Read Mousgoum Niyi n’edi 9 Bible Online

Niyi n’edi 9 - Mousgoum bible

Niyi n’edi 9

¹EPIƊ-ƊAI a miɗini wiini Musus: Hala sini Faraw, ku miɗini ɓa, Epiɗ-ɗai Alaw na wiiɗi Hebrekai a na muɗa maini nɵa: Hiniɗi ɗaiŋa e hili aŋ zi ɵeŋŋa.

²Na ɓa ku dara ku hiniɗi kai, ku na ɗiliɗi ɵa ɗa,

³aga mu hinasi veglek midini farani farai n’a na edi war basga ɗa paŋ, midini plasai, midini ablehökai, midini ɵigini, midini ɵaakai, midini adumai gaini haakai paŋ lai. A vlak na meefeŋ gara.

⁴EPIƊ-ƊAI aga a za ɓraw arbani farani faraiɗi ɗai na Izrayel gaini na wiiɗi ɗai n’Egipte, faraiɗi na wiiɗi ɗai na Izrayel ktai maa aga a mra pini kai.

⁵EPIƊ-ƊAI a ɗiya sarti a na zaw, dawai aga a za wala hanɗa midini afti n’Egipte.

⁶Dawaini, EPIƊ-ƊAI a za hanɗa, farani farai na wiiɗi ɗai n’Egipte paŋ a mra edi, amma farani farai na wiiɗi ɗai na Izrayel ktai ma a mra pini kai.

⁷Faraw a ɵiniɗi ɗaini edi aŋ tili wala n’a za ɗa, arbani farani faraiɗi ɗai na Izrayel ɗa ktai ma a mra kai. Amma gaini hanɗa paŋ agulni Faraw te hina gaini diŋri ɵa, a hiniɗi aŋ hili kai.

⁸EPIƊ-ƊAI a miɗini wiini Musus gaini Aaron: Ki mili aŋ zi na sini grak tiy zuguɗ zuguɗ sulu, Musus a pokoŋ amai arni smer wuzani Faraw,

⁹a poko li amai ɗa, a bunda aŋ alogodo midini afti n’Egipte paŋ, aga a hiluwa siɗi ɗai gaini farai ɗa, asakal par a bula edi aŋ wuruk lai.

¹⁰Musus gaini Aaron e mili aŋ zi hanɗa tiɗi, e hili wuzani Faraw. Musus a pokoŋ amai arni smer, a hiluwa siɗi ɗai gaini farai, asakal par a bula edi aŋ wuruk lai.

¹¹Ɗai zi zi hiila na war Egipte e kiɗi aŋ ɗiyi mini Musus kir kai burini wuruk ɗa, buri wuruk ɗa a za siɗi nagai kal kal maiɗi ɗai n’Egipte ɵa lai.

¹²Amma EPIƊ-ƊAI a diŋriti agulni Faraw, a yima seŋni Musus gaini Aaron ɗa kai, maini n’EPIƊ-ƊAI a miɗiŋni wiini Musus ɗa nɵa.

¹³EPIƊ-ƊAI a miɗini wiini Musus: Gorof par cup ku faka amai, ku hala sini Faraw, ku miɗini ɓa, Epiɗ-ɗai Alaw na wiiɗi Hebrekai a na muɗa maini nɵa, hiniɗi ɗaiŋa aŋ hili buri e zi ɵeŋŋa.

¹⁴Buri ɓa tiyana zaw ɗa, aga mu ɵinaɗi zibani gir ɗa paŋ muduku tuku mal, midiɗi ŋarakaiku gaiɗi ɗaiku paŋ lai, kapai a yima muduku ɓa ɗif ktai n’a kata gaya azumai midiɗi yai aŋ kai.

¹⁵Na ɓa mu yima fu ta wara kai, mu hina fu vlak miɗiki ɗa, tuku gaiɗi ɗaiku paŋ a na ta ɗa, ki vidi edi midini afti par vat.

¹⁶Amma Ta mu hunuku karku buri mu dara mu suŋkuku spakŋa, kapai yikiŋa ɗa a wa edi midiɗi yai paŋ.

¹⁷Gaini hanɗa paŋ ku dara ku hiniɗi ɗaiŋa ɗa e hili kai ɗaai.

¹⁸Buri nɵa, dawai sarti maini hanɗa nɵa, aga mu hinasi wutiŋ a yaka maini faŋ n’abai ɵa, wutiŋ na maini nɵa a yaka ka duk kai war pi zi tiki na wiiɗi Egipte par haa girna.

