Read Mousgoum Niyi n’edi 4 Bible Online

Niyi n’edi 4 - Mousgoum bible

Niyi n’edi 4

¹Musus a wiyini seŋ wiini EPIƊ-ƊAI: Aliɗi Izrayel aga e yimi seŋa kai, e zi pin miɗiŋa kaalai. Aga e miɗiŋa ɓa EPIƊ-ƊAI a siŋka sini arku duk kai.

²EPIƊ-ƊAI a zilbaŋ a muɗa: N'aŋ tuku kai ɗa a maɗa? A wiyini seŋ t'amaraŋai

³Biliti azumai. Musus a biliti azumai, amaraŋai te bunda aŋ wala meefeŋ, Musus a lawa wuzani.

⁴EPIƊ-ƊAI a miɗini wiini Musus: Wûti tuku, yima giɗerni ɗa. A wa tini, a yimaŋ, wala meefeŋ a bunda aŋ amaraŋai war tini.

⁵Gaini hanɗa aga e yimi ɓa Alaw na wiiɗi tamaiɗi, Alaw na wiini Abraham, na wiini Isaak na wiini Yakob lai mu siŋka sa arku ya.

⁶EPIƊ-ƊAI a miɗini pra: Tikiti tuku sin didikku, a tikiti didikni lai. Asakal par a yimitisi tini edi a tiliti dugum aŋ siɗi, te puhura bogorai koɗoɗ.

⁷EPIƊ-ƊAI a miɗini: Wiyiti tuku didikku. Nɵa a wiyiti tini sin didikni, asakal par a yimitisi tini edi didikni par te waya pɗemi maini n’avut ɗa nɵa.

⁸Na ɓa avut ɗa e yimi, e tiki haŋgalɗi sin wala n’a za ɗa kai kaw, aga e yimi pini wala zi hiila n’ag'aŋ sulu na wiini dugum ɗa.

⁹Na ɓa e yimi pin wala zi siŋki na sulu hanɗa kai, e ɵini muku kaalai ɗa, ku bulasi yem agoɗom war ra na Nil par, ku maŋsi amai, yem na ku maŋsi arni ɗa aga a bunda aŋ fel amai midini afti.

¹⁰Musus a miɗini wiini EPIƊ-ƊAI: Za barka EPIƊ-ƊAI, ta, mu ɗif na ma a vurna seŋ pɗem kai, a wala n’a tika pini aɗubudu kaalai, aɗibi kaalai, sini mefeŋ na ku tikasi puku aŋ muɗa gaya kaalai, amma haa war agwiŋa par, ma guma, alesiya guma lai war seŋ zi miɗi ɗa.

¹¹EPIƊ-ƊAI a miɗini: N'a sini miy wiini ɗif asiya ɗa? N'a kiɗa a bunda ɗif ganiŋ zaw ɓurtum asiya ɗa? Muta n’EPIƊ-ƊAI kai ɗi?

¹²Tiyana hala, mu na gaiku war miɗiku paŋ, aga mu suŋkuku wala na aga ku muɗaŋ ɗa.

¹³Musus a miɗini: Za barka, EPIƊ-ƊAI, ɵina ɗif zamai.

¹⁴Nɵa EPIƊ-ƊAI a bunda hiy sini Musus a miɗini: Tawalku na Aaron na Levit ɗa aŋ kai ɗi? Ni a ɗif na mini aŋ vurna seŋ pɗem. Tala a na halasi suku sek, won hlai n’a tuluku li, agulni aga te firiya gara.

¹⁵Tuku aga ku virnini seŋ ɗa ta ta, ku yimiŋni midini gaini futini, Ta aga mu za gaiki, mu siŋkiki wala n’aga ki ziŋ ɗa.

¹⁶Ni aga a miɗiɗi wiiɗi ɗai war balamku, aga a bunda aŋ muku, tuku aga ku bunda maini Alaw n’a miɗini seŋ ɗa nɵa.

¹⁷Amaraŋai hanɗa ku tikiti tuku ɗaw, gaiɗi na, aga ku za wazagai zi siŋki viya.

¹⁸Musus a waisi sin Yetro na suwulni a miɗini: Mu firya mu hala, siɗi zagalakaya na Hebrekai n’e ɗa war Egipte aŋ tiliɗi haw! E ɗa karɗi zaw e ɗi kai ɗi ɗa! Yetro a wiyini seŋ wiini Musus: Hala jam.

¹⁹War Madiyan, EPIƊ-ƊAI a miɗini wiini Musus: Faka amai, waya war Egipte, buri nagai paŋ n’e piyi fiɗiku e mri ca.

²⁰Musus a miliɗi alini gaiɗi munini lai duɓani Ablehoi, a waya war Egipte. Musus a tikiti amaraŋai n’Alaw a miɗini gaiɗi tini ɗaw.

²¹EPIƊ-ƊAI a miɗini wiini Musus: Tiyana na ku na waya war Egipte, won hlai na ku co li aha ɗa, wazagai zi hiila na mu saŋ war tuku paŋ ɗa, ku zaŋ wuzani Faraw, amma Ta aga mu diŋriti agulni, ɗa, a hiniɗi ɗai na Izrayel e hili kai.

²²Tuku aga ku miɗini wiini Faraw ɓa, EPIƊ-ƊAI a na muɗa maini nɵa: Izrayel ɗa ahiya, ahiya na mu waŋ avut.

²³Mu muɗuku ɓa, ku hina ahiya a hala aŋ hurga azumai wuza ɗa, amma tuku ku dara ku hinaŋ kai, nɵa ahiku n’a wa avut ɗa aga mu fuɗaŋ edi.

²⁴Amma war morkoiɗi, duvuk ktai, war hlai n’e fini woni, EPIƊ-ƊAI a paya Musus aŋ fuɗaŋ edi.

²⁵Nɵa tizaw tar, Sefora te tika ahi-fuŋ na mini a suma, te ɵini gûrgle wiini ahiɗi gaini, amur na mini pini ahiɗi ɗa, te girdiŋni sini pini Musus. Te miɗini: Tuku ku wus zi fel na wiya

²⁶Nɵa EPIƊ-ƊAI a hinaŋ. Sefora te muɗa: A wus zi fel burini ɵini gûrgle.

²⁷EPIƊ-ƊAI a miɗini Aaron: Faka amai, hala arni Musus edi war basga na kaɗataŋ, Aaron a hala a nava gaini amai midiɗi huwuŋ na wiini Alaw, a kɵa amai wulani, e firiyi marɗi.

²⁸Musus a miɗini seŋ n’EPIƊ-ƊAI a ɵinaŋsi gaini paŋ wiini Aaron, a siŋkini wazagai zi hiila n’aga a zaŋ ɗa paŋ lai.

²⁹Musus gaini Aaron e hili e tipiɗi n’abakai n’arbaɗi ɗai na wiiɗi Izrayel paŋ azumai.

³⁰Aaron a tika pini aŋ miɗiɗi seŋ n’EPIƊ-ƊAI a miɗiŋnisi wiini Musus ɗa paŋ, aŋ za wazagai zi hiila ɗa wuzani arɗi lai

³¹Nɵa aliɗi Izrayel paŋ e yimi, e siɗi edi gaglai ɓa EPIƊ-ƊAI a tala girɗi ɓa, a halasi na aŋ kûrɗiɗi edi war girɗi par, nɵa e pi kurnaiɗi azumai, e hûrgi azumai aŋ sini kol wiini EPIƊ-ƊAI.