Read Mousgoum Niyi n’edi 31 Bible Online

Niyi n’edi 31 - Mousgoum bible

Niyi n’edi 31

¹EPIƊ-ƊAI a miɗini wiini Musus pra:

²Tala mu vara Betsalel n’ahini Uri, na tiyni Hur na war pinzibani Yuda.

³Mu vaŋ gaini seze na wiya, gaini yel, gaini siɗi, gaini siɗi n’a za wazagai paŋ gaini,

⁴kapai a zizina wazagai n’a hiinaŋ, a za sdani or arzaŋ gaini kiiya.

⁵Kapai a zizina ali-fuŋ na pɗamai a duɓugaŋ sini wazagai, a kilɗa luwuŋ, a sɗa wala zi zi paŋ,

⁶Mu tika Ohaliyab n’ahini Ahisamak na war pinzibani Dan aŋ ɗif n’aga wulani, mu sa yel war humokɗi ɗai paŋ n’e siɗi zini wazagai kapai e zi wazagai na mu muɗuku gaini paŋ, maini:

⁷gumu na e nivi gaini EPIƊ-ƊAI woni, Zunduk zi bonu, wala n’e dûgû mini gaini, gaini wazagai n’e zi sda gaini amlai war gumu paŋ.

⁸Tabel gaini wazagai n’e zi sda midiɗi gaini, wala n’e higi lampa sini na gaini or na gaini futini, gaini wazagai n’e zi sda sini gaini paŋ, gûwiŋ zi ɓaka na wiini wazagai zi ɗûgûdi zi lûgûzi gaini.

⁹Gûwiŋ zi ɓaka na wiini ɓaka zi yi, gaini wazagai n’e zi sda midini gaini paŋ, daya gaini wala n’e tikiŋ azumai pini,

¹⁰Sapa zi sda, sapa na sɗik na wiini pai zi ɓaka Aaron, sapa n’alini aga e wiŋ siɗi buri sda zi pai zi ɓaka.

¹¹Emel n’e tiki ɗai war sda gaini, gaini wazagai zi ɗûgûdi zi lûgûzi n’a luguza pɗem na war hlai na sɗik, e zi wazagai na mu muɗuku gaini, kal kal maini na mu muɗuŋku nɵa.

¹²EPIƊ-ƊAI a miɗini wiini Musus,

¹³tuku ɗa, ku miɗiɗi wiiɗi aliɗi Izrayel ɓa: Ehini midiɗi a wula gaini Sabbat ɗa kai zaŋ, buri hanɗa a wala zi siŋki n’arba gaiki tiki haa sini pinzibaki n’asakal sek, kapai ɗai e siɗi ɓa, mu ziki edi sɗik ɗa mu Ta EPIƊ-ƊAI.

¹⁴Ki sini hormo wiini Sabbat ɗa, buri a mefeŋ na sɗik buriki, n’a sini hormo wiini mefeŋ hanɗa kai a nava fiɗi n’edi, n’a za sda war mefeŋ hanɗa, a nava birgi edi arbaɗi ɗaini par.

¹⁵Mefeŋ na ɵaara ɗa ɗai e zi sdaɗi woni, amma mefeŋ n’ag'aŋ muguzak ɗa a Sabbat, a mefeŋ zi si n’amla n’a sa edi wiini EPIƊ-ƊAI. Asiya ɗi paŋ n’a za sda li war mefeŋ Sabbat ɗa aga a nava fiɗi n’edi.

¹⁶Aliɗi Izrayel aga e sini hormo wiini Sabbat, e ziŋ kûreɗ-kûreɗ haa sini pinzibaɗi na asakal sek, maini bonu n’a vada kai nɵa.

¹⁷Hanɗa a wala zi siŋki na haa kureɗ arba gaini aliɗi Izrayel, buri ɓa Ta EPIƊ-ƊAI, mu za hlai n’amai gaini afti war mefeŋ na ɵaara ɗa, war mefeŋ n’ag'aŋ muguzak ɗa, sa amla, suŋfaŋa a waya sa.

¹⁸Won hlai n’Alaw a vada miɗini na sini Musus amai midiɗi huwuŋ Sinai li ɗa, a sini ali-fuŋ na babɗamai sulu na wiini bonu, ali-fuŋ na babɗamai n’Alaw a ɗo midini gaiɗi ahini tini.