Read Mousgoum Yob 31 Bible Online

Yob 31 - Mousgoum bible

Yob 31

¹Mu za ka bonu gaini ara ta: Ɓa a hinaŋa mu tiliti ɓulumi, mu za suuna siɗi lai kai.

²A nafu ɵa kai ɗa, buri na wiya n’Alaw a firya a saŋa tiɓ ɗa a ma ɗa? Alaw zi spak paŋ ɗa, a ɵinaŋasi fu buriya amai war hlai n’amai par tiɓ ɗa a maɗa?

³Kai tiɓ ɗa: Ɗif na meefeŋ ɗa, burini ɗa a gir, nagai n’e zi meefeŋ ɗa, e nivi huwyi lai. A na ɗa ɵa kai ɗi?

⁴Gai hanɗa paŋ, Alaw a siɗa payaiŋa ɗa ya, aza na mu tikaŋ ta ta ɗa paŋ a siɗa piɵini ya lai.

⁵Mu naka mu paya na ɗa war eles ɗi? Aza a naka a purma pini rhai ɗi?

⁶A zuva ɓa Alaw a tikaŋa midini kilo na gai futini, aga a siɗa jreŋa ɗa.

⁷Na ɓa mu sirɓa ka edi warɗi futini na pɗemi par siraɓ, zaw na ɓa agula te taɓa pini suuna na wiini arai teɓ, zaw na ɓa wala na hi-hir ktai a duɓuka aŋ sini ta duɓak ɗa,

⁸A futini, na mu bulaŋ azumai ɗa, ɗif zamai a sumaŋ wiini, na mu paŋ azumai hahakai ɗa ɗe, ɗai e rɗiŋ wiiɗi amai lai.

⁹Na ɓa mu za ka suuna li siɗi muni, zaw na ɓa mu riɓta ka li min magala na wiini ɗif n’aŋ ɵima ɗa,

¹⁰Muniya ta mal, aga te bunda te za sda aŋ bagai wiini ɗif zamai, ɗai paŋ e fini gaiɗi maini n’e diri nɵa lai.

¹¹Buri ɓa, meefeŋa hanɗa a wala zi siyer gara, a wala na ɗif n’a zitiŋa sariya ɗa a kiɗa a zaŋa gir burini ɵa.

¹²Meefeŋa hanɗa aga a za buriya aŋ afu n’a yaŋa haa a vadaŋa edi, a ya wazagaiŋa paŋ edi kafa lai.

¹³Na ɓa mu ara sin jre na wiini begeŋa, zaw na wiiɗi bagaiŋa dug, won hlai na sispai a faka arbaɗi gaya ɗa,

¹⁴Won hlai n’Alaw a fakasi li amai aŋ zitiŋa sariya ɗa, kapai mu za sa maɵa! Zaw won hlai n’aga a zilbaŋa ma ɗa, kapai mu wiyini seŋ ɗa ɓa maɵa!

¹⁵Ni n’a rgaŋa amlai war gutɗi ama ɗa, a rgiɗi nagai a ni lai kai ɗi? A rgiyi warɗi tamaiyi ɗa a Alaw ni ktai kai ɗi?

¹⁶Mu bla ka edi siɗi ɗai na murgakai ɗi? Mu hiniti ka muni na war greŋ ɗa aŋ baiya war girɗi kadai dam ɗi?

¹⁷Mu suma ka simiŋa ɗa kiya dam, mu sini wiini ahuyogwi na huyuk ɗa kai duk ɗi?

¹⁸A za ɵa duk kai, buri ɓa gaini gawlaŋa par mu wula ahi na huyuk ɗa amai maini apini ɵa, mu tika pa mu zina piɗi muni na war greŋ ɗa amlai warɗi ama par dam lai.

¹⁹Mu tala ka ɗif na haw blaŋ, sapa sini kai, zaw na murga blaŋ, na burgu n’a baraŋ midini aŋ kai,

²⁰Na tese warɗi gulni buriya kai, n’a kopa ka sini gaini sapa s'ayirni adumai na wiya kai duk kai ɗa koo!

