Read Mousgoum Niyi n’edi 28 Bible Online

Niyi n’edi 28 - Mousgoum bible

Niyi n’edi 28

¹Tuku Musus, ku yimasi Aaron na tawalku, gaini Nadab, Abihu, Eleyezar gaini Itamar n’alini ɗa gaiku, ku miliɗisi edi arbaɗi aliɗi Izrayel ɗa par kapai e zi aŋ paakai zi ɓaka na wiya.

²Aga e zizini sapa na sɗik wiini Aaron na tawalku buri a siŋkiti abaini gaiɗi paini edi.

³Tuku aga ku miɗiɗi wiiɗi nagai na yalakai na mu viɗi gaini yel zi zi wala buri e zizini sapa wiini Aaron n’aga a waŋ sini war mefeŋ n’aga e mini emel midini, n’aga a za sda zi pai zi ɓaka wuzani ara lai.

⁴Saga n’aga e ziŋ ɗa a na maini nɵa: Zlubu na sini didikni, efod, rob, rob na gaini tihiri, kadamul gaini sarpa. Aga e zi sapa na sɗik wiini Aaron na tawalku gaiɗi alini lai. Kapai e zi sda zi paakai zi ɓaka gaini.

⁵Nagai n’e tihiri sapa ɗa e zi sda gaini or, gaini sapa pur pur na mekele cih cih, na mekele keŋ, na mekele fel fel gaini leŋ na gaini futini lai.

⁶Efod ɗa aga e ziŋ gaini or, gaini sapa pur pur na mekele cih cih, na mekele keŋ, na mekele fel fel gaini leŋ na gaini futini, a zaŋ ɗa a ɗif n’a sɗa sdani gaini futini gara.

⁷E zi sapa lar lar sulu sini kerpeɵɗi ɗa, kapai e cikiti sapai ɗa amai gaini.

⁸Santir n’e rgiŋ paɵani efod ɗa e ziŋ ɗa maini efod ɗa ɵa lai, gaini or, gaini pur pur na mekele cih cih, na mekele keŋ, mekele fel fel, gaini leŋ na gaini futini lai.

⁹Aga e mili ali-fuŋ onikse sulu, e ɗû yikiɗi pinzibaɗi Izrayel na doogo pi sulu midini.

¹⁰Ahi fuŋ n’avut ɗa aga e ɗû yiki sini ɵaara, n’ag'aŋ sulu ɗa e ɗû yikiɗi nagai n’e hini, pini girini wiiɗi.

¹¹Aga e ɗû yikiɗi pinzibaɗi Izrayel ɗa midini ali-fuŋ na sulu hanɗa, a sda n’a zaŋ ɗa a ɗif n’a sɗa sda na gaini ali-fuŋ gaini futini, a zaŋ maini tampon nɵa, e diɓiki yiki hanɗa sini wala zi or.

¹²Ali fuŋ na sulu hanɗa aga e rgiŋ sini sapa na lar lar n’aŋ sini graŋɗi efod ɗa, aŋ wala n’a siŋka midiɗi pinzibaɗi Izrayel na doogo pi sulu. Nɵa Aaron aga a liba yikiɗi amlai wuzani EPIƊ-ƊAI sini kerpeɵni na sulu paŋ. Ta EPIƊ-ƊAI, mada aga a wula gaiki kai.

¹³Wala na e diɓiki yiki sini ɗa aga e ziŋ gaini or,

¹⁴E zi jaɓ na agogoi sulu gaini or na gaini futini, gaini tirɗi sini marni maini sogom ɵa, e mili jaɓ na gaini tirɗi amai midini wala n’e diɓiki yiki sini ɗa.

¹⁵Ɗai n’e hi sapa ɗa e zizini ɵubu zi sariya, e ziŋ maini na e zi efod ɗa nɵa, e ziŋ gaini or, sapa pur pur na mekele cih cih, na mekele keŋ, na mekele fel fel gaini leŋ na gaini futini lai.

¹⁶E jibiŋ amai sa, mogoni gaini brukni a bunda kal kal, tiy ŋa ŋa.

¹⁷E ɗû sini gaini ali-fuŋ na pɗamai giri puɗu, Giri n’avut e ziŋ gaini ali-fuŋ: sarduwon, topaz gaini emerod,

¹⁸giri n’ag'aŋ sulu gaini: eskarbukle, lazulit gaini diyaman,

¹⁹giri n’ag'aŋ hu gaini: agat, kornaline gaini ametiste,

²⁰giri n’ag'aŋ puɗu: krizolite, onikse gaini yaspis. Ali-fuŋ hanɗa paŋ e diɓikiŋ sini wala zi or.

²¹Ali fuŋ hanɗa aŋ gaini kiti midini yikiɗi aliɗi Izrayel, a na paŋ doogo pi sulu midini yikiɗi ta, ahi-fuŋ paŋ yiki gaini diɓiki warni ktai ktai maini tampon nɵa. Ali fuŋ na doogo pi sulu hanɗa a siŋka midini pinziba na doogo pi sulu na wiiɗi Izrayel.

²²E zizini jaɓ n’agogoi sulu zi or na gaini futini na gaini tirɗi sini maini sogom ɵa, n’e higiŋ sini ɵubu.

