Akasiya na mogokai sulu, e yimi or, sdani a na buri e libiti tabel ɗa gaini.

²⁹Aga e zizini sufura, kop, gagaza, gaini wazagai n’e zi ɓaka zi vin gaini. Aga e ziziniŋ gaini or na gaini futini.

³⁰Peŋ n’aga a sa sa ɗa, aga e miliŋ amai midiɗi tabel hanɗa, aga e ziŋ ɵa kûreɗ-kûreɗ wuzani ara.

³¹Aga e zizini wala n’e higi lampa amai sini gaini or na gaini futini. Wala zi higi lampa hanɗa aga e ziziniŋ gaini or na gaini giɵi, pini n’azumai gaini keɵkeni, gaini ɵimani n’a waŋ edi gaini flerni lai a tapa aŋ wala ktai.

³²Sini keɵkeni ɗa, e pi graŋ ɵaara, hu war gal ktai, na hu war gal hanɗa lai.

³³Siɗi tiy na ktai ɗa, ɵimani n’a wa edi a za hu hu maini Amande nɵa, gaini wala n’a pasi amlai par ɗef ɗef gaini fler lai, siɗi na hanɗa nɵa lai, a za nɵa sini tiy na ɵaara paŋ.

³⁴Sini keɵkeni, e zizini ɵimani n’a wa edi puɗu, n’a sɗa maini alini luwuŋ amande nɵa, gaini wala n’a pasi amlai par ɗef ɗef gaini fler lai.

³⁵Aga e pi wala na ɗef azumai pini tiy na sulu n’azumai par, e pi zamai ktai pini tiy na sulu n’arba, e pi zamai ɗef azumai pini tiy na sulu n’amai ɗa lai. Aga a za maini hanɗa nɵa sini tiy na sulu n’a pasi amlai par sini wala n’e higi lampa midini ɗa, aga a za maini nɵa sini tiy n’a pasi amlai par sini wala n’e higi lampa sini ɗa.

³⁶Wala n’a pa ɗef ɗef gaini tiy lai, paŋ a wala ktai, hanɗa paŋ e ziŋ gaini or na gaini gɵi na gaini futini,

³⁷aga e zizini lampa muguzak, e higiŋ amai sini wala n’e higi lampa sini, kapai a za gaglai wuzani.

³⁸Wazagai n’e pikisi neŋ avu par gaini, wazagai n’e mili bonu edi gaini, e ziziniŋ gaini or na gaini futini.

³⁹Zizini wala n’e higi lampa amai sini gaini wazagai n’e zi sda gaini paŋ a za gaini or na gaini futini kilo doogo doogo hu.

⁴⁰Tuku Musus, ku tika hangalku sini sda hanɗa pɗem, kapai a za pini plaŋ na mu suŋkuŋku amai midiɗi huwuŋ hanɗa par na ɗa.