Read Mousgoum Yob 30 Bible Online

Yob 30 - Mousgoum bible

Yob 30

¹Amma tiyana ɗa, n’agogoi n’asakalŋa par ɗa e riyi pa, nagai na tamakaiɗi ma mu tûriɗi ma kai, hirgakaiŋa ma e sûwiɗi.

²Was n’e fiɗiŋ ɗa a zina pa war a maɗa? Gdaŋ na wiiɗi a vada edi kadai.

³Wiyamai gaini gir e bindiɗi gaini hûgûya haa, e piyi aŋ nivi wala zi simi midini afti n’aŋ war kwimi, na wala warni kai.

⁴E ɗika ɗa e riwisi ɗa a evek n’edi basga par n’a suma hut hut ɗa, e limi ɗa a saluwaŋni luwoŋai lai.

⁵E ɗika ɗa e birgiɗi edi arbaɗi ɗai par gaini birgi, e ɗûûli piɗi maini n’e ɗûûli piɗi ɗai na mahalakai ɵa,

⁶kapai e simni wulani ra, e simni warni waŋ n’arni afti lai, amai sini huwuŋ lai.

⁷E firi midiɗi marɗi azumai pini evek na maafanai ɗa, e tûwi maini ablehökai na buza nɵa edi arbani hedek ɗa.

⁸E ɗi wazagai zi rgi na navaɗi kai, na yikiɗi aŋ kaalai, n’e birgiŋ edi midini afti par gaini daɓala lai.

⁹Tiyana mu bunda miɗi kaai e zini yama ɗa gaya, e hiɗi kalaŋ ɗa gaya lai.

¹⁰E tiliŋa arɗi aŋ wala na hi-hir, e rivi wuza gaini rûvi lai, e diri ma e pirfiŋa teenek ɗa amai ara.

¹¹Won hlai n’e tili ɓa Alaw a vadaŋa gdaŋŋa edi vat, a ɵaŋa azumai su lai ɗa, e firiyi e ɗiyi, e tiliŋa li ɗa, e ɗi yimi tiɗi warɗi buriya kir kai.

¹²Ɗai nagai na maafanai hanɗa e fiki amai sa, e piyi futi sa aŋ ɵiŋkiŋa azumai.

¹³E ciki futi n’aza cak, e fiɗi was na buri tûriŋa edi, nagai n’e ɗika ɗif n’a zina piɗi aŋ kai ɗa.

¹⁴E cûsi arni ɵaga co, e vigisi woni ɗaw ɗaw, e pirmisi mada arni deeɓer ɗa.

¹⁵Hunai te fakasi amai sa, abaiŋa smer a tikiti ɗaw, simniŋa na jam ɗa a giha edi maini ɗugul nɵa.

¹⁶Tiyana ɗa, sunfaŋa ɗa a na niya edi wara par, mefeŋ zi gir a yimaŋa kaai.

¹⁷Duvuk ɗa, mu ɵina gir haa sini keɵkeŋa ta, gir n’a za ɗa ɗiyini aŋ kai.

¹⁸Alaw a yima sapa na wula gaini gdaŋ, a furɗa sapa wula kiŋ.

¹⁹A bula azumai arni ŋurɓok su, mu bunda maini alogodo ɵa, maini bono ɵa.

²⁰Alaw wiya, mu ɗuula suku, amma ku wayaŋa seŋ kai, mu ɗiya amai na ɗa ɓa kapai ku tika hangalku sa.

²¹Ku bunda sa meefeŋ pla, ku za ɗa gaini gdaŋku paŋ.

²²Ku tikaŋa midini smer ta, a duburaŋa maini plis ɵa, ku gihaŋa edi arbani smer na gdaŋ.

²³Mu sɗa edi gaglai ɓa ku kaŋa na mini mri, Won hlai na ɗai na karɗi paŋ e nivi marɗi woni ɗa.

²⁴Ɗif n’a mra mri ɗa, a paya zinai kai ɗe? Ɗif n’aŋ war gir ɗa, a yikasi ɗai buri e zini pini kai ɗi?

²⁵Mu naka ɗa mu tuwa gaiɗi nagai na hlai siɗi gdaŋ ɗa kai ɗi? Agula te ɵa marava buriɗi na murgakai ɗa kai ɗi?

²⁶Mu nafu mu baiya ɗa a muluk, amma a cosi ɗa a gir, mu baiya ɗa gaglai, amma a cosi ɗa a gegeŋ.

²⁷Mefeŋ paŋ, agula te huwra amlai wara, mefeŋ zi gir a cosi mada co.

²⁸Mu cora mekele heyeŋ, amma te yaŋa te futi kai; Mu ɗiya li war diŋgi zaw ɗa, mu tuwa ɗa buri zinai.

²⁹Gaini tûwiŋa hanɗa mu bunda mu tawalni akeŋ, mu ɗif na payaini gaini alket lai.

³⁰Amur sa a fufuta haa, a fulka amai a yaka edi keɵkeŋa amlai war sa a ya, a hula.

³¹Adill na wiya a ɵiɓa ɗa pin yama zi tuwi kiini, algeta na wiya ɗe a yiba ɗa pin yama na wiiɗi ɗai zi tuwi ɗa lai.