Read Mousgoum Yob 21 Bible Online

Yob 21 - Mousgoum bible

Yob 21

¹Nɵa, Yob a tika seŋ a muɗa:

²Zibiri, ziɓiri seŋŋa na mu miɗiŋki ɗa pɗem, gaini hanɗa aga mu nava arai zi pi siki par.

³Yimiŋ siki, hiniŋa mu muɗa seŋŋa edi ta, mu vada li ɗa, aga ku zaŋa yewere wiiku, Sofar.

⁴Ta ɗa, mu tuwa na gaini ɗif murɗek ɗi? Na ɓa ɵa kai ɗa, aga mu ɓa hiiniŋa na pɗem edi kai ɗa maɵa maɵa ɗa?

⁵Tiki hangalki sa ta, aga ki bindi hiyak, aga ki dûgûtiki miki duk duk, ki miɗi seŋ kir kai.

⁶Won hlai na mu hiina midini wala hanɗa li ɗa, hunai n’abai a yimaŋa, ayir sa paŋ a faka amai paŋ.

⁷Ɗai na maafanai ɗa e simni karɗi tiɓ buri maɗa? Won hlai n’e zi walakai sek ɗa spakɗi a riya amai sek sek buri maɗa?

⁸Pini zibaɗi ɗa e bindi gdaŋai gaiɗi nagai piɗi marɗi, e tiliɗi tiyakaiɗi gaini arɗi lai.

⁹Aha war dalamɗi ɗa a na ɗa ɵeɗ, e siɗi hunai ɗa kai, daɓala na wiini Alaw aga siɗi kai.

¹⁰Garakaiɗi ɗa a dubura ɵaakai na falakai ɗa a kaya kai, ɵaakaiɗi ɗa a wa ali a ɵirɓa edi kaalai.

¹¹E hiniɗi aliɗi na agogoi e rivi arɗi marɗi put put maini adumai nɵa, aliɗi e bili maini n’e diri nɵa.

¹²E zini yama gaini gaŋga, gaini adill, e firiyi pini tuwini algaita lai.

¹³E vidi war muluk, asakal hanɗa par e niyi azumai war hlai zi simni na wiiɗi ɗai zi mri.

¹⁴Paŋ ktai e ɗika e miɗini wiini Alaw ɓa: Yima suku edi miyi par, wala na tuku ku na daraŋ ɗa, tiyi jaayi gaini kai.

¹⁵Alaw zi spak ɗa, ni ɗa asiya ɗa, na kapai mi zi ɵeŋni ɗa, siiwi na mi siiwi tini tiɓ ɗa a niviyi ɗa a maɗa?

¹⁶A jre, ɗai na ɵa ɗa, muluk na wiiɗi e ŋi midini e ɗi nagai kai. Hiini na wiiɗi ɗai na maafanai ɗa aŋ wara kai!

¹⁷Lampa na wiiɗi ɗai na maafanai ɗa, a n’a mra paŋ ɗi? Gir a na cosi midiɗi tetew ɗi, hiy na wiini Alaw ɗa a na tuura wazagai ɗa edi,

¹⁸paŋ ktai miɗi a muɗa: Aga ki bindi maini bra na smer a fanaŋ nɵa, maini evek n’a avulvuli a tikaŋ ɗa, a za ɵa ɗi?

¹⁹Gir na wiini ɗif na meefeŋ hanɗa, Alaw a biyiɗi gaini na ta e ɗi alini kiɗi ɗi, kadai tiɓ ɗa, a tikiŋni midini ni mal kapai a sɗaŋ sini;

²⁰kapai a tala girni gaini arni, kapai a tala hiy na wiini Alaw zi spak paŋ sini lai!

²¹Asakalni n’a mra su ɗa, na mefeŋni a vada vat ɗa, jaani gaiɗi ali ɗa a wiini a maɗa?

²²Siɗi ni ɗa e hitriŋni wiini Alaw gaini hitri haw ɗi? Ni n’a ziti sariya wiini wazagai zi rgi n’arbani hlai n’amai ɗa.

²³Ɗif zamai a mra gdaŋ ɵa blaŋ, war ɵeɗ, hûwyi sini kai;

²⁴Pɵani gaini mili dalas ca ca tini emel, emel arbani keɵkeni gaini bili do do.

²⁵Na zamai ɗa a mra mini gaini wi kuku a sɗa wala n’e yikiŋ ɓa muluk ɗa kai.

²⁶Gaini sulogoiɗi paŋ e fini azumai arni afti, atla a simiɗi.

²⁷Ta mu sɗa hiiniki edi gaglai, wala na ki hiiniŋ maɗa aŋ meefeŋ ɗa mu sɗaŋ ya lai.

²⁸Tiki ki zilbi siki ɓa: Dalamni ɗif zi garmas ɗa aŋ wata ɗa? Dugoi na ɗai na maafanai e ɗika woɗi ɗa t'aŋ wata ɗa?

²⁹Ki zilbiɗi ɗai n’e tiki morkoi kai ɗi? Ki diri ki ɵini zaida na miɗi par kai ɗi?

³⁰War mefeŋ zi gir ɗa, ɗif na meefeŋ ɗa wala a tetemaŋ kai, War mefeŋ zi hiy ɗa wala a zaŋ kai.

³¹Ɗif n’a na miɗini midini meefeŋni amai arni ɗa asiya ɗa? Ɗif n’aga a zini gir arni burini meefeŋ n’a zaŋ ɗa asiya ɗa?

³²A mra li ɗa, e kiŋ pini haa edi mini waŋni ta, yeɵni ɗa e giɗimiŋ gaini giɗimi,

³³Afti na war huduk ɗa a za midini guma kai, ɗai pini par fara waŋ, na wuzani par ɗa pɵaɗi kaalai.

³⁴Arai zi pi na ki siŋŋa tiɓ ɗa a zi nivi maɗa? Wiyini seŋ na wiiki ɗe a eles meere.