Read Mousgoum Yob 15 Bible Online

Yob 15 - Mousgoum bible

Yob 15

¹Elifaz na Teman par a tika seŋ a muɗa:

²Ɗif na yel maiku ɵa ɗa, a kiɗa a waya seŋ na gomoŋ maini hanɗa ɵa ɗi? A waya seŋ na gaini spak pini kai maini hanɗa ɵa ɗi?

³A siŋka jreni edi ɗa gaini miɗi n’a nava kai, gaini miɗi na taɓni kai ɵa ɗi?

⁴Pra ku tuura hormo na sini Alaw edi kok, hiinini ɗif na midini Alaw ku fuɗaŋ edi su lai.

⁵Buri ɓa seŋ n’a niyasi muku par na ɗa, ku muɗaŋ na ɗa pini meefeŋku ɗa, ku muɗa na ɗa a seŋ na wiiɗi ɗai zi rhai ɗa,

⁶a rguku na ɗa a muku, muta kai, a puku muduku na ɗa a muku dama.

⁷Tuku k’ Adam? Ku wa avut ku tuku ɗi? Ku wa wuzani boŋorai ɗi?

⁸Ku nasi fu war kitini-mi na wiini Alaw ɗi? Yel ɗa a hina tuku tuku ɵa ktai ɗi?

⁹Na tuku ku sɗaŋ na tiyi mi sɗiŋ kai ɗa a maɗa? Na tuku ku ɵinaŋ, na tiyi mi ɵiniŋ kai ɗa a maɗa?

¹⁰Tala, arbaɗi tiyi ɗa ɗif n’abai maa a na, a ɗif na wel, na buzani maa a suwa apuku.

¹¹Arai zi pi n’Alaw a na suŋku na ɗa, ku firiyaŋ kai ɗi? Miɗi na pɗamai na mi muɗuŋku na ɗa, ku daraŋ kai ɗi?

¹²Agulku te huguku ɵa buri maɗa? Arku ɗa a luma pre pre ɵa buri maɗa?

¹³Hiyku ɗa ku zaŋ na, ku zaŋ na sini Alaw, seŋ n’a niyasi muku par na ɗa, ku miɗiŋni na wiini Alaw lai.

¹⁴Ɗif murɗek ni ɗa asiya ɗa, na kapai a sumna hilu ɗa, ɗif na te waŋ te muni ɗa, a kiɗa a za meefeŋ kai ɗa a za ɗi?

¹⁵Ɗai zi ɵaŋ maa Alaw a pɵa midiɗi kai, hlai n’amai ɗa maa a na arni hilu kai,

¹⁶azi gama ɗa ɗif murɗek na hi-hir na jreni aŋ kai, a za meefeŋ koyɗum maini yem n’a caŋ ɗa ɵa ɗa!

¹⁷Zuɓuraŋa, mu firiya mu suŋkuku wala, mu vurnuku na mu talaŋ gaini ara lai,

¹⁸wala na ɗai na yalakai e ŋûyiŋ kai, e miɗiŋ maini n’e niviŋsi siɗi tamaiɗi par nɵa,

¹⁹na mu talaŋ siɗi nagai n’Alaw a siɗi afti wiiɗi nagai kiiɗi ta, hlai na ɗif na morkoi ktai maa a niyasi arbaɗi kai hai. A zaŋ maini hanɗa nɵa:

²⁰Simni na wiini ɗif na meefeŋ ɗa, a gir ɵa haa sini dibini, koo buzani ɗif n’a za gir wiiɗi ɗai ɗa a ɗiya maɵa ta ɗi?

²¹A ɵina wûle zi mili hunai a wa amlai ɵimani, Won hlai na hlai paŋ ɵeɗ, ni n’a tuura hlai ɗa aga a luɓasi midini.

²²A hiina ɓa aga a mulasi edi mini gegeŋ par kai, kaɵkar a na bayaŋ.

²³A giliŋa blaŋ blaŋ aŋ paya wala zi simi, a sɗa ɓa a hina burini ɗa a mefeŋ na gegeŋ.

²⁴Gir gaini hunai aga a yimaŋ, aga e cikini pini maiɗi askarai na wiini pai n’e ciki hlai nɵa.

²⁵Buri ɓa a yima tini amai arni Alaw, a firiya a daba was gaini Alaw zi spak paŋ lai.

²⁶Alawasi sini sek midini gaini pi azumai tiɓ, gaini ŋûyi duɓani gamarni na deɓilik par cok.

²⁷Galaini a pa ca ca, pɵani a mula dalas ca ca lai.

²⁸Amma aga a sumna war fuŋ n’abakai na gaini tûûri edi, a sumna war dalam na ɗai e simni warni kai, n’a ŋa gobi aŋ ho azumai.

²⁹Aga a za farai kir kai, derni ɗa a sumna kai. Sakni ɗa aga a wa edi midini afti kir kai.

³⁰Aga a mula edi mini gegeŋ ɗa par kai, afu aga a ya tini n’a pa hahakai ɗa edi, smer na mini Alaw par aga a fanaŋ edi gaigai.

³¹Aga a pɵa midini meefeŋ ɗa kai buri ɓa aga a wulaŋ edi, aga a nava aŋ vrak ɗa a meefeŋ lai.

³²Hanɗa aga a za sini wuzani mrini, tini ɗa aga a guɗa kir kai.

³³Alini na gaini niyi kai ɗa aga a yaka edi maini na wiini luwuŋ zi vin ɗa nɵa, flerni aga a yaka maini luwuŋ Olive nɵa lai.

³⁴Pinzibani ɗif na meefeŋ ɗa a seseɗa wuzani kai, dalamni ɗif n’a suma wazagai tiɗi ɗai ɗa, afu aga a yaŋ edi.

³⁵N'a ziya meefeŋ aga a poko ɗa a gir, a wasi warni par ɗa a rhai lai.