Read Mousgoum Yob 35 Bible Online

Yob 35 - Mousgoum bible

Yob 35

¹Nɵa Elihu a hala wuzani gaini seŋ a muɗa:

²Yob, ku hiini na ɓa wiiku ɗa a jre ɗa ɵa ka! miɗi na ku miɗiŋni wiini Alaw ɓa: meefeŋku aŋ kai na ɵa,

³ku muɗa gaini muku lai ɓa: Jaaku kai, zi na ku za tuwur kai ɗa ribani arku kai lai na ɵa ɗa, miɗi na ku muɗaŋ maini hanɗa ɵa ɗa, ku hiina ɓa ku muɗa wuzani Alaw na ɗa a jre ɗa kiɗi ɗi?

⁴Mu wuyuku seŋ ɗa, muta, wiyuku tuku gaiɗi marmakaiku n’e ɗa gaiku na ɗa.

⁵Mula arku sini hlai n’amai ɗa, talaŋ pɗem, tala ɗugul n’a na amai na ɗa, a na haa amai muduku par gaigai.

⁶Na ɓa ku za tuwur li ɗa, meefeŋ na ku zaŋ sini tiɓ ɗa a na wata ɗa? Na ɓa ku riya meefeŋku ɗa amai sek sek ma, na ku za sini ktai ɗa a maɗa?

⁷Na ɓa ku na jre maa, ku zini ɗa a maɗa, n’a nafa suku par tiɓ a maɗa?

⁸Meefeŋ na wiiku ɗa a kiɗa a tuura ɗa a ɗif na maiku tuku ɵa, jre na wiiku ɗe te zina pini ɗif maiku tuku ɵa lai.

⁹Mefeŋ paŋ ɗai e tûwi tiɗi ɗai n’e ziɗi gir, ɗai e piyi zinai, buri karai na tiɗi ɗai n’abakai ɗa.

¹⁰Amma ktai a zilba sini ɓa Alaw n’a zaŋa ɗa aŋ wata ɗa? Ni n’a sa hiini wiiɗi ɗai aŋ ɵi yama war duvuk,

¹¹ni n’a sumu yel a suwa wazagai n’ezini puɗu puɗu na midini afti, n’a sumu yel a suwa wazagai zi ɗufli n’arbani hlai n’amai lai ɗa aŋ wata ɗi ɗa? Ɗif ktai ma aŋ kai ɗa koo!

¹²Ɗai e ɗûûli amma a waya seŋ kai, burini kûlini-si na wiiɗi ɗai na maafanai ɗa.

¹³A jre ɵa, a nava wala kai, Alaw ɗa a na ɵina kai, Alaw zi spak paŋ ɗa a na ɵinaŋ kai.

¹⁴Amma tuku Yob ku muɗa ɓa: Arku sini kai, amma seŋku ɗa aŋ war tini, ku na bayaŋ ɗaai ɗa!

¹⁵Na ɓa tiyana ɗa, hiy na wiini ɗa a cosi kai ɗa, a za na buri ɓa a na sɗa fiki n’amai na wiiɗi ɗai ɗa kai ɗa,

¹⁶Yob ɗa, a mala mini amai a muɗa kla kadai, a muɗa seŋ viy viya wuzani sek sek na ɗa buri ɓa a sɗa wala kai.