Read Mousgoum Niyi n’edi 35 Bible Online

Niyi n’edi 35 - Mousgoum bible

Niyi n’edi 35

¹Musus a tipiɗi aliɗi Izrayel paŋ a miɗiɗi: Wala n’EPIƊ-ƊAI a gada midini aŋ ziŋ ɗa a hanɗa:

²Aga ki zi sdaki war mefeŋ ɵaara, mefeŋ n’ag'aŋ muguzak ɗa a Sabbat, a mefeŋ zi si n’amla, ki siŋni wiini EPIƊ-ƊAI. Asiya ɗi paŋ n’a za li sda war mefeŋ ni ɗa a nava fiɗi n’edi.

³Hlai paŋ n’aga ki simni woni ɗa, ɗif a pa afu ahani war Sabbat kai.

⁴Musus a miɗiɗi wiiɗi aliɗi Izrayel paŋ: Wala n’EPIƊ-ƊAI a gada midini a na maini nɵa:

⁵Ki si like burini EPIƊ-ƊAI arbaki tiki dama, nagai n’a e ziŋ gaini agulɗi paŋ ɗa aga e si like na pinzibani kiini kiini sini EPIƊ-ƊAI maini or arzaŋ, kiya,

⁶Sapa z'ayirni adumai na mekele cih cih, na mekele keŋ, na mekele fel fel, leŋ na gai futini gaini sapa na z'ayirni haakai.

⁷Amurni adumai n’e cûriŋ mekele keŋ, amurni hilif dofen, luwuŋ akasiya;

⁸Emel na war lampa, wazagai zi ɗûgûdi zi lûgûzi n’e tiki ɗai war sda gaini, gaini n’e yiŋ ɗa lai;

⁹ali-fuŋ oniks gaini ali-fuŋ zamai zamai na pɗamai n’e diɓigiŋ siɗi Efod gaini ɵubu na sin didikni pai zi ɓaka.

¹⁰Nɵa nagai n’abakai n’e siɗi zini wazagai hanɗa e hilisi e zi sda paŋ n’EPIƊ-ƊAI a muɗa midini ɗa.

¹¹Hlai zi simni na wiini Alaw, gumuni, wala n’e biriŋ midini, wazagai n’e higiŋ amai gaini, kadreni na gai pi tiɓ tiɓ, luwoŋai na mogokai na paɵani aŋ deŋel, garakaini gaini wala n’e tikiŋ azumai par pini,

¹²Zunduk gaini luwoŋai na mogokai n’e libiŋ gaini, wala n’e dûgi mini gaini, gaini rido n’e ɓûrwi arni hlai gaini,

¹³Tabel gaini luwoŋai na mogokai n’e libiti gaini, wazagai n’e zi sda midiɗi gaini paŋ gaini paŋ n’a sa sini Alaw,

¹⁴wala n’e higi lampa sini, wazagai n’e zi sda sini gaini, lampakaini, emel na warni lampa,

¹⁵gûwiŋ n’e yi wazagai zi ɗûgûdi zi lûgûzi midini, gaini luwoŋai na mogokai n’e libiŋ gaini, emel n’e tiki ɗai war sda gaini, gaini wazagai zi ɗûgûdi zi lûgûzi, gaini rido na min hlai n’e niyi amlai war hlai zi simni na wiini Alaw warni ɗaw,

¹⁶Gûwiŋ zi ɓaka zi yi, griyasni zi kiya, luwoŋai na mogokai n’e libiŋ gaini, gaini wazagai n’e zi sda midini gaini paŋ, daya gaini wala n’e tikiŋ azumai pini,

¹⁷Sapa na sini pakatai, garakaini, wala n’e tikiŋ azumai pini, rido na min magalani pakatai.

¹⁸Luwuŋai na gaini pi tiɓ tiɓ na wiini Hlai zi simni na wiini Alaw, gaini na wiiɗi pakatai gaini sogom na sini lai.

