Read Mousgoum Niyi n’edi 26 Bible Online

Niyi n’edi 26 - Mousgoum bible

Niyi n’edi 26

¹Hlai zi simni na wiya ɗa, aga e ziŋ gaini sapa doogo na gaini futini, n’e hiŋ gaini leŋ, e zilniŋ gaini ayirni adumai na mekele cih cih, na mekele keŋ gaini na mekele fel fel gaini Kerubimkai lai. A zaŋ ɗa a ɗif n’a sɗa deseŋ gaini futini gara.

²Mogo na wiini sapa ktai kil caaɓa pi mitwis, brukni kil puɗu lai. Sapa na doogo hanɗa paŋ mogoni kal kal, brukni kal kal lai.

³Sapa na ɵim e tiɓiŋ mini marni, a diŋga war hlai ktai, na ɵim war hlai ktai lai.

⁴Aga e zi sogom na gaini ayirni adumai na mekele cih cih, mini sapa n’avut na wiini sapa na ɵim n’avut ɗa ta ta, e zi zamai mini sapa na asakal na wiini sapa na ɵim na asakal ɗa ta ta lai.

⁵Sapa n’avut na wiini sapa na ɵim n’avut ɗa, e zi sogom mini doogo doogo ɵim. Mini sapa na asakal na wiini sapa na ɵim na asakal ɗa e zi sogom mini doogo doogo ɵim lai, sogom hanɗa a kata midini marni tar tar.

⁶Aga e zizini wala n’e jibi arbani wazagai gaini doogo doogo ɵim zi or kapai e tiɓi sapa mini marni gaini. Nɵa hlai zi simni na wiini Alaw hanɗa a zizina amai aŋ wala ktai.

⁷Asakal par e zizini sapa z'ayirni haakai doogo pi ktai, kapai e pi gumu gaini amai par midini hlai zi simni na wiini Alaw.

⁸Mogoni sapa hanɗa kil doogo doogo hu, brukni kil puɗu lai, sapa na doogo pi ktai hanɗa paŋ mogoni kal kal, brukni kal kal lai.

⁹Aga e tiɓi sapa ɵim war hlai ktai na ɵaara war hlai ktai lai, sapa n’ag'aŋ ɵaara ɗa e jibiŋsi amai war gal na mini gumu sek ɗa.

¹⁰E zi sogom doogo doogo ɵim mini sapa na asakal na wiini sapa na ɵim ɗa, e zi zamai doogo doogo ɵim mini sapa n’avut na wiini sapa na ɵaara ɗa lai.

¹¹E zizini wala n’e jibi wazagai gaini zi kiiya doogo doogo ɵim, e ɓili wala n’e jibi wazagaini gaini ɗa sini sogom ɗa gaini hanɗa, aga e tipi gumu amai a bunda aŋ wala ktai.

¹²Brukni sapa na midini gumu ɗa aga a suwa edi gaini galni sapa ɗaw, na aga a suwasi haa azumai duɓani hlai zi simni na wiini Alaw ta.

¹³Mogoni sapa ɗa a suwa edi kil ktai war gal hanɗa sek lai, kil ktai war gal hanɗa sek lai. A suwasi haa azumai sini koŋni hlai zi simni na wiini Alaw, a kusuɓaŋ sulu paŋ lai.

¹⁴E zizini midini gumu ɗa gaini amurni adumai na gaini ɗihi mekele, e yimisi amurni hilif dofen amai par midini kaai pra.

¹⁵E pi luwuŋ Akasiya tiɓ tiɓ, kapai a za aŋ kadre na wiini hlai zi simni na wiini Alaw.

¹⁶Luwuŋ paŋ mogoni kil doogo, brukni kil ɗaw gaini gal lai.

¹⁷Luwuŋ paŋ deŋel sini sulu sulu, gaini ziri wulani marni. Luwuŋ na sini hlai zi simni na wiini Alaw paŋ, e ziŋ maini nɵa.

¹⁸Luwuŋ na wiini hlai zi simni na wiini Alaw ɗa, e zi caaɓa e piŋ war gal na Negev amai sek.

