Read Mousgoum Niyi n’edi 7 Bible Online

Niyi n’edi 7 - Mousgoum bible

Niyi n’edi 7

¹Nɵa EPIƊ-ƊAI a miɗini wiini Musus: Tala aga mu suku spak maini alaw nɵa wuzani arni Faraw, Aaron na tawalku aga a muɗa seŋ na muku edi.

²Tuku aga ku miɗini seŋ na mu muɗuŋku paŋ wiini Aaron na tawalku, ni aga a miɗiŋni wiini Faraw buri a hiniɗi aliɗi Izrayel e hili edi midini aftini par.

³Amma Ta aga mu diŋriti agulni Faraw. Aga mu za wazagai zi siŋki gaini wazagai zi hiila viya midini afti n’Egipte,

⁴gaini hanɗa paŋ ɗa Faraw aga a yima seŋki kai. Nɵa aga mu siŋka spakŋa midiɗi Egipte, aga mu miliɗisi vok na wiya, ɗai na wiya n’aliɗi Izrayel edi war Egipte par gaini gdaŋ.

⁵Nɵa ɗa n’Egipte aga e siɗi ɓa Ta m’EPIƊ-ƊAI won hlai n’aga mu siŋka spakŋa siɗi Egipte, won hlai n’aga mu miliɗisi aliɗi Izrayel edi midini aftiɗi par lai.

⁶Musus gaini Aaron e zi kal kal maini n’EPIƊ-ƊAI a miɗiŋɗi nɵa.

⁷Won n’e hili aŋ miɗi gaini Faraw na ɗa, Musus buzani doogo doogo mitwis, Aaron buzani doogo doogo mitwis pi hu lai.

⁸EPIƊ-ƊAI a miɗini Musus gaini Aaron:

⁹Na ɓa Faraw a miɗiki li ɓa: Zi wala zi hiila ɗa, ku miɗini wiini Aaron ɓa: Tikiti amaraŋaiku, biliti azumai wuzani Faraw. Amaraŋai aga te bunda aŋ wala meefeŋ!

¹⁰Musus gaini Aaron e hili ahani Faraw e zi maini n’EPIƊ-ƊAI a miɗiŋɗisi nɵa, Aaron a biliti amaraŋaini azumai wuzani Faraw gaiɗi ŋarakaini, nɵa amaraŋai te bunda aŋ wala meefeŋ.

¹¹Amma Faraw a yikiɗisi ɗai na yalakai gaiɗi zi siɗi wuti ɗai zi zi hiila na war Egipte, e zi hanɗa kal kal maiɗi nagai nɵa.

¹²Ɗif paŋ a biliti amaraŋaini azumai, amaraŋai paŋ te bunda aŋ wala meefeŋ, amma amaraŋai na wiini Aaron te rɓa na wiiɗi paŋ.

¹³Gaini hanɗa paŋ agulni Faraw te hina gaini diŋri ɵa, a yima seŋni Musus gaini Aaron kai maini n’EPIƊ-ƊAI muɗaŋ ɗa nɵa.

¹⁴EPIƊ-ƊAI a miɗini wiini Musus: Agulni Faraw te za gdeŋi ta, a firiya a hiniɗi aliɗi Izrayel e hili kai.

¹⁵Gorof par cup ku hala sini Faraw, won hlai n’aga a hala agoɗom, ku bayaŋ amai wulani ra Nil, amaraŋai na te bunda aŋ wala meefeŋ ɗa ku tikiti tuku ɗaw.

¹⁶Ku miɗini wiini Faraw maini nɵa ɓa: Epiɗ-ɗai Alaw na wiiɗi Hebrekai a ɵinaŋasi suku ɓa, mu muɗuku maini nɵa: Hiniɗi ɗaiŋa na Izrayel e hili e zi ɵeŋŋa edi war basga, amma haa tiyana ku dara ku ɵina kai.

¹⁷EPIƊ-ƊAI a na muɗa maini nɵa: Aga ku sɗa ɓa Ta m’EPIƊ-ƊAI war wala hanɗa, gaini amaraŋai hanɗa aga mu ɵa yem n’agoɗom war ra Nil ɗa, yem aga a bunda aŋ fel.

¹⁸Hilif n’agoɗom paŋ aga a mra, yem aga a bunda a luguza lai, ɗai n’Egipte aga e ci yem na war ra ɗa kir kai.

¹⁹EPIƊ-ƊAI a miɗini wiini Musus: Ku miɗini wiini Aaron ɓa a tikiti amaraŋaini, a miɗiti tini edi midini yem na war Egipte ɗa paŋ: Yem na war ra, na war arakai, na war avakai ɗa paŋ lai, hlai na yem aŋ warni ta ta ɗa paŋ, kapai yem ni a bunda aŋ fel. Haa sini yem na war koloŋ zi luwuŋ zi kilɗi gaini koloŋ z'ali-fuŋ ɗa paŋ.

²⁰Musus gaini Aaron e zi maini n’EPIƊ-ƊAI a miɗiŋɗi nɵa, Aaron a yimiti amaraŋaini amai a ɵiɓa yem na war ra Nil wuzani arni Faraw gaiɗi ŋarakaini paŋ lai, yem hanɗa a bunda aŋ fel.

²¹Hilif na war Nil paŋ ɗa a mra, yem n’agoɗom a bunda a luguza, haa ɗai n’Egipte e kiɗi e ciŋ kir kai, midini afti n’Egipte paŋ hlai paŋ ɗa a fel.

²²Amma ɗai zi hiila na war Egipte e zi kal kal maini ɵa lai. Agulni Faraw te hina gdeŋi ɵa maini n’EPIƊ-ƊAI a muɗaŋ ɗa nɵa, a yiam seŋni Musus gaini Aaron ɗa kai.

²³Faraw a faka amai, a waya wiini aha, a tika hiini midini wala hanɗa duk kai zaŋ.

²⁴Ɗai n’Egipte paŋ e tiki piɗi e ɓili kalaŋ agoɗom wulani ra aŋ piyi yem zi ci, buri yem na war ra ɗa a ca kir kai.

²⁵Asakal n’EPIƊ-ƊAI a bunda yem n’agoɗom war ra aŋ fel par ɗa, mefeŋ a za muguzak.

²⁶Asakal hanɗa, EPIƊ-ƊAI a miɗini wiini Musus: Hala aha sini Faraw, ku miɗini ɓa, EPIƊ-ƊAI a na muɗa maini nɵa: Hiniɗi ɗaiŋa e hili aŋ zi ɵeŋŋa.

²⁷Na ɓa ku dara kai ɗai ɗa, aga mu hinasi megûze a barasi midini aftiku.

²⁸Yem n’agoɗom war ra aga a va gaini megûze, aga a niyasi amai, a niya aha war dalamku, amlai warɗi dilimiku zi feŋ, amai midini liyku, ahaɗi ŋarakaiku, gaiɗi ɗai n’Egipte ɗa paŋ lai, haa amlai warni hlai n’e zi peŋ warni, a pra amai warni wazagai n’e hiɗiŋ warni lai

²⁹Aga a pra amai suku, siɗi ɗaiku, siɗi ŋarakaiku paŋ lai.