Read Mousgoum Yob 17 Bible Online

Yob 17 - Mousgoum bible

Yob 17

¹Suŋfaŋa a na wula, mefeŋŋa ɗa a ŋa ya aŋ vidi, mini waŋŋa ɗa aŋ gaini mili mal.

²Ɗai zi zi anya e gûniŋa azumai gun, wala n’e ɗa e ziŋŋa ɗa a hinaŋa mu kala weseŋ kai.

³Alaw wiya, zina pa ta, ku vurga vrak na wiini piliŋa n’edi ta kai ɗi! Na ɓa ku za hanɗa kai ɗa, ɗif n’aga a zaŋ buriya ɗa asiya ɗa?

⁴Ku hiininiɗi marmakaya duk, nɵa ɗa ku hiniɗi aŋ rɗi amai mada kai.

⁵E ɗa maini ɗif na seŋ joro a muɗa ɓa: A yikiɗisi marmakaini aŋ simi gaini, amma a hiniɗi alini aŋ biyi simi na wiiɗi kadai ca.

⁶Ɗai e bindiŋa aŋ wala zi yewere, aŋ ɗif na e ɵiɓini teenek amai arni.

⁷Ara a tala edi kir kai tini gir, mu tala sa maini wala na himir himir blaŋ ɵa.

⁸Won hlai n’e tiliŋa li ɗa, ɗai na jrekai ɗa e bindi hiyak, na tiɗi war seŋ kai ɗa, e zi hiy siɗi ɗai na maafanai ɗa.

⁹E miɗi: A juva ɓa, ɗai na jrekai ɗa, e hili wuzaɗi gaini payaiɗi na jre ɗa, nagai na tiɗi hilu ɗa, e fiɗi was a suwa pra.

¹⁰Tiki na marmakaya ɗa, ki wiyisi, ki wiyisi kafa, arbaki tiki ɗa, aga mu nava ɗif na yel nɵa ktai maa arbaki kai ɗi!

¹¹Mefeŋŋa ɗa a vada li, na mu hiinaŋ wara paŋ a mula edi kadai. Na agula a daraŋ ɗa paŋ a ɗiya ta.

¹²Marmakaya ɗa e hiini ɓa duvuk ɗa te girvudi, gegeŋ ɗa a tika pini li ɗa, e hiini ɓa a cosi na ɗa a gaglai.

¹³Mu baiya zamai ɗa a maɗa, tiyana ɗa, hlai zi simni na wiiɗi ɗai zi mri ɗa a hlai n’aga mu sumna woni ɗa kai ɗi? Ginaiŋa ɗa ɗe, mu ɵiti fu na war gegeŋ ɗa lai kai ɗi!

¹⁴Mu ɗuula waŋ ɗa ɓa: "Tuku k’apa", mu ɗuula atla ɓa "ama", "tawala na muni"!

¹⁵Biyi na pini ɵeɗ na wiya ɗa a vuga wa sek ɗa? Biyi na pini ɵeɗ na wiya ɗa, na arni a sini ca ɗa asiya ɗa?

¹⁶Aga a niya azumai war hlaiɗi ɗai zi mri gaya, aga mi wiyi azumai arni afti gaini sulogoiyi.