Read Mousgoum Niyi n’edi 32 Bible Online

Niyi n’edi 32 - Mousgoum bible

Niyi n’edi 32

¹Won hlai na ɗai e tili ɓa Musus a niyasi a niyi azumai midiɗi huwuŋ par gobi kai, e tipi sini Aaron e miɗini: Ziyi alawai n’aga e ɵi wuzaɗi, buri ɓa Musus, ɗif n’a miliyisi edi war Egipte par ɗa a navaŋ ɗa, a ma kai mi siɗi kai.

²Aaron a miɗiɗi: Eili ki milisi wala na ɵime zi or na ɵimani falakaiki, na ɵimani aliki na maɵagai gaiɗi na falakai lai, ki kiŋŋasi.

³Ɗai paŋ e wisi wazagai na ɵimani edi, e kiŋnisi wiini Aaron.

⁴A mulaŋ tiɗi par, a hiliyaŋ, a rga wala maini ɵeŋ ɵa gaini, asakal par e miɗi: Izrayel alawai na wiiki ɗa a na, n’a milikisi edi war Egipte par ɗa.

⁵Won hlai na Aaron a tala hanɗa, a rga gûwiŋ zi ɓaka wuzani ahi ɵeŋ ɗa zaw, a ɗuula a muɗa: Dawai ɗa fet a na burini EPIƊ-ƊAI.

⁶Dawaini ɗa e fiki amai gorof, e zi ɓaka zi yi gaini ɓaka zi ɵeɗ lai. Ɗai e simni azumai e simi, e ci asakal par e fiki amai aŋ ɵi dawaŋ wuzani Alaw.

⁷EPIƊ-ƊAI a miɗini wiini Musus: Niya azumai, buri ɗaiku e kɵi war tuwur n’abai, ɗai na ku miliɗisi edi war Egipte par ɗa.

⁸Futi na mu siŋkitiɗi e hiniti edi gaini yafai kai, e rgi ahi ɵeŋ gaini kawai na hiliya, e hûrgi azumai wuzani, e zini ɓaka, e miɗi lai ɓa: Aliɗi Izrayel Alawku ɗa a na, ni n’a milikisi edi war Egipte par.

⁹EPIƊ-ƊAI a miɗini wiini Musus: Ɗai hanɗa mu sisiɗi, e ɗi ɗai na midiɗi gdaŋ gara.

¹⁰Tiyana ɗa, hinaŋa mu za na mu hiinaŋ ɗa, hiy na wiya aga a sumna midiɗi, mu vidiɗi edi kafa, asakal par mu bunduku tuku aŋ pinziba n’abai.

¹¹Amma Musus a siika gaini gdaŋ mini Epiɗ-ɗai Alaw na wiini aŋ tikini hangalni azumai, a muɗa: EPIƊ-ƊAI, tuku ku za hiy siɗi ɗaiku nɵa buri maɗa, e ɗi ɗaiku na ku miliɗisi edi warɗi Egipte par gaini spak n’abai zi mili hunai piɗi ɗai kai ɗi?

¹²Na ɓa ku za li nɵa ɗa, ɗai n’Egipte aga e miɗi ɓa: A miliɗi edi na ɗa buri meefeŋɗi kapai a fiɗiɗi edi amai midini huwuŋ, a vidiɗi edi midini afti par lai. EPIƊ-ƊAI, hina hiyku mak, meefeŋ na ku dara ku zaŋ siɗi ɗaiku ɗa hinaŋ mak.

¹³Hina muduku a kɵa gaini Abraham gaini Isaak gaini Yakob na ɗaiku, na ku hiɗi wala muku gaini suku dama, tuku ku miɗiɗi lai ɓa: Pinzibaki aga mu sisiɗaŋ viya maini meeɵek nɵa, afti na mu miɗiki gaini aga mu saŋ siɗi, nagai aga e miliŋ aŋ bulum haa kureɗ lai.

¹⁴Nɵa EPIƊ-ƊAI a hina meefeŋ n’a firiya a zaŋ siɗi ɗaini ɗa edi.

¹⁵Musus a niyasi azumai amai midiɗi huwuŋ par, gaini ali-fuŋ na babɗamai n’e ɗû gadai na wiini bonu warni sulu war tini, ali-fuŋ n’e ɗû aŋ sini warni galni sulu paŋ, na par lai, na par lai.

¹⁶Ali fuŋ na babɗamai hanɗa a sda n’a zaŋ ɗa a Alaw, ɗû n’aŋ warni, a ɗû na wiini Alaw mal, a ɗoŋ warni ali-fuŋ hanɗa.

¹⁷Won hlai na Yosva a ɵina suura na wiiɗi ɗai, a miɗini wiini Musus: Suura na wiini hatam a na aha war kaŋ.

