Read Mousgoum Niyi n’edi 29 Bible Online

Niyi n’edi 29 - Mousgoum bible

Niyi n’edi 29

¹Sda n’aga ku zaŋ kapai ku sa Aaron gaiɗi alini edi mini sdaɗi zi pai zi ɓaka ɗa, a na maini nɵa: Ku yima gari ktai gaini adumai na maɵagai sulu na tirki sini kai,

²Gaini avudi na wiini algama na hiniŋ, ku za peŋ na gaini is arni kai gaini gato na e hiɗiŋ gaini emel na is arni kai, gaini gamla na gaini is arni kai, n’e yiimi emel sini lai.

³Wazagai hanɗa paŋ ku mulaŋ warni dologo ktai, ku kaŋ amlai war hlai na sɗik gaini gari ɗa lai, gaini adumai na maɵagai na sulu lai.

⁴Ku ka Aaron gaiɗi alini mini gumu n’e nivi gaini EPIƊ-ƊAI woni, ku miɗi gaini yem lai kapai e zi edi hilu.

⁵Asakal par, ku wiini sapakai zi sda ɗa sini Aaron: rob, rob na gaini tikiri, efod gaini ɵubu na sini didikni lai. Ku rgaŋ sini paɵani gaini santir na wiini efod ɗa.

⁶Ku fiɗini midini gaini kadamul, ku rga wala zi or na maini fler ɵa, n’a siŋka ɓa aŋ gaini viri edi ɗaw sini kadamul ɗa lai.

⁷Asakal par ku tika emel n’e tiki ɗai war sda gaini, ku miŋni midini kapai a sa edi mini sdani.

⁸Ku kiɗisi alini wuza, ku wiiɗi rob siɗi lai.

⁹Ku ɵa sarpa paɵani Aaron gaiɗi alini, ku piɗi juki midiɗi, ku miliɗi war sda zi pai zi ɓaka, sda zi pai zi ɓaka ɗa aga a sa war tiɗi haa kureɗ pini gadai n’a sɗa aŋ bunda kai. Ku miliɗi war sdaɗi.

¹⁰Ku kasi gari ɗa mini gumu n’e nivi gaini EPIƊ-ƊAI woni, Aaron gaiɗi alini e mili tiɗi miɗini.

¹¹Ku fuɗa gari hanɗa mini hlai na e niyi amlai war gumu n’e nivi gaini EPIƊ-ƊAI woni.

¹²Ku yima felni ɗa, ku girdaŋ sini miyokni gûwiŋ zi ɓaka ɗa gaiɗi ahi tuku, pini fel n’a hina ku maŋ azumai ezini gûwiŋ zi ɓaka.

¹³Emel na warni paŋ ku mulaŋ, gaini eɵeɵet, gaini ɓlaɓlamai na sulu gaini emel na sini paŋ, gaini hlaini paŋ ku yaŋ edi amai midini gûwiŋ zi ɓaka.

¹⁴Amma neŋni gari ɗa, gaini amurni gaini fulai na warni ku yaŋ edi gaini afu edi duɓani kaŋ par. Hanɗa a ɓaka na burini tuwur.

¹⁵Asakal par ku yima adime ktai, Aaron gaiɗi alini e mili tiɗi midini.

¹⁶Ku ɵa wulani, ku yima felni, ku yamaŋ sini gûwiŋ zi ɓaka haa ku gunaŋ amlai gun.

¹⁷Ku ɗuklaŋ daf daf, ku ma wazagai na warni gaini ɓaɓarani edi, ku mulaŋ amai midini neŋ na gaini ɗûkli daf daf gaini humokni lai.

¹⁸Ku ya adime hanɗa amai midini gûwiŋ zi ɓaka, hanɗa a ɓaka zi yi na burini EPIƊ-ƊAI, a lugos na pɗem gara, a ɓaka na afu a yaŋ edi burini EPIƊ-ƊAI.

¹⁹Asakal par ku yimasi adime n’ag'aŋ sulu ɗa, Aaron gaiɗi alini e mili tiɗi midini.

²⁰Ku ɵa wulani, ku yima felni agwi ku girdaŋ mini ɵimani Aaron na wus gaini na wiiɗi alini lai, ku girdaŋ sini ahi tiɗi na wus n’amai gaini ahini eziɗi na wus n’amai ɗa lai. Ku yama fel sini gûwiŋ zi ɓaka haa ku gunaŋ amlai gun.

²¹Ku ma fel n’amai midini gûwiŋ zi ɓaka par agwi gaini emel n’e tiki ɗai war sda gaini agwi lai, ku yamaŋ sini Aaron gaini sapakaini, siɗi alini gaiɗi sapakaiɗi lai, nɵa Aaron gaiɗi alini, gaini sapakaiɗi lai aga e bindi edi sɗik.

²²Ɓaka na wiini adime n’ag'aŋ sulu ɗa a na buri tiki na war sda. Ku mula emel na sini ɗa, ku ɗukla giɗerni, ku mula emel na sini wazagai na warni, ku tika eɵeɵetni gaini ɓlaɓlamai na sulu gaini emel na sini lai, gaini ɓul na wus ɗa lai.

²³Warɗi dologoi zi peŋ na is arni kai n’a na wuza Ta EPIƊ-ƊAI par, ku tikasi peŋ na wulla ktai, gato n’e hiɗiŋ gaini emel ktai, gamla ktai lai,

²⁴ku tapa wazagai hanɗa paŋ ku saŋ tini Aaron gaiɗi alini, ku siŋkiɗi de n’e kiŋsi amlai wuza gaini ɗa.

