Read Mousgoum Niyi n’edi 37 Bible Online

Niyi n’edi 37 - Mousgoum bible

Niyi n’edi 37

¹Betsalel a zizina Zunduk gaini luwuŋ Akasiya, mogoni kil sulu gaini gal, brukni kil ktai gaini gal, mogoni n’amai sek ɗa kil ktai gaini gal lai.

²A yima or na gaini sini warni n’amlai lai, duɓani na anene par lai, a tika dalas amai mini ɗawwa haa gaini gûni amlai gun gaini or.

³A zizina girliŋ zi or sini puɗu, a paŋ edi war koŋni na puɗu ɗa, girliŋ sulu war gal ktai, na sulu war gal ktai lai.

⁴A bula luwuŋ Akasiya na mogokai sulu, a yima or sini kaai kaai lai.

⁵A wa luwoŋai hanɗa warni girliŋ na koŋni Zunduk ɗik ɗik kapai e libiŋ gaini.

⁶A zizina wala n’e dûgi mini Zunduk gaini gaini or na gaini futini, mogoni kil sulu gaini gal, brukni kil ɗaw gaini gal lai.

⁷A zizina Kerubimkai sulu gaini or zi gɵi, a ɗiyiɗi edi mini koŋni wala n’e dûgi mini Zunduk gaini ɗa, ktai na par zaw lai, ktai na par zaw lai.

⁸Kerubimkai na sulu n’edi mini koŋni Zunduk e ɗi wala ktai gaini mini Zunduk ɗa.

⁹Kerubimkai e yimi graŋɗi amai kapai e giɗimi wala na mini Zunduk ɗa, e ɗiyi arɗi siɗi marɗi sek, arɗi gaini pi azumai midini wala na e dûgiŋ mini Zunduk ɗa.

¹⁰Asakal par Betsalel ziziniti tabel gaini luwuŋ Akasiya, mogoɗi n’amai kil sulu, brukɗi kil ɗaw, mogoɗi n’amai sek kil ɗaw gaini gal lai.

¹¹A yima or na gaini futini siɗi, a tika dalas miɗi ɗawwa gaini or.

¹²A za kadre siɗi ɗawwa na brukni tiy ɓa, a za dalas sini kadre ɗa ɗawwa gaini or.

¹³A zizina girliŋ puɗu gaini or, a paŋ war koŋɗi tabel na puɗu gobi sini azi na puɗu ɗa.

¹⁴Girliŋ hanɗa a pa ɗa gobi sini kadre n’e ziŋ sini tabel ɗa, a wa luwoŋai na mogokai warni kapai e libiti gaini.

¹⁵A bula luwuŋ Akasiya sulu, a yima or sini kapai e libiti tabel ɗa gaini.

¹⁶A zizina wazagai n’e zi sda gaini amai midiɗi tabel ɗa: Sufura, kop, agazaza gaini wazagai n’e zi ɓaka zi vin gaini, aga a zizinaŋ gaini or na gaini futini.

¹⁷Asakal par Betsalel a zizina wala n’e higi lampa amai sini gaini or na gaini futini zi gɵi. Pini n’azumai gaini keɵkeni, gaini ɵimani n’a waŋ edi, gaini wala n’a pasi amlai par ɗef ɗef gaini flerni lai, e ɗi wala ktai.

¹⁸Sini keɵkeni ɗa e pi graŋ ɵaara, hu war gal na ktai, hu war gal na hanɗa lai.

¹⁹Siɗi tiy paŋ ɗa, ɵimani n’a wa edi a za hu hu, n’a sɗa maini alini luwuŋ Amande ɗa ɵa gaini wala n’a pasi amlai par ɗef ɗef gaini fler lai, siɗi tiy hanɗa ɵa lai, a za nɵa sini tiy na ɵaara paŋ.

²⁰Sini keɵkeni, e zizini ɵemmni n’a wa edi puɗu, n’a sɗa maini alini luwuŋ Amande ɗa ɵa, gaini wala n’a pasi amlai par ɗef ɗef gaini fler lai.

²¹Nɵa e pi wala na ɗef azumai pini tiy na sulu n’azumai par, e pi zamai ktai pini tiy na sulu n’arba, e pi zamai ɗef azumai pini tiy na sulu n’amai ɗa lai. Aga a za maini hanɗa ɵa sini tiy na ɵaara n’a pasi amlai par sini gal n’e higi lampa sini ɗa.

²²Wala n’a pa ɗef ɗef gaini tiy lai paŋ a wala ktai. Hanɗa paŋ e ziŋ gaini or na gaini futini zi gɵi.

²³Betsalel a zizina lampa muguzak n’e higiŋ amai sini wala n’e higi lampa sini ɗa gaini magaz n’e ɗûkli mini mes na wiini lampa gaini wazagai n’e mili bonu edi gaini lai, a zizinaŋ gaini or na gaini futini.

²⁴A zizina wala n’e higi lampa amai sini gaini wazagai n’e zi sda gaini paŋ gaini or na gaini futini kilo doogo doogo hu.

²⁵Asakal par Betsalel a zizina Gûwiŋ zi ɓaka na wiini wazagai zi ɗûgûdi zi lûgûzi, mogoni gaini brukni kal kal, kil ɗaw ɗaw. Mogoni n’amai sek kil sulu. Miyokni gaini sini ɗa a wala ktai.

²⁶A yima or na gaini futini sini: Midini n’amai par, sini paŋ gaini miyokni lai, a ɵa dalas mini suuwa gaini or.

²⁷A zizina girliŋ zi or sulu azumai par pini dalas ɗa war gal na sulu paŋ, na par sulu lai, na par sulu lai kapi e wi luwoŋai na mogokai n’e libiŋ gaini woni.

²⁸A zizina luwoŋai na mogokai hanɗa gaini luwuŋ Akasiya, a yima or sini kaai kaai.

²⁹Betsalel a sa futi sini ɗif n’a sɗa sdani itir na gaini futini, a za emel na sɗik n’e tiki ɗai war sda gaini wazagai zi ɗûgûdi zi lûgûzi na luguza pɗem na gaini futini lai.