Read Mousgoum Yob 18 Bible Online

Yob 18 - Mousgoum bible

Yob 18

¹Nɵa, Bildad na Suwa par a tika seŋ a muɗa:

²Seŋ na ki miɗiŋ na ɗa aga ki ɗiyiŋ ɗa kaswa ta ɗa? Hiinumu pɗem, asakal par aga suɗumu seŋ na mu muɗumu ɗa.

³Ki yimiyi maini wazagai n’azi pini puɗu puɗu nɵa buri maɗa? Ki yimiyi maiɗi ɗai n’e siɗi wala ktai ɵa buri maɗa?

⁴Tuku na ku fuɗa suku tini hiy na ɗa, kapai afti a hina edi kadai su buriku tuku kiɗi, zaw huwoŋai a zogo edi war balamni par buriku ɗi?

⁵Gaglai na wiini ɗif na meefeŋ ɗa aga a mra, afu n’aha war pakataini ɗa aga a yima kir kai.

⁶Gaglai n’aŋ war dalamni ɗa aga a bunda gegeŋ, lampa na wiini n’amai par midini ɗa aga te mra.

⁷A vut par a hala gdaŋ ŋid ŋid, amma tiyana ɗa a tika ezini gaini hangal hangal, wazagai n’a hiinaŋ ɗa warni aga a suwa gdaŋni,

⁸buri ɓa ezini ɗa a kaŋ na ɗa mini azaw, a hala na midini tar,

⁹azuwi ktai aga te yimaŋ pini ezini par, te ɵirɗa amlai ezini kaŋ.

¹⁰Sogom n’a yimaŋ ɗa aŋ gaini ŋûyi arni afti cok, azaw n’a yimaŋ ɗa aŋ war futi wuzani lai.

¹¹Wazagai n’e milini hunai pini ɗa, a luɓasi midini war hlai paŋ par, hlai n’a tika ezini woni paŋ ɗa pini ɵa yaw.

¹²Gaini gdaŋŋni ɵa blaŋ, wiyamai te zaŋ, haw ɗa ɵimani gobi blaŋ,

¹³amur-sini ɗa, veglek aga a sumaŋ edi, gir n’a suwa marni paŋ aga a yima ali tini-sini lai.

¹⁴Aga e yimiŋsi aha war dalamni n’aŋ warni gaini hangalni ɗa par, e kiŋ sini pai na war hlaiɗi ɗai zi mri ɗa.

¹⁵Ɗif a kiɗa a sumna aha war dalamni ɗa, a wiini kir kai, aga e kû wala n’e yikiŋ ɓa sufre war hlaini ko ko lai.

¹⁶Sirdaini n’azumai ɗa aga a huula, tini n’amai ɗa ɗe aga a kwiimura lai.

¹⁷Ɗai na midini afti ɗa midiɗi aga a kɵa gaini kir kai, yikini a yika amai arbaɗi ɗai kir kai.

¹⁸War gaglai par e hûgiŋ war gegeŋ, e birgiŋ edi midiɗi yai par.

¹⁹Ahi ktai n’a hina aŋ ka pinzibani wuzani sek aŋ kai, war pakataini, ktai n’aga a hina karni blaŋ ɗa aŋ kaalai.

²⁰Dibini ɗa aga a miliŋiɗi ɗai na piɗi futi na koskoi sek ɗa, nagai na piɗi futi na dawai par ɗa, hunai na abai aga a yimiɗi lai.

²¹Hanɗa a wala n’aga a za aha war dalamni ɗif na jre kai ɗa, balamni ɗif n’a sɗa Alaw kai ɗa a bunda maini hanɗa ɵa lai.