²⁵Asakal par ku mulaŋsi tiɗi par ku yaŋ edi amai midini gûwiŋ zi ɓaka, amai par midini ɓaka zi yi ɗa. Hanɗa a lugos na pɗem gara wuzani EPIƊ-ƊAI, a ɓaka na afu a yaŋ edi burini EPIƊ-ƊAI.

²⁶Ku tika didikni adime n’e tiki Aaron war sda gaini ɗa, tuku dama ku za de na ku kaŋsi amlai wuza gaini ɗa, asakal par ku tikaŋ aŋ wiiku.

²⁷Aga ku miɗiɗi ɓa: Didikni adime gaini ɓul na wus n’e tikiŋ war sda gaini, n’e zi de n’e kiŋ amlai wuzani EPIƊ-ƊAI gaini lai ɗa, a wiya Ta EPIƊ-ƊAI.

²⁸Aga a hina aŋ wiini Aaron gaiɗi alini ɵa haa kureɗ pini gadai n’a sɗa aŋ bunda kai. Aliɗi Izrayel aga e ɗûkli neŋ hanɗa sini farai n’e ziŋa ɓaka zi ɵeɗ wiya Ta EPIƊ-ƊAI gaini paŋ, e siŋni wiini Aaron gaiɗi alini.

²⁹Aaron a mra li ɗa, sapakai zi sda na wiini a hina tiɗi pinzibani, e wiŋ siɗi war mefeŋ n’e mi emel n’e tiki ɗai war sda gaini li midiɗi, e tikiɗi li war sda.

³⁰Pai zi ɓaka n’abai n’aga a suma arbaɗi alini, n’a sumna war balamni Aaron ɗa aga a wûti sapai hanɗa sini haa mefeŋ, asakal par a niya amlai war gumu n’e nivi gaini EPIƊ-ƊAI woni aŋ za ɓaka amlai war hlai na sɗik.

³¹Adime na e tikiɗi war sda gaini ɗa, ku da neŋni ɗa war hlai n’a zizina burini, war hlai na sɗik.

³²Aaron gaiɗi alini e limi neŋni adime hanɗa gaini peŋ na war dologo ɗa mini gumu n’e nivi gaini EPIƊ-ƊAI woni.

³³Wala n’e zi ɓaka burini tuwurɗi gaini war mefeŋ n’e tikiɗi war sda, n’e siɗi edi mini sdaɗi warni ɗa, e limiŋ edi nagai kiiɗi taaha, ɗif zamai a tetemaŋ kai buri ɓa a simi na sɗik.

³⁴Pini neŋ zaw peŋ a fana li amai ɗa, ku yaŋ edi, e simiŋ kir kai buri ɓa a simi na sɗik.

³⁵Aga ku za sini Aaron gaiɗi alini maini na mu guduku gaini nɵa. Fet na wiini tikiɗi na war sda ɗa aga te za haa mefeŋ muguzak.

³⁶Mefeŋ paŋ ku fuɗa gari suuwa suuwa aŋ ɓaka na burini tuwur. Ku za ɓaka burini tuwur n’aŋ midini gûwiŋ zi ɓaka ta lai, asakal ku ma emel midini kapai a za edi sɗik.

³⁷Aga ku za ɓaka na burini tuwur n’aŋ midini gûwiŋ zi ɓaka ɗa haa mefeŋ muguzak, ku zaŋ edi sɗik haa mefeŋ muguzak lai. Nɵa gûwiŋ zi ɓaka ɗa aga a bunda sɗik gara, wala n’a tika li sini sini paŋ a bunda sɗik.

³⁸Wala n’aga ku za ɓaka gaini amai midini gûwiŋ zi ɓaka a na maini nɵa: Alini adumai na maɵagai sulu, na buza ktai ktai yuvai paŋ ɵa haa kureɗ.

³⁹Adime na ktai ku za ɓaka gaini gorof par, n’ag'aŋ sulu koskoi lai.

⁴⁰Adime n’e fiɗiŋ gorof par, ku kasi avudi na hiniŋ kilo hu gaini gal n’e hiɗiŋ gaini emel na gaini futini litir ɗaw gaini gal, litir ɗaw gaini gal na wiini vin lai.

⁴¹N'e fiɗiŋ koskoi na futi te nawa sek ɗa, ku kasi wazagai pini maini na gorof par nɵa lai. Aga ku zaŋ aŋ ɓaka n’a luguza pɗem, n’a ya edi gaini afu burini EPIƊ-ƊAI.

⁴²Hanɗa a ɓaka zi yi n’aga e ziŋ kûreɗ-kûreɗ haa sini pinzibaku na asakal sek, e ziŋ mini hlai na wiini gumu n’e nivi gaini EPIƊ-ƊAI woni, wuzani arni EPIƊ-ƊAI, woni hlai hanɗa aga mu nava gaiki lai, mu muɗa gaiki lai.

⁴³Aga mu nava gaiɗi aliɗi Izrayel woni, hlai ni ɗa abai na wiya aga te bundaŋ edi sɗik.

⁴⁴Aga mu za gumu n’e nivi gaini EPIƊ-ƊAI woni gaini gûwiŋ zi ɓaka edi sɗik, Aaron gaiɗi alini mu ziɗi edi sɗik lai kapai e zi sda zi pai zi ɓaka na wiya.

⁴⁵Aga mu sumna arbaɗi ali Izrayel, mu za aŋ Alaw na wiiɗi.

⁴⁶Aga a yima midiɗi ɓa, Ta n’Epiɗ-ɗai Alaw na wiiɗi, mu miliɗisi edi war Egipte par ɓa kapai mu sumna arbaɗi. Ta m’Epiɗ-ɗai Alaw na wiiɗi.