Read Mousgoum Niyi n’edi 5 Bible Online

Niyi n’edi 5 - Mousgoum bible

Niyi n’edi 5

¹Asakal wazagai hanɗa, Musus gaini Aaron e hilisi, e nivi gaini Faraw e miɗini: Epiɗ-ɗai Alaw na wiiɗi Izrayel a na muɗa maini nɵa: Hiniɗi ɗaiŋa e hili edi war basga na kaɗataŋ aŋ zi fet buriya.

²Faraw a waya seŋ a muɗa: EPIƊ-ƊAI ni asiya ɗa? Na kapai mu yima seŋni, mu hiniɗi aliɗi Izrayel aŋ hili ɗa, EPIƊ-ƊAI ni mu sɗaŋ kai, aga mu hiniki ki hili kaalai.

³Musus gaini Aaron e wiyini seŋ: Alaw na wiiɗi Hebrekai a siŋka sini aryi, tiyana siyi futi aŋ hili edi war basga na kaɗataŋ aŋ zini ɓaka. Hili hanɗa aga a za mefeŋ hu, na ɓa ɵa kai ɗa, aga a fiɗiyi edi gaini vlak, gaini kaɵkar lai.

⁴Pai n’Egipte a miɗiɗi: Tuku Musus gaini Aaron ɗa, ki firy ki bindiɗi ɗai malamai sin sda buri maɗa?

⁵Faraw a muɗa: Tiyana na ɗai hanɗa e zi viya midini afti ɗa ta ɗa, ki firyi ki ɗiyi sdaɗi ɗi?

⁶War mefeŋ ni dama, Faraw a sa miɗi wiiɗi n’abakai na midini sda zi dewele gaiɗi ɗai n’e tili sda piɗi ɗai na Izrayel maini nɵa:

⁷Ki siɗi hoso n’arni afti wiiɗi ɗai aŋ wi brik maini n’avut par nɵa kir kai. Ehili e pyisi e ɗi nagai dama.

⁸Aga ki ziɗi dewele aŋ wi brik maini n’avut par nɵa, ki wiyipɵini azumai kai, e ɗi ɗai na malamai, e piyi futi ɓa e hili aŋ zi ɓaka na ɗa buri hanɗa.

⁹Kirpiɗi gaini sda s uwa pra, ki hiniɗi baŋa siɗi kai, kapai e zigi ɵimaɗi min seŋ z'ales ɗa kir kai.

¹⁰Abakai na na midini sda zi dewele gaiɗi nagai n’e tili sda piɗi aliɗi Izrayel e fikiɗi sini pai par, e hili e miɗiɗi wiiɗi ɗaiŋa Izrayel ɓa: Pai a muɗasi maini nɵa: Avut sek ɗa, aga e siki hoso zi mili arni afti kir kai.

¹¹Tiki dama ki hili pi piyisi hosoki woɗi paŋ na ki kiɗi ki niviŋ. Amma sdaki na war yivai aga a faya azumai duk kai.

¹²Nɵa aliɗi Izrayel e ɵiri edi midini afti n’Egipte paŋ, aŋ piyisi hoso n’arni afti.

¹³Ɗai n’abakai midini sda zi dewele e pirɵiɗi gaini miɗi na ɓa: Vidi sdaki na war yivai witaw, aga ki wi brik kal kal maini na ɗipar n’e ɗika e siki hoso arni afti ɗa nɵa.

¹⁴E ɵiɓiɗi ɗai n’e tili sda piɗi aliɗi Izrayel ɗa, na war pinzibaɗi Izrayel ɗa, nagai na ɗai n’abakai na wiini Faraw e miliɗi midini sdani ɗa. E miɗiɗi: Piɵini brik n’aŋ miɗiki, aɗibi gaini na girna a va amai maini na ɗipar ɵa kai buri maɗa?

¹⁵Ɗai n’e tili sda piɗi aliɗi Izrayel, e ki tuwiɗi sini Faraw e miɗini: Jaamus, tuku, ku ziyi tiyi ɗaiku zi sda nɵa buri maɗa?

¹⁶E siyi hoso kir kai, e ziyi dewele aŋ wii brik maini n’avut ɗa nɵa, e ɵiɓiyi lai, ɗaiku e zi na ɗa afutini kai kai ɗi.

¹⁷Faraw a miɗiɗi: Tiki ki ɗi ɗai na malamai, ki ɗi ɗai na malamai jre jren nɵa ki miɗi ɓa: Hulumu aŋ zumu ɓaka zi yi wiini EPIƊ-ƊAI na ɗa burini hanɗa.

¹⁸Tiyana wiyi war sdaki ɗa, ɗif aga a siki hosa kir kai, brik n’e tikiŋki miɗiki aŋ wii ɗa a ɗiya maini na ɗipar nɵa, a faya kai.

¹⁹Ɗai n’e tili sda piɗi aliɗi Izrayel, won hlai n’e tili ɓa gdaŋ a sûwiɗi li, buri e miɗiɗi ɓa: Ki pɵini brik ɗa a waya azumai kai, mefeŋ paŋ a na maini n’avut na war yuvai ɵa ɗa!

²⁰E niyisi ahani Faraw par, e hili e nivi gaini Musus gaini Aaron n’e ɗifu ca aŋ biyiɗi.

²¹E miɗiɗi gaini wûle na gdaŋ maini nɵa: Gir na ki kiŋyisi midiyi na ɗa, Alaw a na, ki bindiyi haharai arni Faraw gaiɗi ŋarakaini paŋ, ki siɗi kaɵkar tiɗi buri e fiɗiyi edi gaini.

²²Musus a waya sini EPIƊ-ƊAI pra a miɗini: EPIƊ-ƊAI, ku siɗiɗi gir arɗi ɗai hanɗa nɵa buri maɗa, ku ɵinaŋasi tiɓ buri maɗa?

²³Mu hala mu miɗini seŋku wiini Faraw ya, amma sini mefeŋ hanɗa para a tika pini a ziɗi gir a suwa n’avut pra, amma tuku ku za wala ktai na ku piliɗi ɗaiku edi gaini kai.