Read Mousgoum Yob 19 Bible Online

Yob 19 - Mousgoum bible

Yob 19

¹Nɵa, Yob a tika seŋ muɗa:

²Aga ki siɗiŋa gir ara ɵa haa kaswa ta ɗa? Aga ki pipiɗiŋa gaini seŋ na miki ɵa haa kaswa ta ɗa?

³Ki tirkiŋa na ɗa a za azi doogo ya, gir na ki siɗiŋa ara ɵa na ɗa, siyerni arki kai ɗi?

⁴Koo ɓa mu wula ɗa a wili tekeɗeɗi ɗa, wili hanɗa a pɵa mada ta kai ɗi?

⁵Tiyana ɗa, tiki ki firiyi na ɓa, ki piŋa wala zi siyer hanɗa pa tiɓ, kapai ki nivi rɗi n’amai mada ɗa,

⁶amma yimi miɗiki pɗem ɓa, a sɗaŋa gir ara na ɗa a Alaw, a yimaŋa warni azawni a ni lai.

⁷Na ɓa mu ɗuula ɓa karai aŋ sa maa, ɗif a wayaŋa seŋ kai, mu ɗuula ɓa e zini pa ta maa, ɗif n’a zitiŋa sariya aŋ kaalai.

⁸A cikiti futi wuza sak ɓa apai mu vuga kai, a hina gegeŋ war futiŋa na agogoi lai.

⁹A viditi abaiŋa edi vat, a tikiti bogorai na mada edi ɗaw.

¹⁰A kasi gir sa war wazagai paŋ, mu mra n’a mri, a hurɗa biyi na pini ɵeɗ na wiya amai maini n’e hûrɗi luwuŋ nɵa.

¹¹A sawa sa gaini hiy, a yimaŋa maini gawni ɵa.

¹²Askaraini zi fiɗi ɗai ɗa e hilisi midiɗi marni waŋ, e ɓisisi futiɗi haa sa ta, e gûniti dilimiya amlai gaini kaŋɗi gun.

¹³A tikiɗi warɗi zagalakaiŋa edi sa par ɗaw, nagai n’e siɗiŋa ya ɗa, e ŋûyi wuza gaini ŋoyai.

¹⁴Zagalakaia ɗa e hiniŋa edi mak, marmakaya ɗa midiɗi a wula gaya marwai.

¹⁵Morkokoi n’e ɗa ahaya ɗa gaini falakai zi sda na wiya e yimiŋa aŋ ɗif n’edi par, mu bunda arɗi aŋ n’a hûwiyiɗi.

¹⁶Mu yika ɗifŋa zi sda ɗa a ɵna kai, sai mu siiwaŋ gaini siiwi haw.

¹⁷Lugosni smer n’a niyaɗi ma par ɗa a hinitisi muniya sa kai, mu baza arɗi tawalakaya ta burini lugozna ɗa.

¹⁸Aliyagoi na agogoi paŋ e miisiŋa mu faka li aŋ muɗa seŋ ɗa, e riyi pa gaini riyi.

¹⁹Marmakaya zi amana ɗa, mu bunda arɗi hi-hir, nagai na mu diriɗi lai e fiki amai sa.

²⁰A hina sa na ɗa amur kaai duk duk gaini keɵke lai, mu mulasi mini gir hanɗa par na kaɓa kaɓa, wala ktai maa a hina ta kir kai.

²¹Hiini haw buriya tiki marmakaya ɗa, hiini haw buriya, buri ɓa tini Alaw te yimaŋa kaai.

²²Ki birgiŋa maini Alaw ɵa lai buri maɗa? Ki vi gaini limini neŋ-sa kai hai ɗi?

²³Kaai, seŋŋa na mu muɗaŋ na ɗa, e ɗûŋ fu na na e ɗû ɗa, na ɓa e ɗûŋ funa ɗû war maktuɓ ɗo ɗa!

²⁴E ɗûŋfu amai midini huwuŋ kapai a hina woni gamai gaini kawai na gdaŋ ɗo, E yûri tatna midini yor lai ɗa kaai,

²⁵ta mu sɗa ya ɓa, ɗif n’a koraŋa ɗa a na karni, a ni n’aga a ɗiya amai asakal tar midini afti ɗa.

²⁶Asakal naamur-sa a ɓulka edi li lai ɗa, aga mu tala Alaw.

²⁷Aga mu talaŋ muta mal gaini ara nkam ara aga te talaŋ agula te ya wara buri hanɗa.

²⁸Won hlai n’aga ki tikii piki aŋ zilbi siki ɓa, mu tukumu futi pini Yob tiɓ buri maɗi ɗa? Won hlai ni ɗa aga ki siɗi jreni seŋŋa ɗa.

²⁹Nɵa ɗa, hûni kaɵkar n’aga a fiɗiki tiki mal edi ɗa, buri pi na ki pi pa na ɗa a meefeŋ na vrakni ɗa a fiɗi n’edi gaini kaɵkar, kapai a yima miɗiki ɓa sariyai te na.