Read Mousgoum Yob 12 Bible Online

Yob 12 - Mousgoum bible

Yob 12

¹Nɵa Yob a tika seŋ a muɗa:

²Aftini, siɗi na wiini ɗif murɗek ɗa, a daba siki tiki, yel ɗa ɗe a daba siki tiki lai.

³Amma ta m’aŋ gaini yel mada maiki tiki nɵa lai, tiki ki sûwiŋa gaini yel kaalai, na ki miɗiŋ na ɗa, ɗif n’a sɗaŋ ɵa kai ɗa asiya ɗa

⁴Mu ɗuula sini Alaw buri mu paya zinai war tini par, amma mu bunda aŋ wala zi yewere tiɗi marmakaya, e bindi e zini yewere na ɗa, wiini ɗif na jre, na ɗikat ɗa.

⁵Ɗai na wala aŋ tiɗi ɗa e hiini ɓa, ɗif n’aŋ war gir ɗa, burini ɗa a miisi, e miɗi seŋ hanɗa siɗi nagai na eziɗi a ɵiɓa tukum ɗa lai.

⁶A haɗi gorɓolokai maa ɵeɗ a na, n’e tûrini agulni Alaw maa e ɗa gaini hangalɗi, n’e piki Alaw amlai tiɗi pek ɗa nɵa lai.

⁷Zilba ɵaakaiku ɗa, aga e hitriku, zilba wazagai zi ɗifli n’arbani hlai n’amai ɗa, aga a suku labar hanɗa.

⁸Haɗa kalaŋ gaiɗi yai, aga te hitriku, hilif na agoɗom ɗa aga a vurnunku.

⁹Arbani wazagai hanɗa paŋ ɗa, ktai n’a sɗa ɓa a za gaini tini Alaw kai a na ɗi?

¹⁰Ni, suŋfaɗi agulni wazagai na karni paŋ aŋ war tini, gaini suŋfaɗi ɗai murɗakai paŋ lai.

¹¹Ɗai e miɗi seŋ ɓa: A sɗa pɗemni seŋ zi miɗi ɗa a ɵime, maini n’a sɗa pɗemni simi ɗa a miy ɗa nɵa.

¹²Yel ɗa a nava siɗi ɗai na walakai, siɗi ɗa ɗe aŋ siɗi ɗai n’e zi buza viya ɗa lai.

¹³Amma yel gaini spak ɗa aŋ tini Alaw, siɗi zi zi wala gaini siɗi ɗa aŋ war tini ni lai.

¹⁴Wala n’Alaw a tuuraŋ li ɗa, a zizina tini ɗif kir kai, ɗif na Ni a ɵaŋ li war daŋgai ɗa, ɗif n’a ɵaŋsi edi aŋ kaalai.

¹⁵Na ɓa a ɗalasi yem li ɗa, koɓro a za, na ɓa a hinaŋsi li ɗa ɗe, a biti yai ɗa ta lai.

¹⁶Gdaŋ gaini yel ɗa aŋ war tini, ɗif na zini a wula gaini ɗif n’a wula ɗai edi e ɗi wiini paŋ.

¹⁷A bindiɗi ɗai na yalakai gara e hili eziɗi azumai kadai ca, n’e ɗûkliti sariya ɗa ɗe a bindiɗi tiŋ tiŋ lai.

¹⁸A vada spakɗi paakai edi, a miliɗi sapa na wiiɗi ɗai zi daŋgai siɗi,

¹⁹a bindiɗi paakai zi ɓaka e hili eziɗi azumai kadai ca, n’abakai n’e gigiɗi kai ɗa, a ɵiɗi azumai.

²⁰A tika seŋ zi miɗi na pɗem edi miɗi nagai n’e girɗi seŋ ɗa par, zini ɓraw n’arbani meefeŋ gaini pɗem a tikaŋ edi siɗi na walakai par lai.

²¹A ko miisi midiɗi n’abakai zi ɵi wuze, a pla sentir na wuzaɗi ɗai zi spak ɗa,

²²a siŋkasi wazagai n’a na azumai war huulumni gegeŋ ɗa amai, a kasi sezeni mri edi war gaglai.

²³A riya pinziba amai haa asakal par a tuuraŋ edi, a kiɗi haa edi midini afti zamai asakal par a wiyiɗisi aha.

²⁴A mula siɗi na midiɗi n’abakai n’e ŋi midini afti edi, a hiniɗi e giliŋi edi war basga na futi warni kai.

²⁵Nagai e piyi war gegeŋ na gaglai warni kai, Alaw a hiniɗi e kɵini maiɗi ɗai n’e ciini sa nɵa.