²³Aga e zizini adoŋo sulu zi or burini ɵubu ɗa, e tikiŋ war koŋni n’amai sek ɗa ta ta,

²⁴Jaɓ na agogoi zi or na sulu na gaini tirɗi sini marni ɗa, e wiŋ warni adoŋo zi or na sulu n’a na edi war koŋni ɵubu ɗa.

²⁵Mini jaɓ na sulu n’a hina e higiŋ sini wala zi or n’aŋ gaini rgi sini graŋni efod ɗa kapai ɵubu a hina edi baŋa.

²⁶Aga e zizini adoŋo zi or zamai sulu, e tikiŋ amlai war gal na sini efod sek ɗa, war koŋni n’azumai par ɗa ta ta.

²⁷E zizini adoŋo zi or zamai sulu pra, e tikiŋ azumai par sini mini graŋni efod na lar lar, edi wuzani par won hlai n’e ziigiŋ woni, amai par midini santir na wiini efod.

²⁸Adoŋo na sini ɵubu e rgiŋ sini adoŋo na siɗi efod ɗa gaini sogom n’a za gaini sapa pur pur na mekele cih cih, kapai ɵubu a hina amai par midini santir na wiini efod ɗa.

²⁹Nɵa won hlai na Aaron a dara a niya amlai warni Hlai na sɗik ɗa, aga a liba yikiɗi pinzibaɗi Izrayel na doogo pi sulu n’aŋ gaini ɗû sini ɵubu zi sariya amai sini didikni, nɵa Ta EPIƊ-ƊAI, mada aga a wula gaiki kai.

³⁰Tuku Musus, ku mula Urim gaini Tumim warni ɵubu zi sariya, Aaron aga a halasi wuzani ara gaini amai didikni ca, nɵa Aaron a libaŋ amai sini didikni kureɗ won hlai n’a halasi wuzani ara aŋ zilba diriŋa na buriɗi aliɗi Izrayel.

³¹Asakal par e zi rob n’amlai warɗi efod par gaini sapa na pur pur na mekele cih cih,

³²Baŋa n’e wii humokɗi warni aga e cûŋ arba kal kal, e tikiri mini haa e gûniŋ amlai gun, e ziŋ diɓilik ta kapai a ɓurwa kai.

³³Miɗi n’azumai ɗawwa e tikiriŋ haa gaini gûni amlai gun, e zi deseŋ na wiini ali luwuŋ grenade na gaini sapa pur pur na mekele cih cih, na mekele keŋ gaini na mekele fel fel ɗa lai. E giɓi deŋeleŋeleŋ zi or arbani ca ca haa amlai gun lai.

³⁴Deŋeleŋeleŋ gaini ali luwuŋ grenade ɗa e giriŋ gaini ɵihiɗi arbani marni azumai miɗi rob ɗa, haa amlai gun.

³⁵Aaron aga a wûti rob hanɗa sini won hlai n’a dara a za sda zi pai zi ɓaka ɗa, won hlai n’a niya amlai war hlai na sɗik wuzani EPIƊ-ƊAI, zaw a niyasi anene sek ɗi, deŋeleŋeleŋ aga a suura, nɵa a mra kai.

³⁶Asakal par ki zizini wala zi or na gaini futini maini fler nɵa, e ɗû amai sini ɓa: A wiini EPIƊ-ƊAI, maini wala n’e ɗûŋ midini tampon nɵa.

³⁷Aga e rgiŋ sini kadamul gaini sogom zi sapa pur pur na mekele cih cih, edi wuzani sek,

³⁸Aaron aga a rgaŋ midini arni, meefeŋ n’aliɗi Izrayel e ziŋ war likeɗi na sɗik gaini wazagaiɗi na sɗik n’e siŋ sa Ta EPIƊ-ƊAI paŋ ɗa, Aaron aga a libaŋ, aga a rgaŋ midini arni kureɗ kapai mu yima like hanɗa tini par.

³⁹Aga e zizini rob wiini Aaron gaini leŋ na gaini futini, e zizini kadamul gaini leŋ na gaini futini lai, gaini sarpa, sini paŋ gaini tikiri. A zaŋ ɗa a ɗif n’a sɗa sapa zi tikiri gaini futini.

⁴⁰Wiiɗi alini Aaron ɗa, e ziziniɗi rob gaini sarpa, gaiɗi juki aŋ wala n’a siŋka abaiɗi gaiɗi paiɗi edi.

⁴¹Tuku Musus, aga ku wiini sapa hanɗa sini Aaron na tawalku gaiɗi aliɗi, aga ku miɗi emel midiɗi, ku miliɗi war sdaɗi, ku ziɗi edi sɗik kapai e zi sda zi pai zi ɓaka na wiya.

⁴²E ziziniɗi kolson zi leŋ piɗi kapai e ŋûyi ganalaɗi gaini amai wuzaɗi par haa sini ɓalakɗi ta ta.

⁴³Aaron gaiɗi alini aga e wiŋ piɗi won hlai n’e niyi amlai war gumu n’e nivi gaini EPIƊ-ƊAI woni, zaw won hlai n’e diri e hili sini gûwiŋ zi ɓaka aŋ zi ɓaka amlai war hlai na sɗik. Nɵa aga e ki siɗi war meefeŋ kai, e mri kaalai. Hanɗa a gadai n’a na ɵa haa kureɗ burini Aaron gaiɗi pinzibani na asakal sek.