¹⁸Amma Musus a wiyini seŋ: A suura na wiini rɗi n’amai kai, a suura na wiini kɵi na wuzaɗi gawɗi kaalai, amma na mu ɵinaŋ na ɗa a suura na wiini yama.

¹⁹Won hlai n’a ŋasi gobi sini kaŋ, Musus a tala ahi ɵeŋ gaini didimi na ɗai e ɗa didimi, a za hiy n’abai gara, a poko ali-fuŋ n’aŋ tini edi, a gzilaŋ edi azumai eziɗi huwuŋ.

²⁰A yima ahi ɵeŋ n’aliɗi Izrayel e rgiŋ ɗa, a yaŋ edi, a saraŋ edi kriiɗ maini avudi ɵa, a mula bononi arbani yem a siŋɗi miɗi aliɗi Izrayel aŋ ci.

²¹Musus a miɗini wiini Aaron: Ɗai hanɗa, e zuku tiɓ ɵa ɗa a maɗa, na kapai ku kasi tuwur n’abai maini hanɗa nɵa midiɗi ɗa?

²²Aaron a wiyini seŋ: Epin geza ku za hiy sa kai, tuku mal ku siɗiɗi ɗai hanɗa ya, e zi meefeŋ gobiiya.

²³E miɗiŋa ɓa: Mu ziɗi alaw ktai n’a ɵa wuzaɗi, buri ɓa Musus n’a miliɗisi edi war Egipte par ɗa wala n’a navaŋ karɗi kai.

²⁴Mu zilbiɗi ɓa: Ɗif n’aŋ gaini or ɗa asiya ɗa? E milisi wala ɵime na ɵimaɗi e kiŋŋasi. Mu hilyaŋ gaini afu, mu rga ahi ɵeŋ hanɗa gaini.

²⁵Nɵa a yima midini Musus ɓa aliɗi Izrayel e bindi tini ɗif a ɵa miɗi kir kai, buri ɓa Aaron a hitriɗi aŋ zi maini hanɗa ɵa. Nɵa e hini fu na aŋ wala zi yewere na wiiɗi gawɗi.

²⁶Musus a ɗiya edi mini magalani kaŋ a muɗa: Nagai n’e diri EPIƊ-ƊAI ɗa e tipisi gaya; pinziba ni Levi e tipi gaini Musus.

²⁷A miɗiɗi: Epiɗ-ɗai Alaw na wiiɗi Izrayel a na muɗa maini nɵa: Ɗif paŋ a gaɓa kaɵkarni paɵani, ki hili ki vigi warni kaŋ mini magala magala paŋ, war gal ktai par haa edi ta; ki fiɗiɗi tawalakaiki, marmakaiki gaini zagalakai lai edi. Ki wiyi pra, ki wiyi.

²⁸Pinzibani Levi e zi pini gadai na wiini Musus, war mefeŋni ɗa ɗai e miɗi gobi dubu hu piɗi aliɗi Izrayel.

²⁹Musus a miɗiɗi: Girna ɗa, EPIƊ-ƊAI a miliki li war sda na wiini, buri aliki na gaiɗi tawalakaiki maa ki girini siɗi, ki fiɗiɗi edi, nɵa girna EPIƊ-ƊAI a ɓikiki. Musus a siiwa Alaw buri a siɗi ni

³⁰Dawaini Musus a miɗiɗi wiiɗi ɗai na Izrayel: Ki zi tuwur n’abai, tiyana mu dara mu hala amai sini EPIƊ-ƊAI, ablaŋtaŋkai Alaw aga a ɵina tûwiŋa, a girda tuwurki wiini edi ɗi!

³¹Musus a wayasi sini EPIƊ-ƊAI a miɗini: Hai EPIƊ-ƊAI! Ɗai hanɗa e zi tuwur n’abai, e rgi alaw ktai zi or.

³²Amma tiyana siɗi ni burini tuwurɗi, na ɓa ɵa kai ɗa mu siiwuku ɓa ku haza yikiŋa na ku ɗoŋ war maktuɓ edi grid.

³³EPIƊ-ƊAI a miɗini wiini Musus: Mu haza edi war maktuɓ par ɗa, a yikini ni n’a za meefeŋ li sa ɗa.

³⁴Tiyana ɗa, hala, kiɗi ɗai warni hlai na mu muɗuku gaini ɗa, ɵeŋ na wiya aga a ɵa wuzaku. Amma ta ɗa, mefeŋ na mu fakaɗi li ɗa, aga mu ziɗi gir burini tuwurɗi.

³⁵EPIƊ-ƊAI a hinasi gir midiɗi aliɗi Izrayel buri e miɗini wiini Aaron buri a rgiɗi ahi ɵeŋ.