Read Mousgoum Yob 23 Bible Online

Yob 23 - Mousgoum bible

Yob 23

¹Nɵa Yob a tika seŋ a muɗa:

²Haa tiyana, tûwiŋa na sini Alaw ɗa a tala arki maini fiki n’amai sini ɵa, Paŋ ktai, girna Alaw a ɵinaŋsi mada ɗa a suwa tûwiŋa suwai.

³Hm, mu sɗafu hlai n’aŋ warni ɗa, mu ga fu na gi war hlai ni ta ɗa, mu ɵeɓafuna amlai sini ka ɗa,

⁴aga mu muɗa jreŋa edi wuzani, aga mu va ma gaini miɗi n’a siŋka jreŋa edi pɗem ta.

⁵Aga mu sɗa seŋ n’aga a wayaŋŋa ɗa, aga mu ɵina ezini seŋ n’aga a muɗaŋa lai.

⁶Aga a paŋa seŋ mada aŋ gdaŋ zaw, zaw kai, ni ɗa aga a zuɓura seŋŋa na mu muɗiŋni ɗa.

⁷Alaw maa aga a sɗa ɓa ɗif n’a sispa gaini na ɗa a ɗif na jre, ni n’a na zitiŋa sariya ɗa, aga a plaŋasi marwai.

⁸Amma tiyana mu navaŋ na ɗa wata kiɗi ɗa, mu hala piɗi futi na dawai sek ɗe aŋ woni kai, mu hala piɗi futi na koskoi sek ɗe a na ara kai.

⁹Aŋ gaini sda tini war gal n’azumai ɗa ɗe kara kai, a ŋoya na war gal n’amai sek ɗa ɗe, mu sɗa kaalai.

¹⁰Paŋ ktai a siɗiti futi na m’aŋ warɗi ɗa tetemi n’a na tetemaŋa gaini afu na wiini gir na ɗa, na ɓa a vada li ɗa, aga mu niyasi edi warni par hilu maini or nɵa.

¹¹Mu tika aza war ezini, mu tikiti futi na wiini, mu sala edi kai,

¹²gadai na mini par ɗa, mu tuuraŋ kai, mu za pini seŋ na mini par ɗa a suwa diri na wiya ɗa.

¹³Amma na ɓa ni a tika li seŋ mini ɗaw ɗa, n’a kiɗa a wayaŋ duɓani ɗa asiya ɗa? N'a firiya a zaŋ ɗa a zaŋ.

¹⁴Na a rgaŋ warni buriya ɗa aga a vaŋ amai, a kiɗa a za na zamai pra lai.

¹⁵Hanɗa a wala n’a mula hunai pa wuzani ɗa, Won hlai na mu hiina seŋ hanɗa, hunai a yimaŋa a suwa pra.

¹⁶Alaw a bundaŋa huruf, Alaw zi spak paŋ ɗa a bundaŋa muhunai,

¹⁷amma aga a ŋa maa ɗa a gegeŋ ɗa kai, a hlai zi digi n’a ŋa azumai ɗa kaalai.