Read Mousgoum Yob 3 Bible Online

Yob 3 - Mousgoum bible

Yob 3

¹Asakal hanɗa par, Yob a tika pini a muɗa seŋ, a tusa mefeŋ n’a wa warni ɗa.

²A muɗa maini nɵa:

³A juva ɓa mefeŋ na mu wa warni ɗa a haza edi, duvuk na te muɗa ɓa e tiki felni ahi na wus li ɗa te haza ɗi edi lai.

⁴Yuvai ni ɗa a juva ɓa a bunda gegeŋ, amai warni hlai n’amai par, Alaw a payaŋsi kai, gaglai a za warni kai,

⁵A juva ɓa gegeŋ na tekiɗum a yuvai ni ɗa, ɗugul na murɗek a wa midini, hlai zi dûgû na war yuvai ni ɗa, a milini hunai pini!

⁶duvuk hanɗa, a juva ɓa mirɗekɗi ɗa a suwa marɗi paŋ, te pɵa arbani mefeŋ na war buza ɗa kai, te niya war pɵini tile ɗa kaalai,

⁷Duvuk na ɗa a juva ɓa muni te tika fel warɗi kir kai, ɗuwal zi firiyi a za warɗi kaalai,

⁸A juva ɓa nagai n’e tûsi yuvai ɗa, e tûsiti wiiɗi, nagai zi hiila n’e ɵiyisi Leviyatan amai ɗa,

⁹A juva ɓa meeɵek na gorof a za gaglai warɗi kai, te baiya gaglai amma a cosi kai. Te tala hlai na rum rum gaini arɗi duk kai.

¹⁰Buri ɓa te mini gut na mu niyasi edi warni par ɗa kai, te hinaŋa aŋ tala gir girna gaini ara.

¹¹Mu mrasi warɗi ama par su kai na ɗa maɵa ɗa! mu wasi edi tar ɗa, mu mra kai na ɗa maɵa ɗa!

¹²mu nava ɓalak n’a lubaŋa tiɓ buri maɗa? Mu nava fiyaw zi ci tiɓ buri maɗa?

¹³An na ta ɗa, mu na azumai war waŋŋa waŋ gaini hangala, mu kala weseŋ, sa amla,

¹⁴gaiɗi paakai gaiɗi n’abakai na midini afti, n’e ɗika e rgi yeɵ n’abakai buriɗi ɗa,

¹⁵ɵa kai ɗa mu na gaiɗi n’abakai na or tiɗi viya, n’e vi dalamɗi gaini arzaŋ ɗa,

¹⁶ɵa kai ɗa m’aŋ kai maini ahi n’e wiŋsi gaini mri su nɵa, n’a tala gaglai gaini arni kai ɗa nɵa.

¹⁷Woni, ɗai na maafanai e hûwyi ɗai kir kai, na hurafai e nivi si-n’amla lai.

¹⁸Woni, ɗai zi daŋgai kaw e ɗi gaini hangalɗi, e ɵini wulani ɗif n’a ziɗi gir ɗa kai.

¹⁹N'agogoi gaiɗi n’abakai ɓraw arbaɗi kai, bege aŋ war tini epin-gezani kir kai.

²⁰Alaw a hina ɗif na haw aŋ wa tiɓ buri maɗa? A hiniɗi nagai na hlai a baza arɗi ɗa e simni karɗi tiɓ buri maɗa?

²¹E firiyi mri, amma mri a dara siɗi kai, e piyiŋ ɗa maa a suwa farai.

²²E nivifuna a waŋ zek ɗa, aga e vi gaini firiyi, e pri amai lai.

²³Mu tala sa maini ɗif n’a sɗa hlai n’a hala woni sek kai, n’Alaw a ɵaŋ amlai war ɵab su ɵa.

²⁴A hina maa aŋ wala zi simi ɗa a marava, numiŋa ɗa a cirɗa edi maini yem nɵa.

²⁵Mu za li hunai wuzani wala ɗa, a za sa ta, wala n’a na mulaŋa hunai pa ɗa a yimaŋa lai.

²⁶Ta ɗa, jam na wiya aŋ kai, ɵeɗ na wiya aŋ kai, si n’amla na wiya aŋ kaalai, wiya ɗa a gir ɗa ɵa.