Read Mousgoum Niyi n’edi 6 Bible Online

Niyi n’edi 6 - Mousgoum bible

Niyi n’edi 6

¹EPIƊ-ƊAI a miɗini wiini Musus: Girna aga ku tala wala n’aga mu zaŋ Faraw ɗa, pini spak na wiiɗi ta aga a hiniɗi e hili, pini spak na wiiɗi ta aga a birgiɗi edi midini aftini par.

²Alaw a miɗini wiini Musus pra: Muta m’EPIƊ-ƊAI,

³Avut par mu siŋka sa arni Abraham, arni Isaak, arni Yakob lai, war yiki na ɓa: Alaw zi spak paŋ; amma mu siŋka sa arɗi war yikiŋa na ɓa EPIƊ-ƊAI ɗa kai.

⁴Mu za bonu gaiɗi, mu miɗiɗi, mu siɗi afti na Kanaan n’e simni warni aŋ zak aŋ wiiɗi.

⁵Tiyana mu ɵina marava na wiiɗi aliɗi Izrayel, buri gir na ɗai n’Egipte e ɗa e ziŋɗi ɗa. Nɵa mada a kɵa gaini bonu na mu zaŋ gaiɗi.

⁶Buri nɵa ku hala ku miɗiɗi wiiɗi aliɗi Izrayel ɓa: EPIƊ-ƊAI muta, aga mu piliki edi war sda zi bege na wiiɗi ɗai n’Egipte par, war yiki na ɓa bege n’e tikiŋki siki par, gaini spak n’abai gaiɗi ta zi spak lai aga mu piliki edi.

⁷Aga mu bindiki aŋ ɗaiŋa, Ta aga mu bunda aŋ Alaw na wiiki lai, aga a yima miɗiki ɓa ta m’Epiɗ-ɗai Alaw na wiiki, ni n’a plikisi edi war sda zi bege na wiiɗi Egipte par.

⁸Aga mu kiki midini afti na mu yima ta amai, mu ha wala ma ɓa aga mu siŋni wiini Abraham, wiini Isaak, wiini Yakob lai ɗa. Tiyana aga mu siŋki aŋ wiiki, mu muɗa na mu ta EPIƊ-ƊAI.

⁹Musus a halasi a miɗiɗi seŋ hanɗa paŋ wiiɗi aliɗi Izrayel, amma e kiɗi e ziɓiri seŋni kai buri sda zi bege ɗa a suwa gdaŋɗi edi suwai.

¹⁰EPIƊ-ƊAI a miɗini wiini Musus pra:

¹¹Hala ku miɗini wiini Faraw pai n’Egipte ɗa ɓa a hiniɗi aliɗi Izrayel e hili edi midini aftini par!

¹²Musus a wiyini seŋ: Tala! aliɗi Izrayel maa e ɵini maa kai, Faraw aga a ɵina maa maɵa maɵa ɗa! Ta na ma a vurna seŋ edi pɗem kai na ɗa?

¹³Nɵa EPIƊ-ƊAI a miɗini wiini Musus gaini Aaron, a siɗi miɗi n’aga e miɗiŋɗi wiiɗi aliɗi Izrayel gaini Faraw pai n’Egipte lai, kapai a hiniɗi aliɗi Izrayel e niyisi edi war Egipte par.

¹⁴Hanɗa aiikiɗi ɗai n’abakai na tamaini fuŋ na war pinzibaɗi Izrayel: Alini Ruben, ahini Izrayel n’avut e ɗi miɗi: Hanok, Pallu, Hesron gaini Karmi, hanɗa e ɗi nagai na piɗi humuni na wiini Ruben ɗa.

¹⁵Alini Simeyon: Yemuwel, Yamin, Ohad, Yakin, Sohar gaini Sawul n’ahiɗi muni na Kanaan ɗa. Hanɗa e ɗi nagai na piɗi humunini na wiini Simeyon.

¹⁶Hanɗa a yikiɗi alini Levi, pini girini vunaɗi, Levi a wa ali hu: Gerson, Kehat gaini Merari. Levi a buza midiɗi yai buza miya gaini doogo doogo hu pi muguzak.

¹⁷Gerson a wa ali sulu: Libni gaini Simey. Ɗif paŋ a na abai na miɗiɗi piɗi humunini humunini.

¹⁸Kehat a wa ali puɗu: Amram, Isar, Hebron, gaini Uziyel. Kehat a buza midiɗi yai buza miya gaini doogo doogo hu pi hu.

¹⁹Merari a wa ali sulu: Mali gaini Musi. Hanɗa e ɗi tamaini fuŋ na war piɗi humuni na wiini Levi.

²⁰Amram a tikiti tawalni epini na yikiɗi ɓa Yokeled, te wiini ali na maɵagai sulu Aaron gaini Musus. Amram a buza midiɗi yai buza miya gaini doogo doogo hu pi muguzak.

²¹Isar a wa ali hu: Kore, Nefeg gaini Zikri.

²²Uziyel a wa ali hu: Mikayel, Elsafan gaini Sitri.

²³Aaron a tikiti Eliseba n’ahini Aminadab, na tawalni Nason, na te wiini ali na maɵagai puɗu: Nadab, Abihu, Eleyazar gaini Itamar.

²⁴Kore a wa ali hu: Asir, Elka na gaini Abiyasaf. Hanɗa e ɗi tamaini fuŋ na war piɗi humuni na wiini Kore.

²⁵Eliyazar n’ahini Aaron a tikiti ahini Putiyel ktai aŋ munini, te wiini ahi ktai, e sini yiki ɓa: Pinhas. Hanɗa e ɗi tamai fuŋ na war pinzibani Levi, piɗi humuniɗi piɗi humuniɗi.

²⁶Aaron na gaini Musus hanɗa, e ɗi nagai n’EPIƊ-ƊAI a siɗi miɗi ɓa: E miliɗisi aliɗi Izrayel edi war Egipte par pini vokɗi ta ta ɗa.

²⁷E ɗi nagai n’e miɗini wiini Faraw pai n’Egipte buri a hiniɗi aliɗi Izrayel e niyisi edi warɗi Egipte par ɗa.

²⁸War mefeŋ n’EPIƊ-ƊAI a miɗini wiini Musus war Egipte ɗa,

²⁹a miɗini maini nɵa: Ta m’EPIƊ-ƊAI, hala ku miɗini seŋ na mu muɗuŋku paŋ wiini Faraw pai n’Egipte.

³⁰Musus a wiyini seŋ wiini EPIƊ-ƊAI maini nɵa: Ta, ma ɗa a vurna seŋ pɗem kai, Faraw aga a zuɓura seŋŋa maɵa maɵa ɗa?