Read Mousgoum Yob 14 Bible Online

Yob 14 - Mousgoum bible

Yob 14

¹Ɗif murɗek ɗa te waŋ te muni, a fana viya kai, amma a sɗa gir viya.

²A ɓula maini fler ɵa, asakal par a kwiimura, a giha maini seze nɵa, a yafa haa kai.

³Tuku ku mula arku ɗa midini ɗif ni ɗa, ku kaŋa aŋ za sariya gaiku!

⁴Ɗif n’a kiɗa a kasi wala na hilu warni na hi-hir par ɗa asiya ɗa? Ɗif aŋ kai.

⁵Na ɓa mefeŋni aŋ gaini ɗiyi tuku zaw ɗa, na ɓa tileni aŋ gaini pɵi ta, na ɓa ku kata hlai ktai a na ta n’a kiɗa a praŋ edi kaalai ɗa,

⁶ku mula arku pini ɵa kir kai, hinini baŋa sini agwi, kapai firyini a va amai maini ɗif n’a za sda burini vrak na war yuvai nɵa.

⁷Luwuŋ maa biyi na pini ɵeɗ na wiini a na, e ɗûkliŋ li azumai ɗa, a wayasi pra, a pa tewe zamai pra,

⁸koo ɓa sirdaini a za walakai azumai arni afti ca, koo ɓa pini n’a hina dum a mra azumai arni afti su kaw,

⁹a tala yem li tar ɗa a guɗa tar, a mulasi viya maini luwuŋ na agwi nɵa.

¹⁰Amma ɗif murɗek, Won hlai n’a mra li ɗa, gdaŋni aŋ kir kai, suŋfani a wa edi li ɗa, a za ɗa aŋ maɗa?

¹¹Yem na war yem-ra n’abai a kiɗa a yima edi, arakai a kiɗa a hiɗika amai, a wula amai lai.

¹²Ɗai murɗakai n’aga e mri ɗa, aga e fikisi amai kai, na ɓa hlai n’amai a vada edi kai ɗa, aga e ɵiyisi amai war mri par kai.

¹³Kai, ku ŋoyaŋafu azumai war hlai zi simni na wiiɗi ɗai zi mri cok ɗa! ku ŋoyaŋa na ɗa a ŋûyi wuzani hiyku cok ɗa, ku ɗiyaŋafu mefeŋ ktai zaw na kapai muduku a waya a kɵa gaya ɗa, mariya.

¹⁴A na ɓa ɗif a mra li su ɗa a kiɗa a wayasi pra ɗa, mefeŋ na mu zaŋ war gir na paŋ aga mu baiya pini ɵeɗ, haa ni n’a bundaŋa ɗa a cosi.

¹⁵Nɵa aga ku yikaŋa, ta aga mu ɵunuku lai, aga ku paya aŋ talaŋa ta na ku rgaŋa gaini tuku ɗa.

¹⁶Aga ku tika hangalku sini tuwurŋa kir kai, amma tiyana ɗa aza na mu tikaŋ paŋ ku pɵaŋ paŋ.

¹⁷A na ta ɗa hi-n’amai midini gadai na wiya aŋ gaini rgi war sak ɓak, meefeŋŋa ɗe gaini hizi edi haz lai.

¹⁸Paŋ ktai huwuŋ a haɗa azumai, a ɓurwa edi sini marni par, huwuŋ a sogo war hlai zamai,

¹⁹Yem a kiɗa a suma ali-fuŋ edi, kiini yem ɗa a hora afti ɗa edi, ku tuura biyi na pini ɵeɗ na wiini ɗif murɗek edi maini hanɗa nɵa,

²⁰Ku ɵiŋkaŋ azumai, a hala gamai, ku tûrsini arni amai, ku birgaŋ edi wuzani arku par.

²¹Alini ɗa e hini na war muluk ma, karni kai, e hini war miisi ma, karni kaalai.

²²A sɗa ɗa a gir na wiini n’aŋ midini, a tuwa ɗa a sini dama lai.