Read Mousgoum Niyi n’edi 40 Bible Online

Niyi n’edi 40 - Mousgoum bible

Niyi n’edi 40

¹EPIƊ-ƊAI a miɗini wiini Musus:

²War mefeŋ n’avut na wiini tile n’avut ɗa, ku pa hlai zi simni na wiini Alaw amai, gumu n’e nivi gaini EPIƊ-ƊAI woni ɗa.

³Ku tika zunduk n’e mili ali-fuŋ na babɗamai warni, ku rga rido ɗa amai arni ɓak.

⁴Ku kiti tabel ɗa amlai, ku ziziniti war balamɗi ta. Ku ka wala n’e higi lampa sini amlai, ku zizina lampakai sini ta ta lai.

⁵Ku ɗiya gûwiŋ zi ɓaka zi or na wiini wazagai zi ɗûgûdi zi lûgûzi wuzani zunduk n’e mili ali-fuŋ na babɗamai na wiini bonu warni ɗa. Ku rga rido min Hlai zi simni na wiini Alaw ɓak lai.

⁶Ku ɗiya gûwiŋ zi ɓaka zi yi wuzani mi Hlai zi simni na wiini Alaw, gumu n’e nivi gaini EPIƊ-ƊAI woni ɗa.

⁷Ku tika daya arbani gumu n’e nivi gaini EPIƊ-ƊAI woni gaini gûwiŋ zi ɓaka ɗa, ku ma yem warni do lai.

⁸Ku rga sapa na siɗi pakatai ɗa amai ɓak ɓak, ku rga rido na miɗi pakatai ɗa amai ɓak lai.

⁹Ku tika emel n’e tiki ɗai war sda gaini ɗa, ku yamaŋ sini Hlai zi simni na wiini Alaw gaini wazagai n’amlai warni paŋ, kapai ku zaŋ edi aŋ sɗik gaini wazagai n’e zi sda amlai warni gaini paŋ. Asakal hanɗa aga a bunda aŋ wiya jre jre

¹⁰Ku ma emel hanɗa midini gûwiŋ zi ɓaka zi yi gaini wazagai n’e zi sda midini gaini lai. Ku ma emel midini gûwiŋ zi ɓaka ɗa, kapai a hina buri sda na wiya kiini.

¹¹Ku ma emel midini daya gaini wala n’e tikiŋ azumai pini ɗa, kapai a bunda aŋ wiya lai.

¹²Ku ka Aaron gaiɗi alini mini gumu n’e nivi gaini EPIƊ-ƊAI woni, ku miɗi gaini yem kapai e zi edi hilu.

¹³Ku wiini sapakai na sɗik sini Aaron, ku mini emel midini, ku zaŋ edi aŋ sɗik kapai a za sda zi pai zi ɓaka na wiya.

¹⁴Asakal par ku yikiɗisi alini ɗa, ku wiiɗi sapakai siɗi.

¹⁵Ku miɗi emel midiɗi maini na ku maŋ midini epiɗi nɵa, aga e zi sda zi paakai zi ɓaka na wiya. Emel na ku miŋɗi midiɗi hanɗa aga a ziɗi aŋ paakai zi ɓaka ɵa haa kureɗ haa sin pinzibaɗi n’asakal sek.

¹⁶Musus a sini edi min sdani, a za kal kal maini n’EPIƊ-ƊAI a miɗiŋni nɵa.

¹⁷War mefeŋ n’avut na wiini tile n’avut na wiini buza n’ag'aŋ sulu, Hlai zi simni na wiini Alaw a pa amai.

¹⁸Musus a sa miɗi buri e pi Hlai zi simni na wiini Alaw amai. Ɗai n’e siɗi zini sda ɗa e mili wazagai n’e tikiŋ azumai pini gaarakai azumai ca ca, e pi gaarakai midini tiɓ tiɓ, e ɵi luwoŋai na mogokai paɵani su su, asakal par e ɗiyi gaarakai ɗa amai ca ca.

¹⁹E pi gumu amai par midini Hlai zi simni na wiini Alaw tiɓ, e dûgi midini ɗa maini n’EPIƊ-ƊAI a miɗiŋni Musus ɗa nɵa.

²⁰E mili ali-fuŋ na babɗamai na wiini bonu warni zunduk, e wi luwoŋai na mogokai n’e libiŋ gaini sini ɗik ɗik, e tiki wala n’e n’e dûgi mini gaini amai par mini ta lai.

