Read Mousgoum Yob 32 Bible Online

Yob 32 - Mousgoum bible

Yob 32

¹Elifaz, Bildad gaini Sofar e ɗiyi ta, e firiyi e miɗini seŋ wiini Yob kir kai, buri ɓa a tala sini ɓa a ɗif na jre.

²Nɵa Elihu n’ahini Barakeyel na war pinzibani Buz par, piɗi humuni na wiini Ram, a za hiy ta. A za hiy sini Yob buri ɓa a ŋa sini aŋ ɗif na jre a suwa Alaw.

³A za hiy pra siɗi marmakaini na hu lai buri e nivi n’e wiyiŋni wiini Yob kai, e sini meefeŋ ɗa wiini Alaw.

⁴Elihu a tika seŋ a miɗini wiini Yob tar kai ɗa buri ɓa marni na gaini ɗa e sûwiŋ gaini buza.

⁵Amma a tala haa nagai na hu ɗa e wiyini a seŋ wiini Yob kai ɗa, a za hiy ta.

⁶Nɵa Elihu n’ahini Barakeyel na war pinzibani Buz a tika seŋ a muɗa: Ta mu na agwi, tiki ki ɗi na walakai, nɵa, mu ziriya, mu huna, aŋ siŋka siɗiŋa edi wuzaki.

⁷Mu hiina ɓa: Ɗif na buzani abai ta ɗa a sɗa seŋ n’a muɗaŋ ɗa, ɗif na buzani viya yaw ɗa, a hitra yel ɗa.

⁸Kadai tiɓ ɗa wala n’a sini siɗi wiini ɗif ɗa a seze na wiini Alaw zi spak paŋ ɗa, ɗif ɗa aŋ warni ɗa a smer kadai meere.

⁹Kapai buza na viya ɗa a sa yel kai, ɗai na walakai ɗe e siɗi wala na jre ɗa kai.

¹⁰Tiyana mu dara mu miɗiki na ɓa: Ziɓiri na maɗa, ta mu muɗa siɗi na wiya ɗa edi lai.

¹¹Mu baiya seŋ na miki par haa, mu tika hangala ta aŋ zuɓura yel n’aga ki miɗi gaini ɗa, Won hlai na ki ɗa hiini hulum midini seŋ n’a muɗaŋ ɗa.

¹²Mu tika hangala siki nɵa ta, amma ktai n’a wiyini seŋ wiini Yob aŋ kai, ktai n’a pini seŋ arni aŋ kaalai.

¹³Ki hiini kai ɓa: Mi nivi yelni li, aga a rɗa amai midini ɗa a Alaw tar, a ɗif murɗek kir kai.

¹⁴Seŋ n’a muɗaŋ ɗa, a muɗaŋa wiya kai, mu dara mu wiyini seŋ ɗa gaini miɗi na wiiki kaalai.

¹⁵Ki ɵiɗi marwai, ki siɗi seŋ na ki wiyiŋ kir kai, wala n’e miɗiŋ arɗi kir kai.

¹⁶Mu baiya haa ki miɗi a seŋ kai, buri ɓa ki ɗiyi ta, ki wiyini a seŋ kai ɗa,

¹⁷ta tiyana mu muɗa a seŋ, ta mu muɗa siɗi na wiya edi lai,

¹⁸buri ɓa seŋ aŋ ma viya, wala ktai a hogoŋa pa ɓa mu muɗa.

¹⁹Wara a biiva amlai maini vin na mini gaini dûgû duk ɵa, a dara a luɓa edi maini kene kene na hahakai nɵa!

²⁰Hiniŋa mu muɗa ma edi ta, kapai mu suŋfa agwi, mu mala ma amai mal, mu waya seŋ.

²¹Mu kiɗa mu zina pini ɗif kai; mu ɗuula ɗif kaalai.

²²Buri ɓa ta maa mu sɗa ɗûûliɗi ɗai kai, Mu zaŋ fu ɵa ɗa, aŋ ta Ni n’a rgaŋa ɗa aga a vadaŋa edi vat.