Read Mousgoum Yob 28 Bible Online

Yob 28 - Mousgoum bible

Yob 28

¹Hlai n’e vûrgûsi arzaŋ warni par ɗa a na hlai n’e hiliyi or warni a na lai.

²Kawai ɗa e yimiŋsi arni afti par, ali-fuŋ zi hiliyi ɗa a za aŋ ki lai.

³Ɗai e gihi gegeŋ ɗa edi, e niyi azumai pini afti, azumai war hlai na gegeŋ tekeɗim aŋ piyisi ali-fuŋ na gaini ŋûyi cok war gegeŋ gaini sezeni mri.

⁴Ɗai e ɓili waŋ edi gaigai sini hlai zi simni par, ezini ɗif a kiɗasi woni kai, e hini mini sogom lew aŋ hûwili edi siɗi ɗai par gaigai.

⁵Wala zi simi ɗa a niyasi edi arni afti ɗa par, amma warni afti n’amlai ɗa, a wura amai maini a zaŋ ɗa a afu nɵa.

⁶Ali fuŋ n’arni afti ɗa, safir a na arni, arni alogodo ɗa, or a na lai.

⁷Wazagai zi ɗfli n’abakai ɗa e siɗiti futi na ɗa kai. Arni beges kaw a kiɗa woni kaalai.

⁸Wazagai na buza na gdaŋai a tika ka ezini woni kai, gurnai kaw a ɓisitika futi hanɗa kaalai.

⁹Amma ɗif murɗek ɗa a niya haa azumai pini ali-fuŋ na gdaŋai, a ɓla waŋ azumai pini huwoŋai ɗa azumai.

¹⁰Azumai pini huwoŋai ɗa, e ɓisi baŋa su su, wazagai na pɗamai paŋ arni sini ca ca.

¹¹A mini yem zi liiwi, wazagai n’a na azumai pini hlai gaini ŋûyi cok ɗa a siŋkaŋsi amai.

¹²Amma yel ɗa a nava wata ɗa? Hlai n’e nivi siɗi woni ɗa wata ɗa?

¹³Ɗif a sɗa wûrini kai, te na midini afti na wiiɗi ɗai na karɗi kaalai.

¹⁴Huduk na wuŋŋa ɗa a muɗa ɓa: Aŋ ta kai, yem-ra n’abai a muɗa: A na ahaya kai.

¹⁵E kiɗi e bindiŋ gaini or na hilu kai, a wura gaini arzaŋ na viya kaalai.

¹⁶E kiɗi e kitiŋ midini kilo gaini or na Ofir par, zaw gaini ahi-fuŋ Onikse, zaw gaini safir mini marni kai.

¹⁷Or gaini gagaza ɗa a kiɗa a kata gaini kai, e kiɗi e bindiŋ gaini grak zi or na hilu kaalai.

¹⁸Ali-fuŋ: korai gaini kristal ɗa lai ma ɗif a yikaŋ mini kai, yel ɗa, pɗemni a suwa ali-fuŋ hanɗa.

¹⁹Ahi-fuŋ topaz na Etiyopiya par ma a kata gaini kai, e kitiŋ mini marni midini kilo gaini or na hilu ɗa kai.

²⁰Amma yel ɗa a halasi ɗa wata par ɗa? Siɗi ɗa a tikasi pini na wata par ɗa?

²¹Aŋ gaini ŋûyi wuzani arɗi ɗai na karni cok, aŋ gaini ŋûyi wuzani arni wazagai zi ɗufli n’arbani hlai n’amai cok lai.

²²Ɗai zi mri gaini mri e miɗi ɓa: Tiyi mi ɵini labarni duk ya.

²³Futini a sɗaŋ ɗa a Alaw, a sɗa hlai n’aŋ warni ɗa A ni lai.

²⁴Buri ɓa a tala haa edi war koŋni afti na puɗu paŋ ɗa A ni, a sɗa n’a na za midiɗi yai paŋ ɗa A ni lai.

²⁵Buri ɓa a sini spak wiini smer ɗa A ni, a kata yem gaini abaini paŋ ɗa A ni.

²⁶A kata ɵini faŋ ɗa A ni, a siŋkitini futi wiini wilɗi gaini alaw zi ɓarai ɗa A ni.

²⁷A talaŋ, a firiyaŋ ta, a fufuka ezini ɗa haa, a sɗa nemni ɓa.

²⁸Asakal par a miɗini wiini ɗif murɗek ɓa: Sini hormo na wiini EPIƊ-ƊAI ɗa, hanɗa a yel ɗa, luwi na wuzani meefeŋ ɗa, hanɗa a siɗi ɗa lai.