²¹E ki zunduk amlai war Hlai zi simni na wiini Alaw ta, e rgi rido n’a ɓurwa arni hlai ɗa amai ɓak, kapai e ŋûyi zunduk na gaini ali-fuŋ na babɗamai zi bonu warni gaini, maini n’EPIƊ-ƊAI a miɗiŋni wiini Musus ɗa nɵa.

²²E ɗiyiti tabel n’e mili peŋ n’a sa sini EPIƊ-ƊAI midiɗi amlai war Hlai zi simni na wiini Alaw, gumu n’e nivi gaini EPIƊ-ƊAI woni ɗa, war gal n’azumai sek, anene par wuzani rido ɗa zaw.

²³E mili peŋ ɗa midiɗi wuzani EPIƊ-ƊAI maini n’EPIƊ-ƊAI a miɗiŋni wiini Musus ɗa nɵa.

²⁴E ɗiyi wala n’e higi lampa sini ɗa amlai war gumu n’e nivi gaini EPIƊ-ƊAI woni, war galni Hlai zi simni na wiini Alaw n’amai sek, arɗi tabel ɗa par.

²⁵E zizini lampakai wuzani EPIƊ-ƊAI ta ta maini n’EPIƊ-ƊAI a miɗiŋni wiini Musus ɗa nɵa.

²⁶E ɗiyi gûwiŋ zi ɓaka zi or ɗa amlai war gumu n’e nivi gaini EPIƊ-ƊAI woni, wuzani rido ɗa,

²⁷e yi wazagai zi ɗûgûdi zi lûgûzi midini maini n’EPIƊ-ƊAI a miɗiŋni wiini Musus ɗa nɵa.

²⁸E rgi rido amai mini Hlai zi simni na wiini Alaw ɓak. E ɗiyi gûwiŋ zi ɓaka zi yi ɗa mini Hlai zi simni na wiini Alaw par, mini gumu n’e nivi gaini EPIƊ-ƊAI woni, Musus a za ɓaka zi yi midini gaini ɓaka na gaini ali seyem, maini n’EPIƊ-ƊAI a miɗiŋni ɗa nɵa.

³⁰E tiki daya arbani gumu n’e nivi gaini EPIƊ-ƊAI woni gaini gûwiŋ zi ɓaka ɗa, e mi yem warni do kapai e mi tiɗi gaini eziɗi lai gaini.

³¹Musus gaini Aaron gaiɗi alini Aaron lai e mi tiɗi gaini eziɗi lai gaini.

³²Hlai paŋ n’e diri e niyi amlai war gumu n’e nivi gaini EPIƊ-ƊAI woni, hlai paŋ n’e diri e ɗiyi wuzani gûwiŋ zi ɓaka ɗa, sai e mi siɗi haw, maini n’EPIƊ-ƊAI a miɗiŋni wiini Musus ɗa nɵa.

³³Musus a miɗiɗi wiiɗi ɗai buri e rgi sapa na siɗi pakatai na wiini Hlai zi simni na wiini Alaw gaini gûwiŋ zi ɓaka. E rgi rido na mini pakatai ɗa amai lai. Musus a vada gaini sda paŋ maini hanɗa nɵa.

³⁴Nɵa ɗugul z'agiyiŋ a gumu n’e nivi gaini EPIƊ-ƊAI woni, abai na wiini EPIƊ-ƊAI te va Hlai zi simni na wiini Alaw ta.

³⁵Musus a kiɗa a niya amlai war gumu n’e nivi gaini EPIƊ-ƊAI woni kai, buri ɓa ɗugul z'agiyiŋ a nafu midini, abai na wiini EPIƊ-ƊAI te va Hlai zi simni na wiini Alaw ta lai.

³⁶Won hlai na ɗugul z'agiyiŋ a yima warni li amai midini gumu n’e nivi gaini EPIƊ-ƊAI warni ɗa, aliɗi Izrayel e fiki e hili wuzaɗi.

³⁷Amma na ɓa ɗugul z'agiyiŋ a yima warni amai kai ɗa e hili kai. E biyi mefeŋ n’a yima warni amai li haw.

³⁸War hiliɗi paŋ ɗa, girvudi ɗugul z'agiyiŋ a sumna midini Hlai zi simni na wiini Alaw ɗa, duvuk ɗa afu a ŋala, aliɗi Izrayel paŋ e tiliŋ gaini arɗi.