¹⁹Tiyana ɗa, ɵina ɗai edi pini faraku gaini wazagaiku n’a na edi war basga paŋ. Ɗai gaini farai n’e kiɗisi aha war dalam kai, na wutiŋ a niviɗisi li edi war basga ɗa aga e mri edi.

²⁰Zamai arbaɗi ɓarakai na wiini Faraw n’e yimi miɗi na wiini EPIƊ-ƊAI ɗa, e miliɗisi ɗai ɗi zi sda gaini farani faraiɗi aha war dalam.

²¹Amma ɗai n’e yimi seŋ na wiini EPIƊ-ƊAI kai ɗa, e hiniɗi ɗai ɗi zi sda gaini farani faraiɗi edi war basga.

²²EPIƊ-ƊAI a miɗini wiini Musus: Yimiti tuku amai, kapai wutiŋ a yakasi azumai midini afti n’Egipte paŋ, midiɗi ɗai, midini farai, midini wazagai zi hirim paŋ lai.

²³Nɵa Musus a yimiti amaraŋaini amai, EPIƊ-ƊAI a hinasi faŋ a ɓara, a hinasi wutiŋ a yakasi azumai lai. Afu a yakasi amai par azumai midini afti. EPIƊ-ƊAI a hinasi wutiŋ a yaka maini faŋ n’abai nɵa midini afti n’Egipte.

²⁴Wutiŋ a yaka viya gaini jilni gaini afu a za gdaŋ gara midini afti n’Egipte paŋ, ɗai n’Egipte e tili wala na maini nɵa ka duk kai, daga n’e siɗi siɗi par ɓa e ɗi aliɗi Egipte ɗa, e tili ka wala na maini hanɗa nɵa kai.

²⁵Midini afti n’Egipte paŋ wutiŋ ɗa a fuɗa ɗai gaini farai n’a navaŋsi edi war basga ɗa, a tuura wazagai zi hirim paŋ edi, a haɗa luwoŋai na basga paŋ azumai lai.

²⁶Wutiŋ a tuura kai tar ɗa a hlai na Gosen n a aliɗi Izrayel e ɗa woni.

²⁷Faraw a yika Musus gaini Aaron a miɗiɗi: Tiyana ɗa, mu sɗa ɓa mu za tuwur, jre a EPIƊ-ƊAI, ta gaiɗi ɗaiŋa ɗa maafanai miɗi tiyi,

²⁸siiwi EPIƊ-ƊAI kapai faŋ zi ɓarai gaini wutiŋ lai a ɗiya ta, kapai mu hiniki ki hili, mu ɗiliki kir kai.

²⁹Musus a wiyini seŋ: Won hlai na mu niyaɗi li edi war fuŋ n’abai hanɗa par aga mu yima ta amai pini EPIƊ-ƊAI aŋ siiwaŋ, nɵa faŋ zi ɓarai gaini wutiŋ aga a ɗiya, kapai a ima muduku ɓa yai ɗa te wiini EPIƊ-ƊAI.

³⁰Mu sɗa gaglai ɓa, tuku gaiɗi ŋarakaiku ɗa, aga ki sini hormo wiini Epiɗ-ɗai Alaw kai ɵa.

³¹Leŋ gaini Orge a tuura edi, Orge a buzuga n’a bûzûgû hai, Leŋ ɗa ɗe a za na fler hai lai.

³²Amma seyemni algama gaini epotir ɗa a tuura edi kai buri ni a seyem n’a naha ɗa asakal.

³³Musus a fakaɗi sini Faraw par, a niyasi edi war fuŋ n’abai par. A yima tini amai pini EPIƊ-ƊAI a siiwa. Faŋ zi ɓarai gaini wutiŋ a ɗiya, faŋ a ɵa midini kir kaalai.

³⁴Won hlai na Faraw a tala ɓa faŋ gaini wutiŋ gaini faŋ zi ɓarai a ɗiya zaw ɗa, a waya pini meefeŋ n’avut ɗa pra. Ni gaiɗi ŋarakaini agulɗi a hina gaini diŋri ɵa.

³⁵Agulni Faraw te hina gaini diŋri ɵa, a hiniɗi aliɗi Izrayel aŋ hili kai, maini n’EPIƊ-ƊAI a muɗaŋ war mini Musus ɗa nɵa.