Read Mousgoum Yob 20 Bible Online

Yob 20 - Mousgoum bible

Yob 20

¹Sofar na Naama par a tika seŋ a miɗini wiini Yob:

²Mu roto sa haaŋŋa mu firiya mu muɗa kai, amma hiiniŋa a saŋŋa ɓa sai mu muɗuku.

³Seŋ n’a niyasi war muku par ɗa, mu talaŋ sa ɗa a tirki, amma sezeŋa a hogoŋa aŋ waya seŋ pini hanɗa.

⁴Tuku ku sɗa ɓa haa gamai par, haa hlai na ɗif aŋ midiɗi yai par na ɗa,

⁵muluk na wiiɗi ɗai na maafanai na ɗa a na burini hlai n’agwi, firiyi na wiiɗi ɗai n’e hûni Alaw kai ɗa a na buri hlai n’agwi lai.

⁶Koo ɓa wilini ha amai Alaw ta, koo ɓa midini amai pini ɗugul tiɓ kaw,

⁷aga a vada edi gamai maini fulai na warni par nɵa, nagai n’e siɗiŋ ɗa aga e zilbi ɓa: aŋ wata ɗa?

⁸A vuga maini weseŋ zi pɵi nɵa, a nava kir kai, a ɵa li amai aŋ luwi ɗa, maini wala zi siŋki n’a za arni ɗif war duvuk ɗa nɵa.

⁹Arai na te naka te talaŋ ɗa, aga te talaŋ kir kai, hlai n’a naka woni maa aga a talaŋ kir kaalai.

¹⁰Alini ɗa e virgiɗi wazagaiɗi ɗai na murgakai edi, ni gaini tini dama aga a ɓurwa derni ɗa edi lai.

¹¹Keɵkeni a nafu gdaŋai maini na wiini gawla ɵa, amma aga a niya war waŋ gaini gdaŋ hanɗa.

¹²Buri ɓa meefeŋ ɗa a nafu mini neeme, a ŋoyaŋ azumai piɗi alsini,

¹³A seseɓaŋ wuzani sek a hinaŋ kai, amlai mini ɵa ɗik,

¹⁴Simi n’a sumaŋ ɗa a hofa amlai warni, a bunda aŋ musnaw na wiiɗi maakai.

¹⁵Wazagai n’a sumaŋ tiɗi ɗai par ɗa aga hunvaŋsi edi, warni par ɗa, Alaw aga a yimaŋsi edi.

¹⁶A naka a seseɓa na ɗa, a musnawɗi maakai, aga a mra maini ɗif na kaaɗi a lumaŋ ɵa.

¹⁷Aga a tala arakai na wiini emelni ami gaini arni kai, a tala ra gaini avakai na wiini fiyaw kir kaalai.

¹⁸Wazagai n’a navaŋ paŋ ɗa aga a suma mini kir kai, n’a navaŋ pini sakalani paŋ ɗa aga a firiya gaini kaalai.

¹⁹Buri ɓa a kirpiɗi na murgakai, a hiniɗi edi yaw, a rga dalam midini kai, a sumna warni na wiiɗi ɗa,

²⁰sunani ɗa a hinaŋ a va kai, na arni a talaŋ paŋ ɗa a firiyaŋ a wuraŋ paŋ.

²¹Wala ktai n’a vuga mini sunani aŋ kai, buri hanɗa, mulukni na wiini aga a fana viya kaalai.

²²Won hlai na faraini a suwa li viya ɗa, gir aga a yimaŋ, pinzibani gir paŋ aga a luɓasi midini gaini gdaŋni paŋ.

²³Won hlai n’a na paya aŋ va warni ɗa, Alaw aga a ɵinasi hiy n’abai ɗa midini, aga a niya amlai sini maini ɓaraw ɵa.

²⁴Na ɓa a pra edi mini kaɵkar na wiini gawni par su maa, ɓurwi zi kiiya aga te yimaŋ.

²⁵Na ɓa a rɗitisi li ɓurwi edi sini par, a rɗasi li kawai na miɗi na suweɗ n’a ŋala edi sini eɵeɵetni par lai ɗa, hunai na wiini mri ɗa aga a yimaŋ tar.

²⁶Godaini paŋ ɗa gegeŋ aga a sumna midini, afu n’a yibaŋ amai ɗa a ɗif kai, aga a yaŋ, wala n’a hina karni aha war dalamni paŋ, afu aga a yaŋ edi lai.

²⁷Hlai n’amai ɗa a siŋkasi meefeŋni edi, yai te faka amai sini lai.

²⁸Der n’aha war dalamni ɗa aga a edi kap, aga a mula edi kap, war mefeŋ zi hiy na wiini Alaw ɗa.

²⁹Hanɗa a wala n’Alaw a na baiya ɗif na meefeŋ gaini ɗa, a buri na wiini n’aga a sa sini ɗa.