¹⁹E zizini wala n’e tikiŋ midini doogo doogo puɗu gaini arzaŋ, aŋ miliŋ azumai pini kadre na caaɓa hanɗa, luwuŋ paŋ wala azumai pini sulu sulu.

²⁰War galni hlai zi simni na wiini Alaw n’azumai sek ɗa, luwuŋ caaɓa,

²¹wala n’e tikiŋ midini doogo doogo puɗu zi arzaŋ, luwuŋ paŋ wala azumai pini sulu sulu.

²²Edi par pini hlai zi simni na wiini Alaw, piɗi futi na koskoi sek ɗa, e zizini luwuŋ ɵaara,

²³e zi luwuŋ zamai sulu na kiini burini koŋni hlai na asakal ɗa lai.

²⁴Luwoŋai na sulu na war koŋni hlai hanɗa a pasi azumai par ktai, midini n’amai gaini rgi sini marni gaini girliŋ lai. War koŋni hlai na sulu paŋ a za maini hanɗa nɵa lai.

²⁵Pini hlai zi simni na wiini Alaw n’amai par ɗa, luwoŋai aga a za warni mitwis, wala n’e tikiŋ midini zi arzaŋ doogo pi ɵaara lai, luwuŋ paŋ wala azumai pini sulu sulu.

²⁶Aga e bili luwuŋ Akasiya na mogokai n’e rgiŋ paɵani luwuŋ ɗa: Slim war galni hlai zi simni na wiini Alaw na ktai,

²⁷ɵim war gal na ktai lai, ɵim sini luwuŋ n’edi pini hlai zi simni na wiini Alaw par, piɗi futi na koskoi sek lai.

²⁸Luwuŋi na muguwi n’arba, te vuga paɵani luwuŋ ɗaw war koŋ ktai par haa edi tiɓ.

²⁹Ku yima or sini luwoŋai gaini girliŋ n’e rgi n’e rgi luwuŋ na paɵani gaini, gaini luwoŋai na paɵani lai.

³⁰Aga e rgi hlai zi simni na wiya hanɗa kal kal maini na mu suŋkuŋku amai par midiɗi huwuŋ na nɵa.

³¹Asakal par aga e zi rido gaini leŋ na gaini futini, gaini zilni gaini ayirni adumai na mekele cih cih, na mekele keŋ gaini na mekele fel fel gaini Kerubimkai lai, a zaŋ ɗa a ɗif n’a sɗa deseŋ gaini futini gara.

³²E higiŋ amai sini gaarakai puɗu na wiini luwuŋ Akasiya n’e yimi or sini na gaini wala n’e jibi wazagai gaini zi or sini. Gaarakai hanɗa e tikiŋ midini wazagai zi arzaŋ puɗu lai.

³³E higi rido amai sini wala n’e jibi wazagai gaini zi or ɗa, e ki Zunduk zi bonu amlai duɓani rido par. Rido hanɗa aga a ɓurwa arni hlai na sɗik gaini na sɗik gara ɗa.

³⁴E dûgû wala n’e dûgûŋ mini zunduk zi bonu ɗa amlai war hlai na sɗik gara ɗa.

³⁵Tabel ɗa, e tikitiɗi anene wuzani rido par. Wala n’e higi lampa amai sini ɗa, e ɗiyiŋsi wuzaɗi par war gal n’azumai sek na wiini hlai zi simni na wiini Alaw ɗa. Tabel ɗa war gal n’azumai sek lai.

³⁶Asakal par e zi rido gaini hlai zi simni na wiini Alaw ɗa, gaini ayirni adumai na mekele cih cih, na mekele keŋ gaini na mekele fel fel, gaini zilni gaini leŋ na gaini futini lai, a zaŋ ɗa a ɗif n’a sɗa tikirini sapa gaini futini.

³⁷E zizini gaarakai ɵim na wiini luwuŋ Akasiya, kapai e rgi rido ɗa amai sini, e yimi or sini, e pi wala n’e jibi wazagai gaini zi or amai sini, e zi wala n’e tikiŋ midini zi kiiya ɵim lai.