Read Mousgoum Niyi n’edi 27 Bible Online

Niyi n’edi 27 - Mousgoum bible

Niyi n’edi 27

¹Asakal par e zi gûwiŋ zi ɓaka gaini luwuŋ Akasiya, mogoni gaini brukni kil ɵim ɵim, mogoni n’amai sek kil hu lai.

²E zizini miyokni warni koŋni na puɗu paŋ aŋ wala ktai gaini, sini paŋ e yimi kiiya sini.

³Wazagai n’e zi sda gaini midini gûwiŋ zi ɓaka ɗa paŋ e ziziniŋ gaini kiiya, wala n’e mili eveŋ z'emel n’a haɓa sini griyas warni, pel, kop zi yiimi fel, wala n’e mili neŋ gaini midini afu, wala n’e yi wala zi ɗûgûdi zi lûgûzi warni lai.

⁴E zizini griyas zi kiiya, e zizini girliŋ puɗu edi mini koŋni na puɗu ca ca lai.

⁵Aga e hiri griyas ɗa azumai par ezini gûwiŋ zi ɓaka haa amai paɵani ta.

⁶E zizini luwuŋ Akasiya na mogokai sulu burini gûwiŋ zi ɓaka, e yimi kiiya sini.

⁷E wi luwuŋ na mogokai hanɗa war girliŋ, war galni gûwiŋ zi ɓaka na sulu paŋ kapai e libiŋ gaini.

⁸Gûwiŋ zi ɓaka zi luwuŋ Akasiya hanɗa, warni n’amlai baŋa su. E ziŋ kal kal maini na mu suŋkuku amai midiɗi huwuŋ nɵa.

⁹Asakal par e ziti pakatai na wiini hlai zi simni na wiini Alaw. War gal na Negev amai sek, e zi sapa zi leŋ na gaini futini, na mogoni a za paŋ kil miya ɗaw war galɗi pakatai na woni par ɗa.

¹⁰Gaarakai n’e ɓili sapa hanɗa sini caaɓa, wala n’e tikiŋ azumai pini caaɓa lai n’e ziŋ gaini kiiya, wala n’e zibi wazagai gaini, gaini n’e higi wazagai amai sini gaarakai n’e ziŋ gaini arzaŋ lai.

¹¹War gal n’azumai sek mogoni sapa ɗa a za kil miya ɗaw lai. Gaarakai n’e hiri sapa sini caaɓa, gaini wala n’e tikiŋ azumai pini caaɓa lai n’e ziŋ gaini kiiya. Wala n’e zibi wazagai gaini, gaini n’e higi wazagai amai sini n’e ziŋ gaini arzaŋ lai.

¹²War gal na piɗi futi koskoi sek, pini brukɗi pakatai, sapa n’e hriŋ woni mogoni kil doogo doogo ɵim, gaarakai n’e hiri sapa sini doogo, wala n’e tikiŋ azumai pini doogo lai.

¹³War gal na piɗi futi na dawai par, war hlai n’e niyi amlai warni par, brukɗi pakatai a za kil doogo doogo ɵim.

¹⁴Slimani mini hlai, gal na ktai sapa kil doogo pi ɵim, na ktai doogo pi ɵim lai, gaarakai warni hu hu, wala n’e tikiŋ azumai pini hu hu lai.

¹⁶Rido na mini magalani pakatai mogoni kil caaɓa, e ziŋ gaini sapa pur pur na mekele cih cih, na mekele keŋ, na mekele fel fel, gaini sapa leŋ na gaini futini lai, a zaŋ ɗa a ɗif n’a sɗa a tikrini sapa gara, gaarakai mini puɗu, wala n’e tikiŋ azumai pini puɗu lai n’e ziŋ gaini kiiya.

¹⁷Gaarakai na siɗi pakatai ɗa, wala n’e higi wazagai amai sini, gaini n’e zibi wazagai gaini n’aŋ sini ɗa e ziŋ gaini arzaŋ, wala n’e tikiŋ azumai pini ezini, e ziŋ gaini kiiya lai.

¹⁸Mogoɗi pakatai kil miya ɗaw, brukɗi kil doogo doogo ɵim, mogoni sapa n’amai sek ɗa kil ɵim, sapa leŋ na gaini futini lai, wala n’e tikiŋ azumai pini gaarakai ɗa e ziŋ gaini kiiya lai.

¹⁹Wazagai n’e zi sda gaini amlai warni Hlai zi simni na wiini Alaw, gaarakai na sini paŋ, gaini na siɗi pakatai ɗa lai e ziŋ gaini kiiya.

²⁰Tuku Musus ku miɗiɗi wiiɗi aliɗi Izrayel buri e sukusi emel na gaini futini na wiini luwuŋ olive, kapai koskoi koskoi paŋ e tiki afu warni lampa ɗa ɵa kûreɗ-kûreɗ,

²¹amlai war Gumu n’e nivi gaini EPIƊ-ƊAI woni, anene par wuzani rido n’a na wuzani Zunduk zi bonu, Aaron gaiɗi alini aga e zizini lampa hanɗa kapai a ya wuzani EPIƊ-ƊAI haa hlai a sɗa edi. Hanɗa a gadai zi ɗiyi n’a bunda kai buriɗi aliɗi Izrayel sini pinzibaɗi wuzaɗi sek haa kureɗ.