²¹Na ɓa, mu tika ka ta amai sini ahuyogwi na huyuk ta, buri mu sɗa ɓa aga e ziŋa wala na meefeŋ war faada na wiini fuŋ n’abai ɗa kai ɗa,

²²A zuva ɓa graŋa a hurɗasi edi sin kerpeɵŋa par, ta te ɗuklasi edi sin koŋ ta par ta lai.

²³Buri mu naka na ɗa, gir na tini Alaw par ɗa mu hunaŋ gara, buri mu kiɗa mu za wala ktai sini Ni na paiŋa ɗa kai.

²⁴Mu tika ka yimiŋa ɗa midini or ɗi? Mu miɗini ka ɓa: Mu hina sa paŋ war tuku ɗi? Duk kai zaŋ!

²⁵Mu firya ka pini abaini wazagaiŋa ɗi? Pin farai na mu navaŋ gaini ta ɗa ɗi?

²⁶Mu tiliti ka futi won hlai na te na ŋala, zaw tile n’a na yimasi amai zuf zuf ɗa,

²⁷Agula te wula ka edi pini war ŋoyai ɗi? Zaw mu yimaŋ ka aŋ n’alawai duk, mu hurga azumai wuzani lai ɗi? Duk kai zaŋ.

²⁸A za fu ɵa ɗa, a wala na meefeŋ, na ni n’a zitiŋa sariya ɗa a kiɗa a zaŋa meefeŋ buri hanɗa, buri ɓa mu hina Alaw n’amai ɗa edi mak.

²⁹Mu firya ka pin gir n’a nava gawŋa ɗi? Mu pra ka amai gaini firyi buri ɓa gir a navaŋ jek ɗe ɗi?

³⁰Mu hina sa aŋ za tuwur, aŋ tusa gawŋa ɓa a mra edi su kai.

³¹Ɗai n’e hilisi ahaya aŋ morkoi paŋ ɗa e kiɗi e zi zaida lai ɓa: Ahani Yob ɗa, ɗif n’a va gaini neŋ kai aŋ kai.

³²Morkokoi na gaini eziɗi yaw ɗa, mu siɗi hlai zi feŋ, min magalaŋa a nafu gaini mili mal buriɗi morkokoi ɗa lai.

³³Mu pa ma midini hiŋa n’amai midini gadai, maini na ɗai murɗakai e ɗa ziŋ ɗa ɵa ɗi? Zaw mu ŋoya meefeŋa amlai wara cok maiɗi nagai nɵa lai ɗi?

³⁴Mu huna ka miɗi na wiiɗi ɗai ɗa kai, N'e miɗiŋ buriya paŋ ɗa a mulaŋa hunai pa kai, a ŋa ma kaalai, a ɗalaŋa aŋ niya anene kaalai.

³⁵Kaai, mu nava fu na ɗif n’a ɵina ma ɗa, miɗiŋa na asakal ɗa a hanɗa, Alaw zi spak paŋ ɗa a waya seŋ haw ɗa! Seŋ na gawŋa a ɗoŋ mada ɗa,

³⁶aga mu tikaŋ wula ta mu lbaŋ, aga mu waŋ mada ɗik maiɗi bogorai ɵa lai.

³⁷Aga mu miɗini aza na mu tikaŋ ta ta ɗa, aga mu hala sini sek maini pai nɵa.

³⁸Vuwaiŋa ɗa a na ɵa hama gaya ɗi? Hlai na mu basaŋ amai su su ɗa a na tuwa gaya ɗi?

³⁹Mu suma ka seyem na warni ɗa gaini vrak kai ɗi? Mu za wala na meefeŋ siɗi tamaini ɗi?

⁴⁰Na ɓa ɵa ɗa, ezini algama ɗa a diya ɗa a hedek, ezini orge ɗa, a diya ɗa a hedek lai. Seŋ zi miɗi na wiini Yob ɗa a ɗiya nɵa ta.