Read Mousgoum Yob 13 Bible Online

Yob 13 - Mousgoum bible

Yob 13

¹Hanɗa paŋ mu talaŋ ya, ɵima a saŋŋa ya, mu ɵinaŋ ya lai.

²Na tiki ki siɗiŋ ɗa, ta mu sɗaŋ lai; tiki yalakai gara ki siiwiŋa kai.

³Amma ta ɗa, mu muɗa ɗa gaini Alaw zi spak paŋ ɗa, mu muɗa jreŋa ɗa wuzani Ni.

⁴Ki kûriŋa sa na ɗa a eles, ki ɗi doktorai n’e nifi kai.

⁵Ki bi fu na miki ɓa ɗa, e pɵiki fu na ɗa aŋ ɗai na yalakai.

⁶Mu siiwiki, ziɓiri tuwi na mu tuwa sa ɗa, tiki hangalki sini miɗi na mu muɗaŋ, na mu pla sa gaini ɗa.

⁷Ki miɗi na jre kai na ɗa war balamni Alaw ɗa ɗi? Ki miɗi seŋ z'eles na ɗa aŋ zina pini ɗa ɗi?

⁸Ki ɗi ɗai na pini par fakat ɗi? Ki ɗai n’e zini pini war sariya ɗa ɗi?

⁹Na ɓa a mula arni war hiiniki ɗa aga a niviki war gal na wata ɗa? Zaw ki firiyi ki dûûliŋ maini n’e dûûli ɗif murɗek nɵa ɗi?

¹⁰Na ɓa ki zi ɓraw arɗi ɗai, koo war ŋoyai tekeɗeɗi, aga a za hiy siki war burini hanɗa.

¹¹Abaini ɗa te miliki hunai piki kai ɗi? Hunai na wuzani ɗa te na yimiki kai ɗi?

¹²Miɗi zi yel na ki miɗiŋ na ɗa a na maini bono nɵa, wala na ki ŋûyisi duɓani par ɗe a na maini grak z'afti nɵa lai.

¹³Bi miki ba! Hiniŋa mu muɗa ɗa muta kiɗi! Koo ɓa a za sa wiini ɗa a maɗi?

¹⁴Mu sa sa edi ta, koo ɓa a mri ma seŋ aŋ kai.

¹⁵Na ɓa a dara ɗa a fuɗaŋa wiini, mu na baiya wala zamai kir kai, amma sai aga mu muɗa jreŋa edi wuzani.

¹⁶Hanɗa maa, a wala n’aga a kurɗaŋa ɗa. Buri ɓa ɗif na meefeŋ a kiɗa a paya futi aŋ diya wuzani arni Alaw kai.

¹⁷Slini, ɵini seŋŋa na mu muɗaŋ ɗa, ki hini gaglai na mu zaŋ ɗa a niya ɵimaki.

¹⁸Tili, aga mu ɗiya wuzaɗi sariya, mu sɗa edi gaglai ɓa jre ɗa a wiya.

¹⁹Na a dara a za sariya gaya ɗa asiya ɗa? Na ɓa meefeŋ ɗa a wiya ɗa, aga mu ma duk, mu mra wiya.

²⁰Alaw wiya, wazagai a na sulu bas na mu dara mu zilbaŋ tuku ɗa, bla edi sa kai, nɵa aga mu ŋoya wuzaku kir kai:

²¹Yimiti tuku edi mada par kai, ku hina hunai n’abai na wuzaku ɗa, a yimaŋa kir kai.

²²Asakal par ɗa muɗa, aga mu wuyuku seŋ, ɵa kai ɗe, mu muɗa kapai ku wayaŋa seŋ lai.

²³Meefeŋŋa gaini tuwurŋa na mu zaŋ ɗa, a na gama ɗa? Hiŋa n’amai midini gadai gaini meefeŋŋa ɗa, siŋkaŋŋa haw ɗa.

²⁴Ku bunda arku edi sa par, ku yimaŋa aŋ gawku tiɓ ɗa buri maɗa?

²⁵Ku za na ɗa a maɗa, ku burga na ɗa a ɵimani luwuŋ na smer a na fanaŋ ɗa zaw! zaw ku tika futi na ɗa pini evek na hûleŋ ɗa ɗi?

²⁶Buri ɓa seŋ na ku ɗoŋ mada ɗa a seŋ na gdaŋai gara, meefeŋ na war agwiya par paŋ ku pɵaŋ mada.

²⁷Ku waŋa jaɓ aza ca, arku pa nɵa ca, aza na mu tikaŋ ta ɗa maa aŋ tuku kap,

²⁸paŋ ktai ɗif murɗek ɗa a tuura maini luwuŋ n’a hofa nɵa, maini sapa na bumi a lumaŋ nɵa lai.