¹⁹Sapakai zi sda n’e zi sda gaini amlai war hlai na sɗik, sapakai na sɗik na wiini pai zi ɓaka Aaron gaini sapa n’alini e wiŋ siɗi kapai e zi sda zi pai zi ɓaka.

²⁰Aliɗi Izrayel paŋ e yimi siɗi edi wuzani Musus par.

²¹Asakal par, nagai paŋ na agulɗi a firiya seŋ hanɗa, n’e ɗa malkakai lai ɗa, e kisi like wiini EPIƊ-ƊAI burini sdani gumu n’e nivi gaini EPIƊ-ƊAI woni, buri sdani zamai zamai paŋ, gaini sapa na sɗik paŋ lai.

²²Nɵa maɵagai gaiɗi falakai na malkakai paŋ e kisi pinzibani wazagai na kiini kiini zi or viya: Wala na ɵime, adoŋo, adoŋo zi tampon gaini madai, e siŋni wiini EPIƊ-ƊAI pini de na wiini sini or ɗa.

²³Ɗif paŋ n’aŋ gaini sapa z'ayirni adumai na mekele cih cih, na mekele keŋ, na mekele fel fel gaini leŋ, gaini ayirni haakai, gaini amurni adumai n’e cûriŋ mekele keŋ gaini amurni hilif dofen ahani ɗa, a kasi hanɗa.

²⁴Nagai paŋ n’e yimi arzaŋ zaw kiiya edi burini EPIƊ-ƊAI ɗa, e kiŋnisi. Nagai paŋ na luwuŋ Akasiya na wiiɗi a na ɗa e kiŋsi buri sda zi zi n’a na ɗa.

²⁵Falakai n’e siɗi hini sapa gara ɗa, e hi sapa z'ayirni adumai na mekele cih cih, na mekele keŋ, na mekele fel fel gaini leŋ lai gaini tiɗi, e kisi hanɗa.

²⁶Falakai zamai n’e siɗi hini sapa gara ɗa, e hi sapa z'ayirni haakai.

²⁷N'abakai n’e ɵi wuze e kisi ali-fuŋ Oniks gaini ali-fuŋ zamai zamai n’e diɓikiŋ siɗi Efod gaini ɵubu na sini didikni pai zi ɓaka,

²⁸gaini wazagai zi ɗûgûdi zi lûgûzi gaini emel n’e miŋ war lampa, n’e tiki ɗai war sda gaini n’e yiŋ burini lugos ɗa lai.

²⁹Aliɗi Izrayel paŋ n’agulɗi a wa melke, maɵagai gaiɗi falakai paŋ e kisi likeɗi na pini diriɗi wiini EPIƊ-ƊAI buri sda na EPIƊ-ƊAI a miɗini wiini Musus gaini.

³⁰Musus a miɗiɗi wiiɗi aliɗi Izrayel: Tili EPIƊ-ƊAI a vara Betsalel n’ahini Uri, na tiyni Hur war pinzibani Yuda,

³¹a vaŋ gaini sezeni, gaini yel gaini siɗi, gaini yel n’a kiɗa a za wala paŋ gaini, maini:

³²Zizinini wazagai na pɗamai, sdani or, arzaŋ gaini kiiya,

³³zizinini ali-fuŋ na pɗamai gaini diɓikini na sini wazagai, kilɗini wazagai na gaini luwuŋ. Gulaini ɓa a sɗa wala paŋ.

³⁴A sini like zi hitri maini n’a siŋni wiini Oholiyab n’ahini Ahisamak war pinzibani Dan ɗa nɵa.

³⁵A siɗi siɗi n’e zi wazagai paŋ gaini, e kiɗi e zizini ali-fuŋ na pɗamai, e zi deseŋ, e hi sapa z'ayirni adumai na gaini futini na mekele cih cih, na mekele keŋ gaini na mekele fel fel lai, e tihiri leŋ na gaini futini. E kiɗi e zizini wazagai gaini luwuŋ, e zi wazagai na pɗamai na ɗif a zaŋ ka duk kaalai.