Read Mousgoum Yob 11 Bible Online

Yob 11 - Mousgoum bible

Yob 11

¹Nɵa Sofar na Naama par a tika seŋ a miɗini wiini Yob:

²Seŋ zi miɗi na viya viya hanɗa, ɗif a waya seŋ pini kai ɗi? Ɗif n’a girɗa seŋ gara ɗa, seŋni ɗa a jre tetew ɗi?

³Seŋku na ku kola suku gaini na ɗa, kapai a miɗi ɗai duk tiɗi ɗi? Yewere na ku na zaŋ wiiɗi ɗai na ɗa, ɗif aga a tukuku siyer wiiku tuku lai kai ɗi?

⁴Ku muɗa lai ɓa: Mu na hilu wuzani arni Alaw, mu za wala ktai na meefeŋ wuzani arni kai sam.

⁵Kai! na ɓa Alaw a firiya a firiyi a muɗa seŋ ɗa, a mala mini amai aŋ wuyuku seŋ ɗa,

⁶yel n’a za sda gaini ɗa aga a yumunku muduku, a yel n’a suwa sɗiku ɗa, nɵa, aga ku sɗa ɓa Alaw a na mula arni pini meefeŋku paŋ kai.

⁷Ku hiina ɓa ku kiɗa ku sɗa warni Alaw ɗi? Zaw ku sɗa maɵa ta ɗa Alaw zi spak paŋ a na hilu ɗa ɗi?

⁸Yel na wiini Alaw ɗa a suwa hlai n’amai ɗa amai, kapai ku za ɗa a maɗa? Hulumni n’azumai ɗa a suwa hlai zi simni na wiiɗi ɗai zi mri, ku sɗa warni ɗa a maɗa?

⁹Modoni a sûwiti yai ɗa, brukni a suwa yem-ra n’abai ɗa lai.

¹⁰Na ɓa a halasi li aŋ ɵa ɗif na meefeŋ war daŋgai, na ɓa a yikaŋsi li wuzaɗi sariya par ɗa, n’aga a pa edi arni ɗa asiya ɗa?

¹¹Buri ɓa, ni ɗa a siɗiɗi ɗai na jrekai kai ɗa kafa, a sɗa meefeŋ ɗa gaini yafai kaalai.

¹²Amma ɗif hûwyi a suwaŋ li a duula edi duwul, ɗif murɗek a wa ɗa maini ahini ablehö n’edi basga ɗa nɵa.

¹³Amma tuku, na ɓa ku wayasi hiiniku li sini Alaw, ku yima tuku amai pini aŋ siiwaŋ lai ɗa,

¹⁴na ɓa tuku a tetema wala na meefeŋ li ɗa, maŋ edi, ku hina meefeŋ ɗa a za simnini ahaku kai.

¹⁵Nɵa aga ku ma edi hilu, ku kiɗa ku yima arku amai, aga ku ɗiya gdaŋ, ku huna wala ktai kai sam,

¹⁶buri ɓa, muduku ɗa aga a wula girku ɗa, muduku aga a kɵa gaini ɗa maini yem n’a ka edi hok nɵa.

¹⁷Nɵa simniku ɗa aga a za gaglai a sûwiti futi na girvudi ɗa, gegeŋ ɗa aga a bunda maini hlai na rum rum na gorof par nɵa.

¹⁸Aga ku sɗa jre ɓa biyi na pini ɵeɗ a na, koo asakalni wala zi siyer hanɗa kaw ɗa, aga ku kala weseŋ gaini hangalku.

¹⁹Won hlai na ku fana li azumai ɗa, ɗif ktai maa aga a huyuku kai, ɗai viya aga e piyi zinai tuku par.

²⁰Amma ɗai na maafanai ɗa, aga e biyi haa e kiyi, hlai zi simni na wiiɗi aŋ kai, bayai na pini ɵeɗ na wiiɗi ɗa a mri tar.