Read Mousgoum Niyi n’edi 3 Bible Online

Niyi n’edi 3 - Mousgoum bible

Niyi n’edi 3

¹Musus a nafu aŋ giɗima adumai na gaini haakai na wiini Yetro, pai zi ɓaka na Madiyan, na suwulni. Mefeŋ ktai a ka farai ɗa edi par midini basga na kaɗataŋ, gobi siɗi huwuŋ na wiini Alaw na yikiɗi ɓa Horeb.

²Sleŋ na wiini EPIƊ-ƊAI a siŋka sini arni, arni afu par arbani luwuŋ zi hedek par, Musus a tala afu a na ya, amma luwuŋ a ya kai.

³Musus a hiina a muɗa: Mu gunasi nɵa par mu tala wala zi siŋki n’abai hanɗa haw. Luwuŋ zi hedek ɗa a ya kai ɗa maɵa maɵa ɗa?

⁴Won hlai n’EPIƊ-ƊAI a tala ɓa Musus a na guna buri a tala wala n’a za ɗa, a yikaŋsi amlai arbani luwuŋ zi hedek ɗa par: Musus, Musus; Musus a wiyini seŋ: M'aŋ na.

⁵EPIƊ-ƊAI a miɗini: Ku torosi sini hlai hanɗa gobi kai, wa harabak n’azuku edi, buri hlai na k’aŋ woni ɗa, a hlai na sɗik

⁶A muɗa: Ta m’Alaw na wiiɗi tamaiku, m’Alaw na wiini Abraham, na wiini Isaak, na wiini Yakob lai. Musus a bara sapa arni bar, buri a huna ɓa aga a tala Alaw gaini arni.

⁷EPIƊ-ƊAI a muɗa: Mu tala gir n’aŋ siɗi ɗaiŋa na war Egipte ɗa li, mu tala tuwi n’e ɗa tûwi won hlai na ɗai n’abakai na midini sda zi gir e ɗa ɵiɓiɗi ɗa. A jre, e ɗa siɗi gir.

⁸Ta mu niyasi azumai buri mu piliɗi edi war tiɗi ɗai n’Egipte ɗa par, mu miliɗi edi warɗi afti hanɗa par, mu kiɗi midini afti na pɗem, n’abai, na emelni ami gaini fiyaw lai a ka warni. Afti na wiiɗi Kananiyakai, Hittitekai, Amoritekai, Perizitekai, Hivitekai gaiɗi Yebuzitekai lai.

⁹Tiyana ɗa, tuwiɗi aliɗi Izrayel a wasi haa amai sa ta, mu tala gir na e ɗa siɗiŋ tiɗi ɗai n’Egipte lai ɗa,

¹⁰tiyana ɗa, faka amai, hala sini Faraw, ku miliɗisi aliɗi Izrayel na ɗaiŋa edi war Egipte par.

¹¹Musus a miɗini wiini Alaw: Ta mu siya ɗa na kapai mu hala sini Faraw aŋ miliɗisi ɗai na Izrayel edi war Egipte par ɗa?

¹²Alaw a miɗini: Ta m’aŋ gaiku. Wala n’a siŋka ɓa mu ɵunuku muta ɗa a hanɗa. Won hlai na ku miliɗisi aliɗi Izrayel edi war Egipte par li, tuku gaiɗi nagai lai aga ki hûrgi azumai wuza amai midiɗi huwuŋ hanɗa.

¹³Musus a miɗini wiini Alaw: Aftini, ta aga mu hala siɗi aliɗi Izrayel, aŋ miɗiɗi ɓa: Alaw na wiiɗi tamaiki a ɵinaŋasi siki, amma na ɓa e zilbiŋa li ɓa: E yikiŋ maɵa ɗi ɗa, aga mu wiyiɗi seŋ maɵa ɗa?

¹⁴Alaw a miɗini wiini Musus: E yikiŋa ɓa Mu na. A miɗini: Aga ku miɗiɗi wiiɗi aliɗi Izrayel maini nɵa: "Mu na" a ɵinaŋasi siki.

¹⁵Alaw a miɗini wiini Musus pra: Aga ku miɗiɗi wiiɗi aliɗi Izrayel maini nɵa: Epiɗ-ɗai Alaw na wiiɗi tamaiki, Alaw na wiini Abraham, na wiini Isaak na wiini Yakob lai a ɵinaŋasi siki. Hanɗa a yikiŋa na haa kureɗ. Haa hlai n’a vada kai n’a vada kai, aga e yikiŋa maini nɵa.

¹⁶Hala, ku tipiɗi n’abakai n’arbaɗi aliɗi Izrayel paŋ azumai, ku miɗiɗi ɓa: Epiɗ-ɗai Alaw na wiiɗi tamaiki, Alaw na wiini Abraham, na wiini Isaak, na wiini Yakob lai a siŋka sini ara a muɗaŋa maini nɵa: Mu rga wara buri mu zina piki, buri gir n’e ɗa e ziɓki war Egipte ɗa.

¹⁷Seŋŋa a ɗiya ɓa, mu milikisi edi war gir n’Egipte par aŋ kiki midini aftiɗi ka naaniakai gaiɗi Hititekai gaiɗi Amoritekai, gaiɗi Perezitekai gaiɗi Hivitekai gaiɗi Yebuzitekai lai, a afti na emel n’ami gaini fiyaw lai a ka warni.

¹⁸Nagai aga e ɵini muku. Tuku gaiɗi n’abakai n’arbaɗi ɗai n’arbaki, aga ki hili aha sini pai n’Egipte aŋ miɗi gaini. Ki miɗini ɓa: Epiɗ-ɗai Alaw na wiiɗi Hebrekai a siŋka sini aryi. Tiyana ɗa siyi futi aŋ hili edi war basga aŋ zi ɓaka zi yi wiini Epiɗ-ɗai Alaw na wiyi. Hili hanɗa aga a za mefeŋ hu.

¹⁹Mu sɗa edi gaglai ɓa pai n’Egipte aga a hiniki aŋ hili kai. Sai na ɓa dewele a za midini li.

²⁰Nɵa aga mu halaɗi midini gaini spak, aga mu za wazagai n’abakai zi hiila midini afti n’Egipte, asakal hanɗa aga a hiniki ki hili.

²¹Aga mu za yim siɗi ɗaiku, kapai ɗai n’Egipte e hiini buriɗi, kapai ki hili sek ɗa, ki hili gaini tiki piki ca kai.

²²Muni na Izrayel paŋ te zilba wazagai zi arzaŋ, zi or gaini sapa lai tiɗi muni na ɵimaɗi, zaw na te na aha gaiɗi aŋ fuŋ dam. Ki siŋɗi midiɗi aliki na maɵagai gaiɗi na falakai aŋ libi. Gaini hanɗa aga ki ɗugûsi wazagaiɗi ɗai n’Egipte.