Read Mousgoum Yob 40 Bible Online

Yob 40 - Mousgoum bible

Yob 40

¹EPIƊ-ƊAI a waya a tika seŋ a miɗini wiini Yob:

²Tuku zi siŋki yel ɗa, ku firya ku miisa sda na wiini Alaw zi Spak ɗa ɗi? Tuku zi miisi Alaw ɗa, ku kiɗa ku waya seŋ pin seŋ hanɗa paŋ ɗi?

³Yob a waya seŋ wiini EPIƊ-ƊAI a muɗa:

⁴Ta mu wala ktai na wa ɗa, mu wuyuku seŋ na ɗa maɵa ɗa? Mu doogo ta li ma.

⁵Mu muɗa ɗa a viya, mu muɗa fuseŋ zamai kir kai. Na mu muɗaŋ ta na ɗa, wala zamai na mu tikaŋ mini aŋ kir kai.

⁶Arbani berber n’abai par, EPIƊ-ƊAI a zilba Yob a miɗini:

⁷Za barka, zizina suku ka aŋ wus ta, aga mu zilbuku, ku wayaŋa seŋ.

⁸Ku firya ku sɗa jre n wiya ka gazi gazi ɗi? Ku firya ku tika seŋ sa, kapai tuku ku za edi aŋ jre ɗi?

⁹Tuku, gdaŋku maya ta Alaw ɵa ta ɗi? Wulaku ɗa a wa gdaŋ mai na wiya ɵa ta ɗi?

¹⁰Na ɓa a na ɵa ɗa, wa kûlûni-si suku, wûti abai suku lai ganasi suku gaini juf, gaini ŋili lai.

¹¹Siŋkasi hiyku ɗa edi, mula arku midiɗi nagai n’e kûli siɗi paŋ ɗa, hiɗiɗi azumai.

¹²Mula arku midiɗi ngai n’e kûli siɗi paŋ, wiyiɗi azumai kirpiɗi na maafanai won hlai n’e ɗi woni ɗa,

¹³wiiɗi azumai pin afti dugiɗi war daŋgai na wiini mri ɗa;

¹⁴Nɵa ta lai aga mu kuluku buri ɓa siɗiku ɗa a suku rɗi n’amai.

¹⁵Tala wala n’abai n’arni yem ɗa haw ɗa! Mu rgaŋ mu ta, maini na mu rguku tuku ɗa ɵa. A luma kuzum maini ɵeŋ nɵa.

¹⁶Gdaŋni a na sini ɓla-ɓlamaini, spakni a na sini sirdai na warni li;

¹⁷a huuliti giɗirini edi kaŋ maini luwuŋ Sedre nɵa. Sirdai na sini ɓalakni ɗa gaini wi arni marni ɗik ɗik;

¹⁸keɵkeni ɗa maini tiyo zi kiya nɵa, harawni ɗa, maini kawai na faifai a gzilaŋ nɵa.

¹⁹A abaini sda na ta Alaw mu zaŋ ɗa paŋ; Ta na mu rgaŋ ɗa, mu ŋa midini mu ta ktai.

²⁰A nava simini ɗa amai sini huwuŋ, war hlai na wazagai na buza a ɵa dawaŋ woni ɗa.

²¹Amma a fana ɗa azumai pin luwuŋ, a ŋoya ɗa warni avakai, azumai pin vayai;

²²luwoŋai na ɵimaɗi avai ɗa, a gonaŋ azumai, a tika seze midini.

²³Na ɓa yem-ra a bunda li a ka gaini gdaŋni maa, a huwya sini kai koo ɓa yem-ra Yurdan a ma gurɗokni kaw ɗa, sini gai hangalni waŋ.

²⁴Na ɓa arni edi ca ɗa, a kiɗa a yima kai ɗi? A kiɗa a yima warni azaw kapai e ɓili merfeŋni ɗi?

²⁵Aga ku yima leviatan ɗa gaiɗi zuwti maiɗi azuguni ɵa ɗi? Ku kiɗa ku bulasi mini gai kadrai ɗi?

²⁶Ku kiɗa ku pa wala merfeŋni ɗi? Ku ɓula galaini gaini kawai ɗi?

²⁷Aga a siiwuu ɓa ku ɵaŋ su kiɗi ɗi? Aga a muɗuku gaini wule na pɗem, kapai ku za hanɗa ɗi?

²⁸Aga a za bonu ktai gaiku ta, kapai a hina aŋ begeku ɵa, haa sin mrini ta kiɗi ɗi?

²⁹Aga ku ɵa dawaŋ gaini maini wala zi ɗifli ɵa ɗi? Aga ku rgaŋ azumai ɓak, kapai aliku na falakai ɗa, e ɵi dawaŋ gaini ɗi?

³⁰Ɗai aga e tipi sini tap aŋ wuriŋ edi ɗi? Zaw ɗai zi cakala aga e ɓûrwiŋ arbaɗi ɗi?

³¹Ku kiɗa ku ɓula amurni gaini kawai tiɓ tiɓ ɗi? Zaw ku ɓula midini gaini turum ɗi?

³²Titimaŋ haw le, aga ku talaŋ, na ɓa dawai zamai ku waya li pini ɗa.