Read Mousgoum Niyi n’edi 33 Bible Online

Niyi n’edi 33 - Mousgoum bible

Niyi n’edi 33

¹EPIƊ-ƊAI a miɗini wiini Musus: Fikiɗi woni na par gaiɗi ɗai na ku miliɗisi edi war Egipte par ɗa, ki hili midini afti na mu ha wala maa, mu za ɵinini-ha lai ɓa aga mu siŋni wiini Abraham, wiini Isaak gaini Yakob lai, ɓa aga mu siŋɗi wiini pinziba ni.

²Aga mu ɵinaɗi ɵeŋŋa wuzaku, aga mu birgiɗi: Kananiyakai, Amoritekai, Hittitekai, Perizzitekai, Hivitekai gaiɗi Yebuzitekai lai edi wuzaku.

³Hili midini afti na fiyaw gaini emelni ami a ka warni, ta gaini mada dama aga mu halaɗi gaiki kai, buri tiki ki ɗi ɗai na miɗiki gdaŋ, aga mu vidiki edi warɗi futi kadai meere.

⁴Won hlai n’aliɗi Izrayel e ɵini seŋ na meefeŋ hanɗa, e wi sapa zi tûwi siɗi, ɗif a wa sapa na pɗem sini kir kai.

⁵EPIƊ-ƊAI a miɗini wiini Musus, miɗiɗi wiiɗi aliɗi Izrayel: Tiki ki ɗi ɗai na midiɗi gdaŋ, na ɓa mu hala gaiki burini hlai n’agwi kadai aga mu vidiki edi. Tiyana ɗa, fiki sapakaiki zi fet ɗa edi siki par, asakal par aga mu sɗa wala na mu zaŋ siki ɗa.

⁶Aliɗi Izrayel e fiki sapakaiɗi zi fet edi, won hlai n’e fikisi siɗi huwuŋ Horeb par.

⁷Won hlai na aliɗi Izrayel e pi kaŋɗi li ɗa, Musus a mula wazagai na wiini gumu gaini ɗa, a hala a paŋ edi gaigai sini kaŋ par tiɓ a sini yiki ɓa: Gumu na e nivi gaini EPIƊ-ƊAI woni. Nɵa asiya ɗi paŋ n’a firiya a zilba dirini EPIƊ-ƊAI ɗa a niyasi edi war kaŋ par a halasi edi mini gumu hanɗa.

⁸Hlai paŋ na Musus a fakasi li aŋ hala amlai war gumu na e nivi gaini EPIƊ-ƊAI woni warni ɗa, ɗai paŋ e ɗiyi amai ca ca, ɗif paŋ miɗi dilimini zaw zaw, arɗi pini ca haa a niya amlai.

⁹Won hlai na Musus a niya amlai li, ɗugul z'agiyiŋ a niyasi azumai, a ɗiya mini gumu zaw a haɗa kalaŋ gaini Musus.

¹⁰Won hlai na aliɗi Izrayel e tili ɗugul z'agiyiŋ n’a ɗiya mini gumu li ɗa, nagai paŋ e fiki amai, asakal par ɗif paŋ a hurga azumai miɗi dilimini dilimini.

¹¹EPIƊ-ƊAI a haɗa kalaŋ gaini Musus miɗi marɗi maini ɗif n’a haɗa kalaŋ gaini marmaini nɵa. Asakal par a wayasi aha war kaŋ. Amma gawla n’a zina pini, Yosva n’ahini Nun a hina amlai war gumu ɵa dam.

¹²Musus a miɗini wiini EPIƊ-ƊAI: EPIƊ-ƊAI, tala haw, ku muɗaŋa ku tuku ɓa: Mu ɵa wuzaɗi ɗai hanɗa paŋ ktai n’aga ku ɵiɓaŋsi aŋ zina pa ɗa ku siŋkaŋŋa, ku muɗa pra ɓa: Ku sɗaŋa gaini yikiŋa, mu nava yum arku lai.

¹³Tiyana ɗa, na ɓa gazi gazi mu nava yum arku ya ɗa, siŋkaŋŋa hiiniku ɗa, nɵa aga mu suɗuku, mu nava yum arku a suwa pra. Ɗai hanɗa e ɗi ɗaiku, ku hina muduku aŋ wula gaiɗi kai.

¹⁴EPIƊ-ƊAI a wiyini seŋ: Ta dama aga mu hala gaiku, aga mu suku si-n’amla.

¹⁵Musus a miɗini: Na ɓa tuku dama ku hala hili gaiyi kai ɗa, hiniyi war balamyi ca.

¹⁶Na ɓa ku hala gaiyi kai ɗa, ɗai ɗa aga e siɗi ɓa ta gaiɗi ɗaiku mi nivi yum arku maɵa maɵa ɗa? Sai na ɓa ku hala gaiyi li, sai na ɓa ku za pɗem li sa ta gaiɗi ɗaiku a sûwiɗi ɗai zamai na midini afti paŋ ɗa kai ɗi?

¹⁷EPIƊ-ƊAI a wiyini seŋ wiini Musus: Seŋ na ku muɗaŋa hanɗa aga mu zaŋ, buri ku nava yum wuzani ara, mu suɗuku gaini yikuku.

¹⁸Nɵa Musus a miɗini wiini EPIƊ-ƊAI: Mu siiwuku, siŋkitiŋa abaiku ara ta.

¹⁹EPIƊ-ƊAI a wiyini seŋ wiini Musus: Aga mu vugaɗi muku ɗaw, aga mu suŋkuku yikiŋa na ɓa EPIƊ-ƊAI ɗa. Aga mu za yum sini ni na mu dara mu za yum sini, mu hiina haw midini ni na mu dara mu hiina haw burini lai.

²⁰A muɗa pra: Ku kiɗa ku tala wuzani ara kai, buri ɓa ɗif n’a tala ara li ɗa a kiɗa a sumna karni kai.

²¹EPIƊ-ƊAI a muɗa: Tala, hlai zamai aŋ ɵima na gobi amai midiɗi huwuŋ na, ku ɗiya woni zaw.

²²Nɵa won hlai na abai na wiya aga te vuga ɗa, aga mu ŋuyuku war waŋ ktai na sini huwuŋ cok, mu tika ta arku ta haa mu vuga.

²³Asakal par ɗa aga mu tikiti ta edi, ku talaŋasi duɓa par, amma wuzani ara ɗa ɗif a sɗa aŋ talaŋ kai.